Mwakurin te Mwakuri ni Kamaiu
I ataia bwa iai ana baire te Uea ibukin natiu te mwaane, ma ngke e rinea te kawai ae I aki tangiria bwa e na rineia, I aki ataia bwa e na kanga n oki.
I kaaina Ana Ekaretia Iesu Kristo ibukia Aika Itiaki ni Boong Aika Kaitira n te 1992 n te Netherlands. E ngae n anne, buu e aki kaaina ao e aki kariaia natira, Alex ao Petra, bwa a na bwabetitoaki (a bitaki aara). E ngae anne, ngaira teniman ti nanako n taromauri ao ti kakaraoa bootakin ara utu n te tairiki n taai nako.
A bane n nako raoi bwaai inanon ririki aika bati ni karokoa e taekinna Alex, 13 ana ririki, bwa e nang aki manga taromauri ke n ira bootakin ara utu n te tairiki. Ngke e a ikawai riki, ao a tabe n rikirake buakakan bwaai. E a moanna ni kangaanga bwa N na tiku irarikin Alex tiaki ti ibukina bwa e a moi manging ao e moko, ma e kewe ibukin aroarona. I rangi n nanokaawaki, ao a mwaiti au tai n tang ao a mwaiti au tataro ni bubutia Tamara are i Karawa bwa e na buoka natiu te mwaane.
N te tairiki teuana ngke I tekatekau n rau n te tembora, I nora te tamnei n au iango. Bon tamnein te teinimwaane ae kabuta te toa. Aiaron ae E kauringai te Uea ibukin koauan ao mwaakan Ana Mwakuri ni Kamaiu, ni kaungaai bwa N na tangira natiu te mwaane ao n tiku i rarikina.
E ngae n anne, e bon waaki nako te tai, ao e bon rikirake ni kangaanga maiura. E rangi n rawawata nanon Alex, imwiin au buuraure ma tamana. I ataia bwa e kainnanoa buokana, ma e aki tangira au ibuobuoki ao e rawa n ongo ngkana I kataia n taetae nakoina.
N te tairiki teuana ao e tuangai ara beretitenti n te mwaanga ngkana e kona n taetae ma Alex. E aki kukurei Alex ma e kariaia bwa e na marooro. Imwiin ana marooro Alex ao e bon un iroun te beretitenti n te mwaanga ibukina bwa e kaungaa bwa e na mitinare, ma n taku, “Ngkana arona bwa bon ana aomata te Atua te beretitenti n te mwaanga, e na riai n ataia bwa e naaki taekinna nakoiu bwa N na mitinare. E na ataia bwa I aki tau n nako—ao e aera ngkai e katabetabeai?” N te tairiki arei ao I ataia bwa iai Ana baire te Uea.
E moana teina te baire n te anga ae aki kantaningaaki ngke e roko te tareboon man te o ni bureitiman. E katikaki Alex. Ngai ma kaainabau ae boou ti karini ara kooti ao ti nako n anaa Alex man te o ni bureitiman ngke e nukanibong. Ti aki takuia; ni koauana ngai ma taman Alex ae te kauaei ti aki bati ni kaekaeka.
Ngke ti roko ni mweengara, ao Alex e karakina te bwai are e riki ngke ngaia ma raoraona a kimoa te rebwerebwere ae uarereke (scooter). E rangi n nanokaawaki n te bwai ae tia ni karaoia. Bon au moan tai n noora te ataeinimwaane ae rootaki n te nanokaawaki.
E riki katikan Alex bwa te bitaki nakon maiuna ngke e a moanna n ata mwiin te mwakuri are e karaoia ao te kawai are e tabe n toua ni maiuna. Man te bong arei, ao a mwaiti kakabwaia aika reke iroura.
N te bong are imwiina ao e tuangira Alex bwa e butia te bureitiman bwa e na tarebonira ibukina bwa e ataia bwa ti tangiria. E ataia naba bwa e a tia ni kamarakira, ao e kaitau ngke ti aki un.
A mwaiti kaain te Ekaretia aika raoraona ake a buokia. Temanna e kaoa nakon ana waaki ni kakukurei te Ekaretia. Temanna e anganna Ana Booki Moomon ao e kaewenakoa bwa e na warekia. E ngae ngke iai ana kangaanga ni wareware Alex, ma I kunea bwa e aki toki ni wawarekia.
Te kakabwaia are imwiina—I aki kona ni wareki mwaitin kakabwaia—bon ngke e tuatua Alex bwa N na kaboa ana kooti ma a na kawaerake mwarairai bwa e a tia ni baireia bwa e tangiria n iri n taromauri. I taku bwa ti ibukin te Kiritimati. Ma I bon rangi ni miimi, bwa e reitinako ni iriiri imwiin banen te motirawa.
Te kakabwaia are i mwiina e tara n rangi ni kangaanga ataakina raoi irou. E taekinna Alex bwa e nang bwabetitoaki. E aki kainnanoa au ibuobuoki ao e bon biriakini bwaai i bon ibukina ma raoraona ao mitinare ake a reireinna. I bon miimi ngke e a roko te bong arei, ao I a noora natiu ni bwai mainaina, ni karaoi ana berita aika tabu.
Imwiina ngke e karakina aron rairakina, I ataia bwa e korakora marakin ao nanokaawakin Alex, ma a bon buokia naba bwa e na nanorinano ni kona ni katorobubua ni bubuti buokana. E kabwarabwara Alex: “N te tairiki teuana ngke I rootaki n rawawatan uotau, I uringi ana taeka temanna raoraou ae tamaroa are e tia ni kauringai bwa I kona ni tataro ibukin buokau n taainako. N te tairiki arei ao kataia i bon irou. Akea riki au anga, ao kioina bwa e tia tinau n reireinai bwa N na kanga n tataro, I katorobubua ao I kamatui matau. Ngke I moana au bubuti ibukin buokau, I rootaki n te namakin ae tamaroa. I aki kona ni mwaninga te namakin arei; I namakina ana tangira Kristo ae itiaki. I namakinna bwa a anaaki au kangaanga mai irou. E tuai ni manga roko namakinan te tabeaianga, ao I a tia ni kakabwaiaki ma te kakoaua ibukin Iesu Kristo. E a bitaki nanou, ao I tangiria ni iriira Iesu Kristo.”
Imwiin ana bwabetito, kamatoakina, ao katabuana nakon te nakoanibonga, e tuangaki Alex bwa e na kabuta te toa—kanikina aika tabu ibukin ana anganano te Tia Kamaiu. Te bwai are I nooria n te tembora n ririki aika bwakanako a koro bukia ao I bon kakoaua iai. I karabwa Tamara are i Karawa i nanou ibukin te bwai are I rinanona. Bon te tai ae tabu irou.
Te bwai are riki e kona n riki bwa kamotan au karaki ae kakukurei, ma te kakukurei bwa e bon aki toki ikai. I a tia n noora te Mwakuri ni Kamaiu n reitinako mwakurina inanon maiun natiu te mwaane. Ko uringa ana taeka ara beretitenti n te mwaanga ae kairaki iroun te Tamnei? Ana koaua natiu te mwaane e tabe n rikirake, ao ana kakao ara beretitenti n te mwaanga e bon koro bukina. E a tibwa bane ana mwakuri ni mitinare Alex. E kabanea uoua te ririki n arora baina ni buokia tabeman—ngke E arora baina ni ibuobuoki te Uea nakoina.
I kakaitau ngkai I riki bwa tinan Alex, ma I rangi ni kakaitau riki ibukin Ana Mwakuri ni Kamaiu Iesu Kristo are mwakuri i nanon maiura ni kabane.