I Ataia Bwa E Maiu Au Tia Kabooira
N au moan ririki n te Brigham Young University—Idaho (imwiina bon Ricks College), e roko tangiraia au utu. Ma imwiin tabeua namwakaina n reirei, I a tiku n rau ma te maiu n te kuura n reirei ao n rangi ni kukurei. Ngke e a roko te tareboon, I bon mena inanon au auti, bwa I kamatebwai.
“Christy, iai te rongorongo nakoim ae rangi ni kananokawaki,” e taku tinau, e ruru bwanaana. “E a motirawa tamam n te tairiki aei man te aoraki ae kakaiaki ae te toki ni buro.”
I waekoa n rootaki n te namakin ae rawaawata ngke I kataia ni iangoia bwa tera ae I a tibwa tia n ongo. I a tibwa tia n noora tamau tabeua te bong i mwaaina, ma bon akea au iango ae ngaia ai bon te kabanea n tai. Maten tamau bon te bwai ae katounako nakon ara utu; ao bon te kakubanako naba nakoia kaain au uoote ni mweengau. Ai bon tibwa 53 ana ririki Tamau, ao e bon beku bwa ara bitiobi.
Boong ake imwiina a bon kanoaki ma taian kakaawari ao taian tareboon mai rouia utu, raao, kaain te uoote, ao kaain rarikira. Ti namakinna bwa a mwaiti aomata aika kaota aia tangira nakoira. N tain taunimatean Tamau, a tibwauai aia ururing kaain ara utu iaon maiura ma ngaia, ao ti kakoaua te babaire ni kamaiu ao te maiu imwiin te mate.
E a tia n riki tamau bwa te kainnaba ae kakaonimaki, te Aomata ae Itiaki ae korakora ana tangira, e iriira ana waaki te Tikauti, ao te tama ae tamaroa. A mwaiti aomata aika kakabwaiaki ibukin maiuna are e a tia ni maiuakinna. Imwiin te taunimate ao tariu ae te ikawai e katabua te ruanimate, ao ti bane n tei bwa te utu n tang rinanon “Ngai Natin te Atua” (Anene n Taromauri ma Aia Anene Ataei, iteraniba 54).
Te bong are imwiin te taunimate ao I a okira te reirei. I aki bati n rangi ni kukurei n okira te reirei, ma I ataia bwa I riai ni waaki nako ma te maiu ao ni kakoroi bukin mwiokoau. Tabeua boong a beebete riki nakon ake tabeua. I kabanea au tai ni iangoa aron tamau, ao I onimakina au ataibwai n te baire ni kamaiu ao au onimaki iroun Iesu Kristo bwa e na buokai ni kaaitarai kataakiu nako ma taian titiraki.
Tao uoua te wiiki imwiin maten tamau, I uota au boki n tau rongorongo nakon te umwantabu n te tabo n reirei ao I korei au namakin ao bwaai ake a riki n tain maten Tamau. Ngke I koroboki, I namakina te Tamnei ae rangi ni korakora ao I namakina kakoauaana bwa Tamau are i Karawa e tangirai, bwa iai Ana baire ae rangi n onoti ibukiu, ao N na bon aki manga tiku ni maroa. Ngke e a bane au koroboki, a tang beeron te anene n taromauri ma aia anene ataei man tibikan aia tienta ataein te reirei ae e katanga “I Ataia E Maiu Au Tia Kamaiu” (Anene n Taromauri ma Aia Anene Ataei, iteraniba 136). A waekoa n roko n au iango taeka man te anene n taromauri ma aia anene ataei:
I ataia E maiu Iesu.
Ai kakukureira aio!
E maiu are mate ngkoa.
E maiu irarikiu n taai nako….
He lives to silence all my fears.
He lives to wipe away my tears.
He lives to calm my troubled heart.
He lives all blessings to impart.
I ataia bwa e maiu au Tia Kabooi Maiura, ao I ataia bwa E tangirai. Ibukina bwa e uti man te mate, ao I ataia bwa tamau ao aomata ni kabane ake ti tangiriia ake a tia n rimoara a na manga bane ni maiu. Bon te karaunano ataakin taian koaua aikai.