RONGORONGO MAN TE MOAN BERETITENTII
Ti Kakoaua Iesu Kristo
E raka iaon 2,000 te ririki n nako, ngke e bungiaki te Tia Kabooi maiuia aomata i Betereem i Iutaia. Ngke te teei ngaia ao E uotaki nakon te tembora i Ierutarem. Ikekei are a ongo iai Maria ao Iotebwa taeka ni burabeti iroun Timeon ao Aana ibukin te merimeri are e a kaman taekinaki bwa e na riki bwa te Tia Kamaiu ibukin te aonaaba.
E kabanea angiin Ana bong n ataei i Natareta i Kariraia, ao ngke e koro te 12 ana ririki ao E a manga uotaki riki nakon te tembora. A kunea Maria ao Iotebwa n tekateka ibuakoia taan reirei, a kunea ni marooro ma mwaane aika atatai, “a ongora Irouna, man titirakinna” (Joseph Smith Translation, Luke 2:46).
E rikirake Iesu n rabakau ma n ikawai, ma n akoaki iroun te Atua ma aomata“ (Ruka 2:52). Ao e bwabetitooaki iroun Ioane n te karaanga are Ioretan ”ni kakoroa nanon te raoiroi ni kabanea“ (Mataio 3:15). E aki mamatam inanon abwi te bong ao te ngaina ngke e kaririiaki iroun Taatan i mwaain ae E karaoa Ana mwakuri ibukiia aomata. Man te tai arei ao E anga reirei, katoki aoraki, ao n anga kakabwaia.
Iehova ae Kakannato
Iesu bon ngaia Iehova ae kakannato n te Otetemanti, Are e kitana ana kainntokanuea Tamana ao e ruo nakon te aonaaba ni kamangoria n aiaron te merimeri ae bungiaki. E a kaman tataekinaki bungiakina iroun Itaia n tienture aika bwaka nako, ae kaotaki n taeka ni buraabeti, bwa E bungiaki te tei ibukira, ti anganaki te nati te mwaane, ao e na mena te tautaeka i aon angana: ao e na atongaki arana bwa Te Tia Reirei ae Kamiimi, Te Atua ae Mwaaka, Te Tama ae akea tokina ao Te Uea n Raoi (Itaia 9:6).
Bwa Iesu Kristo aio ae ti kakoaua raoi, n aron are taekinna Ioane te Tia Kaotioti, “te tia kaotioti are kakaonimaki, are te moa n uaa mai buakoia maate, are mataniwiia uean aonaaba.” E “tangiriira, ao e tebokiira man ara bure n raraana, are karaoira bwa ueana ma ana ibonga Atuana ae Tamana; ana bwai te neboaki ma te tautaeka n aki toki” (Te Kaotioti 1:5–6).
Te Tia Kamaiu Ibukin te Aonaaba
Boni ngaia Natin te Atua ae moan te Mwaaka. Bon ti te aomata ae kororaoi n nakonako iaon te aonaaba. E kamaiuia aoraki ao e kanakonakoia mwauku, kanorabaiia matakii, ao ni karikiia aika bonotaninga bwa ana ongo. E kautiia maate. Ao E anga oin maiuna ibukin te mwakuri ni kamaiu, aron kakaawakin aei e bon riaon wanawanara.
E koreia Ruka bwa te maraki aei e a bon rangin ni korakora ngaia are “maonona kanga ai aron timtim n raraa aika bubura aika bwaka iaontano” (Ruka 22:44), te kakoaua ibukin te maraki ae korakora bon iai naba kakoauaana inanon Ana Boki Moomon ao Doctrine ao Covenants (tara Motiaea 3:7; D&C 19:18). Te korakai i Ketetemwane ao iaon te kaibangaki i Calvary, tii tabeua tebubua te miita mai Ketetemwane, e roota rabwatana ao tamneina “te kariiri, … maraki, … te baki, te taka, ao te korakai, n riaon riki bwaai ake e kona n rinanoi te aomata,” e taku te Uea Beniamina, “are e na aki mate iai” (Motiaea 3:7).
Imwiin te korakai ni maraki i Ketetemwane ao e roko Katikana, Kataakina, Kabuakakaana, ao te maraki ae korakora ni Matena iaon te kaibangaki, n raonaki ma taunakina n ana nne ni mate Iotebwa ao kaotan te kimwareirei man te tokanikai n tain te Mangauti. Ngaia, te kabanea ni mangori n ataei i Betereem are e nakonako ni kawain te Aba ae Tabu ae onrake n te bubu uoua tengaa te ririki n nako, e a riki bwa te Uea ae Akea tian Mwaakana, aia Uea uea, te Tia Anga te kamaiu nakoia aomata ni kabane. Akea ae kona n ata ni kabane aron tamaroan Maiuna, te karineaki ni Matena, kataabangakin aron Ana bwaintituaraoi nakoia aomata. Ti katanoata ma te aki nanokokoraki ma mataniwiia tautia ake tebubua are a taku n tain Matena, “Bon te koaua bwa natin te Atua te aomata aei” (Mareko 15:39).
