ITERAA I TE HOE TUATIRAA
Ua matapôhia o Chen, Yang Su-yuan mai te matahiti 1981 mai â, a tupu mai ai te tahi mau fifi i muri a‘e i te tapû-raa-hia to’na mata. Na te ereraa i to’na mata i tauturu ia’na ia ite i te evanelia e i tauturu ia’na i te pae hopea ia ite i te faufaa rahi no te ohipa hiero e te ohipa no te aamu utuafare.
No to’na matapô, aita te tuahine Chen i ite e na tamahine apî e piti e ani râ i te hoê hapaina pape i to’na uputa fare e nau misionare ïa. Na te aniraa ia raua ia tomo atu i roto i to’na fare i faatupu i te huru-ê-raa i roto i to’na oraraa.
« Ua faariro te rahiraa o te mau taata ia‘u ei taata faufaa ore no te mea e vahine matapô vau » te na ô ra te tuahine Chen. « E ere râ te reira te mea ta te Atua i hinaaro ia parau mai ia‘u. Ua tono mai oia i te mau misionare i muri a‘e i to‘u matapô-raa-hia no te haapii ia‘u e e mau tamarii ana‘e tatou na te Atua e ua faaora Oia ia tatou ma te hoo rahi. Ua haapii au i to‘u faufaa rahi no te mea ua faaora o Iesu ia‘u. E mea faufaa rahi roa vau.
Mai te reira mai taime, ua tavini te tuahine Chen i roto i te mau piiraa e rave rahi i roto i te paroita matamua no Chung Li, te tĭtĭ no Tao Yuan Taiwan, e i roto atoa i te hiero mai te matahiti 1992 mai â.
E ere ana‘e te ereraa i to’na hi‘oraa mata te tamataraa ta te tuahine Chen i faaruru. I te matahiti 1987 ua fatata oia i te pohe i muri a‘e i te tupuraa te hoê fêfê tei titau e ia tatarahia te hoê ivi aoao. Ua ora mai oia, ua pau roa ra ta’na moni i haaputu no te aufauraa i te tarahu taote. Ua uiui oia ia’na iho no teaha te Atua i ore ai i rave noa ia’na.
Ua parau oia e teie ta’na pahonoraa, « e rave rahi te mau mea e toe ra ia oe ia rave ».
Aita i maoro roa i muri iho, ua ite oia i te piiraa no te aamu utuafare.
Ua parau oia « Ua uiui au ia‘u iho, nahea râ vau i te rave i te ohipa tuatapaparaa mai te mea eita e nehenehe ta‘u ia hi‘o? Aita râ tera mana‘o i ore ».
Na roto i te tautururaa a te hoê hoa here, ua ma‘imi oia e 22 u‘i no to’na reni utuafare e ua rave oia iho i te taato‘araa o te mau oro‘a no te mau vahine. Te rave nei oia i teie nei i te mau amaa tapiri no to’na reni utuafare. Na roto i te raveraa i te reira, ua noaa ia’na i te ite ma te aau mauruuru i te tuatiraa piri i rotopu i te ohipa hiero e te ohipa aamu utuafare.
Ua parau te tuahine Chen « e rave rahi mau oro‘a ta tatou e farii nei i roto i te hiero, e e mea faufaa rahi ana‘e te reira ». « E ti‘a râ ia tatou ia rave i to tatou aamu utuafare. Eita e nehenehe ia tatou ia horo‘a teie mau oro‘a i to tatou mau tupuna ma te ore e rave i to ratou parau tuatapaparaa ».
Ua parau o Elder Dennis B. Neuenschander no te Hitu Ahuru « te aamu utuafare e te ohipa hiero hoê ana‘e ïa ohipa ». « E ti‘a i te ma‘imiraa i te aamu utuafare ei vahi imiraa tumu no te mau i‘oa no te mau oro‘a hiero, e ua riro te mau oro‘a hiero ei tumu matamua roa no te ma‘imiraa i te aamu utuafare ».1
Te aro nei te tuahine Chen i teie nei i te hoê ma‘i apî e te mau fifi i muri a‘e i te hoê ma‘i rii mafatu. Piti ahuru matahiti i muri a‘e i to’na ui-matamua-raa i te Atua no teaha Oia i vaiiho mai ai ia’na, te ui nei oia i taua â uiraa – e ua farii oia i taua â pahonoraa. « Aita anei au i parau a‘ena ia oe? » te mea ïa ta’na i ite Ia’na i te parauraa. « Te vai nei â ta oe ohipa hiero no te rave ».
No reira te tamau noa nei â te tuahine Chen i te haere i te hiero hoê hepetoma i te ava‘e.
Te parau nei oia e « teie te mau mea e ti‘a ia tatou ia rave no to tatou mau tupuna o te ore roa e noaa ia ratou i te rave no ratou iho ». « No to‘u huru oraraa, aita ta‘u e haaheporaa no te taime ta vetahi ê e faaruru nei no te ohipa e te tahi atu â mau ohipa. Ua ti‘a ia‘u ia haapuai a nehenehe noa‘i ia‘u ia na reira ».