ANA ONIMAKI TE ATAEI
I a tia ni baireia bwa n na rianna nakon te maungatabu n te titeiki, n nakonako ma natiu te mwaane inanon 30 ke 40 te miniti, ngkekei ngkoa waniua ana ririki. E a bon tia ni bane uabwi te miniti ngke I a moanna n ataia ae I aki ataia bwa e a ngaa kawaira. Natiu te mwaane, Elson, bon te tia kabwararia, e a tia ni karakinna nakoiu taekan bwaai ake a tia n riki n te reirei ke n te mweenga. I a tuangnga bwa e na aki moa karongoa, n tuangnga bwa I tangiria ni iango teutana bwa I a maaku bwa e a bua kawaira.
Bon imwin aei ao natiu te mwaane e a kaota ana onimaki. E a tuangai bwa ti na karaoa ara tataro. I kaeka, ma te wanawana ao te atatai ngkai I ikawai (ao man moanna n nako nanou ibukina bwa e a kaan tain te bootaki ni waaki), bwa ngkana e kan tataro, ke karaoia—e ngae n anne, I tangiria bwa N na iango. I bon taku nakoiu, “Iai bwaai ake ti bon aki kainnanoa iai te Uea; kakaean te kawai nakon te umwantabu bon ngaia teuana.”
N ai aron ae ataa au iango, e reireinai Elson iaon te nanorinano, n taekinna, “E aera ngkai ko imanono ni karaoi bwaai ni kawai aika matoatoa?” Imwin anne ao e a kainabwaabu, ao I ataia bwa e a tataro n ana iango. Tabeua miniti imwina ao ti a roko n te umwantabu, ao I ataia bwa e a tia ni kaekaaki ana tataro.
Ngkai ngai temanna te Aomata ae Itiaki ni Boong aika Kaitira, ti a bon kakabwaiaki n riki bwa kaain Ana Ekaretia Iesu Kristo. Au koaua ibukin koauan raoi manga kaokan te euangkerio e a tia n rikirake n ataakina ngkai natiu te mwaane, ngkai bon te ataei, e a tia n ata aron kamwakuran te reirei ibukin te onimaki ao te tataro, e riki aei nakoiu bwa te katooto n aron maiuakinan ana reirei Iesu Kristo.