Neboana Rinanon Anene n Taromauri

I rangi ni kan anene n aron Titita Schneider. I rangi ni kan katanga te biano n aron te Tari Menendezi. Iraua te tai ae ti ongo ke ni iangoi bwaai aikai? N tabetai ao ti taku bwa te tarena n te katangitang bon te bwaintangira ae okoro ae e reke tii irouia tabemwaang, te tarena ae ti mataiakinna ma ti taku bwa akea iroura.

N ana Ekaretia Iesu Kristo Ibukiia Aika Itiaki Ni Boong Aika Kaitira, te katangitang ao te anene bon ibukiia aomata ni kabane. Ti kona n anga ara kakaitau ao ara nebonebo, n reiakinan manga kaokan ana euangkerio te Tia Kamaiu, n uringa Ana Mwakuri ni Kamaiu, ao n anga nanora ni Iriiria.

Anga te Kakaitau ao te Nebonebo

Ngke e kaotinakoaki Iteraera ngkoa mai Aikubita, “ao Mote ma tibun Iteraera a anenea te anene aei nakon Iehova” (Te Otinako 15:1). Ngke a rinanon taari Iaretaite, “a bon anene n nebonebo nakon te Uea” (Ita 6:9). Ao ngke a katabua te Kirtland Tembora Aika Itiaki Ni Boong Aika Kaitira ngkoa, a anenea ana anene n taromauri ae boou William W. Phelps are “Tamnein te Atua Ai Aron te Ai Inanora.”¹Ni katoa koron bongin te euangkerio, a tabeki bwanaia natin te Atua n Neboia ma te katangitang.

A mwaiti man ara anene n taromauri ni boong aikai aika a tibwaua tamnein te kakukurei aei ma te nebonebo. N aron te katooto, te anene n taromauri teuana ae tatangiraki ae mairoun William W. Phelps e katanoata:

Te tia kamaiuia Iteraera
Mairouna kakabwaiara, 
E raoniira e kairi kawaira, 
N te bong
Ao te ngaina,
Ara Uea, Kukureira, Kainnanora!2

A kona n anga naba bwana anene n taromauri nakon ara kakaitau ibukin kakabwaia aika onoti, n aron ae kaotaki n te kibu ae ataaki aei:

Ti Karabwako te Atua, ibukin am burabeti
Ae kairira ni boong aikai.
Ao ibukin am euangkerio
Ti kaitauko N am kakabwaia, 
Aika ko a tia n anganira. 
Ti kukurei n toro ibukim, 
Ti kan ongeaba iroum.3

Ngkana ti anenei anene n taromauri aikai, ti ira te tua bwa ngkana ti kimwareirei, ti riai n neboa te Uea ma te anene, ma te katangitang, ma te mwaie ao ma te tataro n nebonebo ao ni karabwarabwa (tara D&C 136:28)

Reiakina Ana Euangkerio

Ni ikotaki ma kaotan te kakaitau ao te nebonebo, anene n taromauri a anganiira naba tibwangara n reiakina Ana Euangkerio Iesu Kristo. N aron te katooto, aia anene n taromauri ataei ae kinaaki aei e kabwarabwara irekerekera ma Tamara are I Karawa ae rangi n tamaroa ma ni beebete.

Ngai natin te Atua,
E kanakomaiai,
E anganai abau mweengau
Ngai ma tamau tinau.4

Anene n taromauri ake tabeua a kaota nakoira aron ae ko na kanga ni maiuakini moan tuua n te euangkerio, n aron te anene n taromauri ae tatangira aei, ae koreaki n aia tai bwaeoniia:

Waaki ngkami, aika kam Raoiroi;
tai rawa ni beku.
E boni matoa te mwananga,
Buokam te Uea. 
Ti na beku korakora
Bwa ti aonga n tokanikai;
Ao ti na kangai ma nanora—
A raraoi! ni bane!5

Tabeua mai buakon ara anene n taromauri aika a mamate nanora iai a reireiniira bwa ti na iriira ana toro Kristo, Ana burabeti aika rineaki n ara bong. N aron te katooto, “Neboa Teuare,” e buokira n uringa kakaawakin ana beku te Burabeti Iotebwa Timiti ni Manga Kaokan te euangkerio:

Neboa teuare taetae ma Iehova!

