Te mau uiraa & te mau pahonoraa

« Ua tai‘o vau i te hoê mahana 1 Nephi 7:12 o te parau nei e ua ti‘a i te Fatu i te rave i te mau mea atoa no tatou mai te mea e faaohipa tatou i te faaroo Ia’na. Nahea tatou e faaohipa ai te faaroo i te Mesia? »

Te auraa o te parau faaohiparaa i te faaroo ia Iesu Mesia o te ti‘aturiraa ïa Ia’na.
Te faaroo o te mana ïa no te faaite i To’na hinaaro i roto i to outou oraraa.
E tae mai te faaroo, te hoê horo‘a a te Atua, ia vai parau-ti‘a ana‘e outou.
Teie te mau pene no ni‘a i te faaroo e ti‘a ia tai‘ohia : Hebera 11, Etera 12, e Moroni 7.

Liahona

Te faaroo o te ti‘aturiraa ïa i te Fatu. Ua riro to outou faaroo Ia’na ei puai o te arata‘i ia outou ia haapa‘o i Ta’na ra evanelia, e e tauturu ïa to outou haapa‘oraa ia outou ia rahi atu â to outou faaroo, o te hoê ho‘i horo‘a no ŏ mai i te Atua ra.

Mai ta te mau papa‘iraa mo‘a e parau nei, mai te mea e faaroo to outou i te Fatu, e nehenehe ïa Ia’na ia rave i te mau mea atoa no outou, mai te faaoraraa, te faaoreraa, te tamahanahanaraa, e te faafariuraa ia outou. E ere râ te fariiraa i te faaroo i te parauraa’tu i te Atua eaha te mea e rave. O te ti‘aturiraa ra Ia’na e te taaraa e e tae mai te taato‘araa o te mau haamaitairaa « mai te au i to’na hinaaro » (1 Nephi 7:12) e « mai te au i to’na iho ra tau mau, e i to’na iho rave‘a » (PH&PF 88:68). Ei hi‘oraa, eita paha outou e farii i te hoê pahonoraa vitiviti i ta outou mau pure. Te haapapû ra râ to outou faaroo e ua faaroo te Metua i te Ao ra i ta outou mau pure e e pahono ïa oia i te taime ti‘a.

No te faatupu e no te faaohipa i to outou faaroo, (1) a haapii i te parau a te Atua, na roto anei i te tai‘oraa i te mau papa‘iraa mo‘a aore râ na roto anei te faarooraa i te feia tei mau i te mana no te haapii i te reira (a hi‘o Roma 10:17). Na to outou ite i te parau e tauturu ia outou ia ite e e tape‘a te Atua i te mau taime atoa i Ta’na mau fafauraa.

(2) A rave i te mea ta outou i haapii mai aore râ mai ta Alama i parau, a tamata i te parau. Ua riro te parau mai te hoê huero. Mai te mea e mea maitai te reira, e faarahi ïa te reira i to outou aau, e e haamaramarama te reira i to outou ite, e e haamata te reira i te mea oaoa no outou (a hi‘o Alama 32:28). O tera ïa ta outou haapapûraa varua e e parau mau te parau, o te faatupu i to outou faaroo.

(3) A haapa‘o i te mau faaueraa. E faati‘a to outou parau-ti‘a ia tupu te horo‘a o te faaroo i roto i to outou oraraa. A faaite i to outou ti‘aturiraa ia Iesu Mesia na roto i te peeraa i To’na hoho‘a e ta’na mau haapiiraa. A rave i te mea Ta’na i ani ia outou na roto i te mau papa‘iraa mo‘a, te mau haapiiraa a te mau peropheta ora, e te mau parau rii rii a te Varua Maitai. Ei hi‘oraa, ua farii anei outou i te aniraa a te peresideni Gordon B. Hinckley ia tai‘o i te Buka a Moromona hou te hopea o te matahiti 2005? O ratou o tei na reira ua rave ïa ma te faaroo e ua farii i te mau haamaitairaa tei fafauhia. (Oia mau, mai te mea aita i hope ia outou i te tai‘oraa i te Buka a Moromona i taua taime ra, e nehenehe noa â ia outou ia na reira!)

