I a Kamaiuaki?
E titirakinai raoraou ae Rachel ngkana I kan iria n taromauri. E bon kakaonimaki n ana aro, ao I kan noora kaokoron ana aro ma au aro. I bubutia au karo aia kariaia bwa N na nako ma neiei. A taku bwa kioina bwa e aki aitara tain ana taromauri ma ngaira, ao I kona n nako.
A mwaiti bwaai aika boou irou n aron waakin ana taromauri: taian anene ao taromauri a bon kaokoro. Ngke e kabutaki te raurau ibukin te karea, I aki ataia bwa tera ae N na karaoia.
N tokina, e tuatua te tia kabwarabwara nakoia kaain te kurubu bwa a na waerake nako moa naake a tuai butimwaea Iesu Kristo i matan te botanaomata bwa ana Tia Kamaiu teuanne ke neienne. E wirikiriki Rachel, ni kaungaai bwa N na nako. I waeremwe teutana. N ara uoote e tuai tuanga temanna ara bitiobi bwa e na waerake nako moa ni butimwaea Kristo i matan te botanaomata. I aki ataia bwa tera ae N na karaoia. Tao iai te bwai ae I tuai ni karaoi ae kakaawaki ibukin kamaiuakiu. I kitana te bootaki ma te aki oota.
Imwiina ngke I iangoa te bwai are I rinanona, I a tibwa ataia bwa I a tia ni butimwaea Iesu Kristo bwa au Tia Kamaiu i matan te botanaomata. I a tia ni bwabetitoaki iroun temanna ae iai te kariaia n te nakoanibonga irouna mairoun Iesu Kristo. Au bwabetito bon te berita ae tabu ma Tamara are i Karawa bwa N na katoka iaou aran Iesu Kristo ao N na riki bwa te tia iriiria. I berita bwa N na kawakin Ana tua ao N na kataia n riki n ai arona. A ira au bwabetito kaain te nakoanibonga ake a tei bwa taan kakoaua, ni ikotaki ma au utu ao kaain te uoote.
Man te tai are I bwabetitoaki ao ni kamatoaki iai, e a tia n reke au tai n taua te toa ni katoa Taabati ao ni kakoaua nakon Tamau are i Karawa bwa N na reitinako ni katoka aran Kristo iaou.
N tabetai Kiritian man ekaretia tabeua a kona n titiraki te titiraki are e taekinna ana tia kabwarabwara raoraou, e ti kaokoro taekinana. A kona n titiraki ngkana ti a tia ni kamaiuaki. Unimwaane Dallin H. Oaks, kaain Aia Kooram Abotoro ake Tengaun ma Uoman, e a tia ni buokiira bwa ti na ota ao ni kona ni kaeka te titiraki aio: “N tabetai aomata aika Kiritian e kaokoro nanon taekan te euangkerio irouia n ai aron kamaiuaki ke kamaiuakia. Ngkana ti kaeka ni kaineti nakon are e iangoia ara tia titiraki ngkana e titiraki bwa ti a tia ni ‘kamaiuaki,’ ara kaeka bon ‘eng.’”1
I reitanako karikirakean au koaua iroun Iesu Kristo ngke I ira ana aro ra oraou. Man te tai arei ao I kunea bwa ngkana I kabatia kamatebwaian booki aika tabu ao aia taeka burabeti aika maiu, N na bon tauraoi riki ao ni kona n tei bwa te tia kakoaua ibukin te Atua n taai nako (tara Motiaea 18:9).