E kabiraki bwa te burabeti.

E kaoti aroni bong aika kaitira,

Uea neboia ma botanaomata.⁶

Ni iangoan raoi anene n taromauri aikai ao ake tabeua riki ma kamatebwaian bwaai aika a na taraaki ni koroboki aika tabu ake a karinanaki inanon booki n anene n taromauri a kona ni buokira n reiakina te euangkerio ao n uringa te Tia Kamaiu ni maiura ni katoa bong.

Uringa Ana Mwakuri ni Kamaiu

Teuana mai buakon kawai aika moan te kakaawaki ae ti na uringa iai te Tia Kamaiu bon tauakin te toa ni katoa wiiki. N te aro ae ti na katauraoira ibukin te waaki ae tabu aei, ti anenea te anene n taromauri. Anenen te taromauri n toa e kauringa aron marakin Kristo ao tera nanona iroura:

Ongo maten te Tia Kamaiu,
E kakoroa te tua
Matena boon ara bure, …
Bwa tina kamaiuaki. 7

E wawanako rarana;
E anga mauina,
Bwa bon te karea n raoi,
E kabwarai bure.8

I uringa wawanakon rarana ibukiu.
Tera arou tao N na mwaninga te tangira;
I aki, N na neboia ngaainako n au tataro,
N na neboia ngkana i roko irouna i karawa.9

Ngkana e aneneaki ma te tataro mwaaka ao te iango mwaaka, a na buokiira taekan anenen te taromauri n toa ni kaatua ara iango i aon te Tia Kamaiu. A katauraoira bwa ti na anaa te toa ma nanora ni koaua ao ti na manga anga nanora bwa ti na katoka aran Kristo i aora, bwa ti na Uringnga n taai nako, ao ni kaawakin Ana tua.

Berita bwa ko na Iriira Iesu Kristo

Te berita ibukin iriirakin te Tia Kamaiu e kaotaki n ara anene n taromauri aika mwaiti. Ngkana ti anenei anene n taromauri aikai, ti kakoaua nakon Tamara ae i Karawa bwa ti tangiria ni kan iriira Natina. N aron te katooto, iangoi taeka aikai:

Ti Karabwako n te Atua ngkai
Ko kaota nakoira te kawai.
Mwengara irarikina ieta!
Tina nakonako n te ota.10

Te anene n taromauri ae “N na Nako n are Ko bon Tuangai” bon ti tebo ae katanoata:

I bon onimaki e na kairai,
I ataia e tangirai,
N na kakaonimaki nakon te beku:
N na karaoa are nanom.11

Ara anene—tao te nebonebo, te kakaitau, te ataibwai, te kauring, ke te berita—a bon kakukurei nakon te Uea. E taku te Uea bwa E kimwareirei n te anene ae nako man te nano, ao bwa ana anene ane e raoiroi bon te tataro Nakoina, ao a na bon kakabwaiaki ibukina (tara D&C 25:12).

Ma te kakukurei, bwa e aki kangai te Uea, “Tii anene aika tamaroa aika bon te tataro nakoiu,” ke, “N na tii kakauongo nakon aike a tangiraoi katangitangiia.” N ara katangitang n aron are ni maiura, E rangi n tabe riki ma aron nanora nakon ara konabwai.

Tao tera nako rinanin ara konabwai, ti kona ngaira ni kabane ni iri buakon waaki ni katangitang man anenean taian anene n taromauri. Ao ngkai ti anene ma nanora ni kabane, ti nako nakon Kristo rinanon taian anene n taromauri.