A tere ai te mau taata e rave rahi na roto i te oraraa ma te faaroo ore i te Fatu, e ore roa e nehenehe ia ratou ia fatu i te ora mure ore ma te faaroo ore Ia’na. Na roto ana‘e i te evanelia a Iesu Mesia – ma te faaroo Ia’na mai te ture matamua – e nehenehe ai ia tatou ia oaoa « i te ora mure ore, o te horo‘a hau a‘e te reira i te mau horo‘a atoa a te Atua » (PH&PF 14:7).

Te feia tai‘o

Te ti‘aturi nei au e to tatou here i te Mesia e i Ta’na evanelia o te rave‘a maitai roa‘e ïa no te faaite i to tatou here e to tatou faaroo Ia’na. Ia ora ana‘e tatou i Ta’na mau haapiiraa e Ta’na mau ture e ia haere tamau noa tatou i te e‘a Ta’na i faaite mai ia tatou, te faaite ra ïa tatou i to tatou iteraa papû Ia’na e ia vetahi ê atoa i roto i to tatou oraraa. Te faaite nei tatou i to tatou iteraa papû no to tatou mauruuru no Ta’na tusia no tatou e no te faaho‘iraa mai atoa o te evanelia.

Jan V., 17, Moravia, Repupirita no te Fenua Czech

Te auraa o te faaroo ia Iesu Mesia o te ti‘aturi-hope-raa ïa Ia’na e te papûraa ïa i roto i to tatou mana‘o e to tatou aau e te ora mau nei Oia e o Oia to tatou Faaora. E ti‘a ia tatou ia tuu i to tatou ti‘aturiraa i te Mesia no te mea ua ite Oia nahea ia tauturu ia tatou ia upooti‘a i ni‘a i te mau fifi i roto i to tatou nei mau oraraa. Na to tatou ereraa i te faaroo Ia’na e haape‘ape‘a ia tatou no ni‘a i to tatou huru varua e ia feaa i te mau fafauraa a te Atua. Na te faatumuraa i to‘u mana‘o i ni‘a i te Faaora i tauturu ia‘u ia vai aueue ore noa i roto i te evanelia, ia haavî i to‘u mau mana‘o mata‘u e ia upooti‘a i ni‘a i te mau fifi.

Natalia N., 19, Chimborazo, Ecuador

Faaohipa i te faaroo ia Iesu Mesia na roto i te haapa‘oraa. Faaroo aore e ohipa e mea pohe. Na roto i te haapa‘oraa ia ore ana‘e tatou i ite i te tumu no te faaueraa, te faaite nei ïa tatou i to tatou ti‘aturiraa e to tatou faaroo Ia’na. Na te haapa‘oraa i te mau faaue e faaite e te ti‘aturi nei tatou Ia’na e e faaroo to tatou i te mea Ta’na e parau mai ia tatou ia rave. E haapuai te pure e te tai‘oraa i te mau papa‘iraa mo‘a i te mau mahana atoa i to‘u auraa e te Metua i te Ao ra, na te reira e horo‘a rahi mai i te faaroo Ia’na. Oia atoa, e ti‘a ia outou ia tia’i i te mau pahonoraa i ta outou mau pure. A pure ia tauturuhia outou ia noaa te faaroo.

Meghan S., 18, Missouri, Te mau Hau Amui no Marite

E nehenehe ta tatou e faaohipa i te faaroo ma te faati‘araa i te Fatu ia arata‘i i to tatou mau oraraa. Na roto i te ti‘aturiraa i te Atua, te peeraa’tu Ia’na, e te tautoo itoitoraa i te haapa‘o i te mau faaueraa, e nehenehe ïa ia tatou ia faaohipa i to tatou faaroo Ia’na. I muri a‘e i to tatou tuuraa i to tatou hinaaro i raro a‘e i To’na hinaaro, e nehehene ta tatou e ite i te mau semeio faahiahia i roto i to tatou mau oraraa e i roto i te oraraa o te feia na pihaiho ia tatou.

