Te hoê tere pereoo uira i te fare pureraa
I te hituraa o to‘u matahiti, ua faahoa to‘u metua vahine e to‘u metua tane i te hoê utuafare paruparu i roto i ta matou paroita, te hoê utuafare o te hoê metua vahine ivi e ta’na na tamaiti e piti. Hoê â to to‘u tuaana John e vau nei faito matahiti e na tamaiti e piti, Robin e Shannon, no reira ua tano ia maua ia faahoa ia raua.
Aita to teie utuafare e pereoo uira, no reira ua pûpû to‘u metua tane i te tii ia ratou i to ratou utuafare i te hoê oire tapiri no te faauta ia ratou i te fare pureraa e no te faaho’i ia ratou i te fare. Te haamana‘o nei au i te mau mahana e ani o papa i to‘u taea‘e e ia‘u nei ia apee ia’na no te tii atu ia ratou. Aita vau i au i te tahi taime, e noa’tu râ ta‘u amuamuraa, ua tamau noa o papa i te tii ia ratou e tae noa’tu ua itoito ratou i te haere mai i te fare pureraa e ua noaa to ratou iho pereoo uira. Aita i maoro roa ua bapetizohia e ua haamauhia o Robin e Shannon ei melo no te ekalesia, e ua haamata to raua metua vahine i te rave i te ohipa i roto i te Sotaiete Tauturu. Aita roa’tu vau i ite i taua taime ra te mau mea maitai e tae mai na roto i teie tautururaa.
Tau na ava‘e i muri mai hou vau a haamata ai i te piha haapiiraa va‘u, ua pohe to‘u metua tane. No te faarahi atu â i to‘u oto, aita roa vau i oaoa roa no to‘u hoho‘a mata e te hoa ore. Ua haamata vau i te topa i roto i te mau mana‘o hepohepo, e ua rave au i te mau hora tamaaraa i te avatea no te haere avae i te fare no te mea eita e nehenehe ia‘u ia parahi o vau ana‘e.
I taua iho matahiti ra, ua haere mai te utuafare ta matou i faahoa e faaea i roto i to matou mataeinaa haapiiraa, e ua haamata o Shannon i te haere mai i te fare haapiiraa. Ua riro maua e hoa i te reira ihoa taime. Ua ite au e ua fariihia vau e aita vau i oto faahou. Na te iteraa e te oaoa nei te tahi taata i te riroraa ei hoa no‘u i haapuai i to‘u ti‘aturiraa ia‘u iho e te mana‘o e e faufaa to’u. Aita vau e faaea faahou o vau ana‘e i te taime tamaaraa.
Ua rahi roa to maua hoaraa i te fare haapiiraa tuarua. I te taime a haere atu ai to maua mau tuaana i te fare haapiiraa teitei e i te misioni, ua riro maua o Shannon ei mau taea‘e no te tahi e te tahi. Ua farii maua i ta maua parau tuite no te scout aeto i roto i te hoê â oro‘a faahanahanaraa, ua haere maua i te fare haapiiraa teitei, ua haere i ta maua misioni i te hoê â tau ve‘ave‘a, e ua faaea maua i roto i te hoê â piha taotoraa i muri mai. Ua faaipoipohia maua toopiti i roto i te hiero no Roto Miti i na vahine e piti faahiahia, e ua fanauhia ta maua mau tamarii matamua i roto noa i te area e toru ava‘e te tahi e te tahi.
I te hoê pô na mua noa‘e i te faaipoiporaa o Shannon, ua haamata maua i te aparau no ni‘a i to maua tamarii rii ra. Ua parau vau ia’na nahea to’na tautururaa ia‘u ia faaore i to‘u mau mana‘o hepohepo e ia faaruru i te poheraa o to‘u metua tane. Ua parau vau ia’na e na to’na hoaraa ia‘u i tauturu ia taui i to‘u nei oraraa. Ua parau mai Shannon e ahani aita to‘u papa i faauta i to’na utuafare i te fare pureraa, e ore roa ïa oia e haere i te fare pureraa, e tavini i te hoê misioni e e taatihia i roto i te hiero.
Ua ite puai au i te Varua i roto i taua aparauraa ra a ite ai au i te mau haamaitairaa ta te hoê noa tere pereoo uira i faatupu i roto i to matou mau oraraa. A feruri ai au i te hoaraa o Shannon, ua ite au e aita to‘u metua tane i tauturu noa i te utuafare o Shannon, ua faaineine atoa râ oia i te hoê hoa tei faaora i ta’na iho tamaiti.