Ara Uea Ae Maiu
Aio bon te kakoaua ibukin koauan te Aonaaba Ngkoa, te Baibara ae Tabu. Ao iai riki te bwanaa, are e kakoaua te Aonaaba ae Boou, Ana Boki Moomon. Inanona ao te Tama e kabwarabwaraa Natina are e a tia ni mangauti, ao e taku, “Nooria natiu ae Moan te Tangiraki, are I kakatonga irouna, are e a tia ni mimitong arau irouna” (3 Nibwaai 11:7). Te kabwarabwara ma ieta aei e moanaki man rongorongon ana mwakuri te Tia Kamaiu ibuakoia tabeman Ana “tiibu ake tabeman” (Ioane 10:16) imwin Waerakena mai Ierutarem nako karawa. Ni kabane rongorongon Ana Boki Moomon bon rongorongon Iesu Kristo n Atua ao kakabwaia ake akea tokiia ake a kona ni karekea natin te Atua mwaane ao aine rinanon Ana tangira ni kabomwii. E taku temanna te Burabeti man ana Boki Moomon:
“Bwa ti kakorakoraira ni koroboki, n anai nanoia natira, ao tarira naba, bwa ana kakoauaa Kristo, ao bwa aonga ni manga tangiraki iroun te Atua; bwa ti ataia bwa rinanon te aakoi are ti kamaiuaki iai, imwiin bwaai ni kabane ake ti kona ni karaoi… .
“Ao ti kakarabakauakina Kristo, ao ti kimwareirei iroun Kristo, ao ti tataekina Kristo, ao ti taetae ni buraabeti ibukin Kristo, ao ti koroi kanoan ara taetae ni buraabeti bwa antai ake a na kawaria ibukin kamaunaan aia bure” (2 Nibwaai 25:23, 26).
N raonaki ma aikai ni kabane bon aia katanoata buraabeti n taai aikai bwa E maiu! Te kakoaua ae a tia n anganaki bwa te kabanea maibuakon kakoaua aika mwaiti ake a tia ni karekei mairoun te Tia Kamaiu (tara D&C 76:22). N te Doctrine ao Covenants, E kaota ana koaua ae matoatoa ibukin Tabena mairouna: E taku bwa te Orebwa Ngaia ao te Omeka, Kristo te Uea; te moan ao te toki, e ngae ngke ngai ngaia, te moan ao te toki, te Tia Kabooi Maiuia kaain aonaaba (tara D&C 19:1).
Ti aki ti nooria Inanona ara Mwaatita ao te Tia Kawakin Tiibu ma ara Banna ni katooto ae Tamaroa, ae kabooi maiura, “Ngkana ko kan riki ni moan te raoiroi, … nako mai n iriirai” (Mataio 19:21).
Bouan te Maninganinga
Ngaia bouan te maninganinga ae moan te kakannato n te Ekaretia are E kaota Arana, ao Ana Ekaretia Iesu Kristo Ibukiia Aika Itiaki Ni Boong Aika Kaitira. Bwa bon akea te ara riki teuana ae angaanganaki aomata ae ti konaa ni kamaiuiaki iai (tara Mwakuri 4:12). Ngaia te tia Korea rongorongon kamaiuakira, ao te tia Karika te maiu are aki toki (tara Ebera 5:9). Akea te bwai ae Katotoonga. Akea katotoongana. Akea ae na konaa. E rabwa te Atua ibukin ana bwai n tangira Natina te Mwaane ae Tangiraki, ae anga Maiuna bwa ti aonga ni manga maiu ao ngaia te mataniwi, bouan maninganingan te onimaki ao Ana Ekaretia ae aki kona ni kamwaingiingaki.
Taraakin Ara Onimaki
Tiaki atai bwaai ake a tei imwaaira. Ti maeka n te aonaaba ae aki koaua. Tabeman, ana karekei aia bwai aika rawata n te aonaaba aei. Tabeman, ana akea kukureiia ni maiuia. Tabeman, te kimwaareirei ao te kukurei, te marurung ae raoiroi, ao te akoi ni maiuia. Irouia tabeman, tao te aoraki ao karaoan mwakuri aika ana karekea te nanokaawaki. Ti aki ataia. Ma teuana te bwai ae ti ataia. N aron te Polar Star i karawa, n aki iangoia bwa teraa kanoan taai aika ana roko, e tei ikekei te Tia Kabooa te aonaaba, Natin te Atua, n aki nano uoua man koaua bwa angkaan maiura ae aki maamate. Ngaia bon te bwaa ae rietata ae kamaiura, korakorara, ara tia raoi, ngaia raoi boton ara onimaki.
N taai aika tamaaroa ao aika buaakaka ao ti Uringnga, ao E mena ikekei ni boutokaira ao ni kakukureira.
Ngaia raoi oin bukin ara taromauri. Ngaia Natin te Atua ae maiu, ana Moan Nati te Tama, ti te Rikitemanna n te rabwata. E kautaki “mai buakoia maate, … te moa n uaa i buakoia aika matu” (1 I-Korinto 15:20). Boni Ngaia te Uea ae na manga oki kaua bwa e na tautaeka iaon te aba iaoia Ana aomata (tara D&C 76:63; taraa naba Mika 4:7; Te Kaotioti 11:15)
Akea ae kakannato ae a tia n nakonako iaon te aonaaba. Akea naba ae a tia ni karaoa te anga karea ae iai kabootauana ke n anga te kakabwaia ae iai kabootauana. Ngaia bon te Tia Kamaiu ao te tia Kabooi Maiuia kaain aonaaba. I koaua Irouna. I katanoataa Arona mairoun te Atua n akea te nanououa ke te booraraoi. I tangiria. I taekina aran Iesu Kristo ma te karinerine ao te kamiimi. Ngaia bon ara Kiing, ara Uea, ara Mwaatita, te Kristo ae maiu, ae tei n angaatain Tamana. E maiu! E maiu, e onrake n te kakukurei ao te tamaaroa, te Nati te mwaane ae maiu ae Natin te Atua ae maiu.