Dmitriy Z., 21, Donetsk, Ukraine

E rave rahi ta tatou mau rave‘a no te faaohipa i te faaroo i te Atua mai te tai‘oraa i te mau papa‘iraa mo‘a e te pureraa i te mau mahana atoa, te haamo‘araa i te mahana sabati, te aufauraa i te tufaa ahuru e te moni haapaeraa maa, te taviniraa ia vetahi ê, e te hinaaroraa ia haapa‘o i te tahi atu mau faaueraa.

Seng S., 18, Battambang, Cambodia

Ia ti‘aturi ana‘e tatou i te tautururaa e te mana o te Fatu, i reira ïa e nehenehe ai ia tatou ia haere i mua ma te ti‘aturi Ia’na. E faaite mai to tatou haapa‘oraa i te mau faaueraa e e faaroo to tatou Ia’na. Ua ite au ma to‘u aau atoa e te hinaaro nei Oia ia horo‘a mai ia tatou te mau haamaitairaa rahi e e mea faufaa rahi te faaroo e te haapa‘oraa no te farii i taua mau haamaitairaa ra.

Marco C., 18, Liguria, Italia

Mai te mea e iteraa to tatou no te evanelia e e faaroo to tatou i roto i ta’na parau mau e ti‘a ïa ia tatou ia tamata i te oraraa i te reira no te farii i te mau haamaitairaa. Te faaroo ma te ohipa ore e mea pohe. Mai te mea te vai nei te faaroo e te ohipa, i reira te faaroo e rahi roa’tu ai i te paari. I roto i te 1 Nephi 7:12, ua faahaamana‘ohia tatou e e ti‘a ia tatou ia vai haapa‘o noa i te faaue a te Atua. Te vai haapa‘o-noa-raa o te tuhaa matamua ïa no te faatupuraa i te faaroo.

Otgonchimeg B.,15, Töv, Mongolia

E nehenehe ta tatou e faaohipa i te faaroo ia Iesu Mesia na roto i te ti‘aturi-hope-roa raa i To’na ite hopea ore e to’na puai hopea ore. Te hoê rave‘a maitai no te rave i te reira na roto ïa i te aufauraa i te tuhaa ahuru, no te mea e na roto i te reira e nehenehe ai ia tatou ia faaite e ua hinaaro tatou i te vaiho i te mau mea no te ao nei no te mau haamaitairaa rahi a‘e tei fafauhia mai.

Samantha L., 15, Zamboanga del Sur, Philippines

E faaohipa tatou i te faaroo i te Mesia na roto i te haereraa mai i te pureraa, te faaotiraa i to tatou mau pure, te tai‘oraa i te mau papa‘iraa mo‘a, te fariiraa i te mau piiraa, te tatarahaparaa i ta tatou mau hara, te amuraa i te oro‘a, e te faananearaa i to tatou mau piiraa.

Adam N., 18, Georgia, Te mau Hau Amui no Marite

Ua faataahia te mau pahonoraa no te tautururaa e no te faahi‘oraa, eiaha râ e mau faahitiraa parau no te haapiiraa a te Ekalesia.

«I te mau taime atoa e tamata outou i to outou faaroo, oia ho‘i, e rave outou i te ohipa na roto i te hoê mana‘o, e farii ïa outou i te tapa‘o haapapûraa a te Varua. E haapuai taua mau mana‘o ra i to outou faaroo. A tapiti ai outou i taua raveraa ra, e rahi atu to outou faaroo i te paari… Ma te rave tamauraa, e riro ïa to outou faaroo ei mana u‘ana e te puai, o te faateitei e o te faauru i roto i to outou oraraa ».

Elder Richard G. Scott no te Tino Ahuru ma Piti Aposetolo, « The Sustaining Power of Faith in Times of Uncertainty and Testing », Liahona, Me 2003, 76.