“NGKAMI KAM TAKU BWA ANTAI NGAI?”

E titirakinia Ana reirei te Tia Kamaiu te titiraki aio, ao e kaeka Betero, “Bon te Kristo Ngkoe, are Natin te Atua ae maiu” (tara Mataio 16:15–16). Aei aron aia kaeka rooro ake tebwi tabun aia ririki ao kairake ni kabuta te aonaaba nakon te titiraki naba aei:

E mwaiti ae a tia ni karaoia Iesu Kristo ibukiu. E a tia n anganai au utu ao te euangkerio. E a tia ni buokai inanon au kamatebwai. I a tia ni karekei tabeua buokau n au reirei, ao I kakoaua bwa aikai bon taian kakabwaia mai Irouna. Ngke arona bwa E bon aki roko ni kaota arora are ti na kamaiuaki iai, ti na bon aki kona n oki nakon Tamara are i Karawa.

Bryan N., 13, Honduras

I ataia bwa n rinanon korakain te Tia Kamaiu ni maraki, ni mate, ao n Ana Mwakuri ni Kamaiu, ti bon kona ni mangauti ao ti kona ni kabooaki n te maiu n tamnei ao n rabwata. Ibukin te onimaki ao te rairannano, I a tia n reiakinna bwa a kona ni kabwaraaki ara bure nako.

Joan O., 19, Philippines

N te tai ake ngkoa iai te mwaane ao a tia n nakonako iaon te aba, te mwaane are ana mwakuri ao ana taeka e a tia n rooti maiuia mirion—ni ikotaki ma maiu. Ae bon Iesu Kristo. Ana karea ni kamaiu e reitinako ni katoa bong n roota maiu. Ai kamimira ataakin ae rinanon ikoakina, a na kona ni katokaki ikoakira. Ibukina bwa I ataia bwa Iesu bon te Kristo, I a katauraoi ni mwakuri ni mitinare ae bwanin taina ao ni kabuta Ana euangkerio nakoia aomata n te aonaaba ake a tuai n namakina Ana tangira ae aki totoki. Bon ngaia te Tia Kamaiu ao te Tia Kabooa tamneiu.

Kristian M., 24, Croatia

E a tia Iesu Kristo ni karaoa te mwakuri ibukira ae akea temanna ae kona ni karaoia. Ibukiu, ao karekean te Nakoanibonga ae te Aaron bon te tai ae kakukurei ibukina bwa I ataia bwa anne ae bon tangiria te Uea bwa n na karaoia. I bon ira Ana katooto. I ataia bwa E na reitinako ni kairai ao n reireinai te kawai.

Limhi G., 17, Mexico

Imwin maten tinau, e a moanna n tara n rangi n rawawata aron te maiu. N tokina I a nakon au bitiobi ibukin taeka n reirei. Te bwai are e tuangai bon tiaki ae kantaningaia, ma e bita maiu. E tuangai bwa n na onimakina Tamau are i Karawa n tataro, ni warekan booki aika tabu, ao n onimakinna bwa e na bon mena ikekei te Tia Kamaiu ibukiu—n onimakinna ni koaua n te aro ae n na namakina rawawatau bwa a kabebeteaki. Uoua ao te iterana te ririki imwina, I ataia bwa iai te rau ae teimatoa n reke nakoira ni kabane ibukina bwa antai ara Tia Kamaiu ao ibukin te bwai are E a tia ni karaoia ibukira.

Whitney W., 19, Arizona, USA

I ataia bwa e maiu Iesu Kristo. E bon tangirai, ao E anga maiuna ibukiu. Bon Ngaia raraou. Man Ana reirei aika mwaiti, I reiakina aron irakin maiuna. E bon raoiroi, akoi, kororaoi, ao ibuobuoki. E korakai ni maraki i Ketetemane ibukira ni kabane. I ataia bwa bon te Kristo ae Maiu, au Tia Kamaiu, au Bwaa, ao au Uea.

Claudia R., 25, Mexico

N ikawairake inanon te Ekaretia ao n iriira te Moanrinan, I a tia n reiakina taekan Iesu Kristo man te tai are I uarereke. Ao au koaua e a tia n rikirake ni matoatoa man te tai anne. Ngkai I a bon mwakuri ni mitinare, I tangira reken au tai n tibwaua te euangkerio ao ni kakoaua ibukin Iesu Kristo ni katoa bong.

Ngkai I iangoa te Tia Kamaiu ao bwaai ni kabane ake E a tia ni karaoi ibukiu, I tangiria ni kaaniai ma Ngaia. I bon rinanoi man kauring bwaai ake I a tia n reiakin man ngke te ataei ngkai. I tangiria ni buokia tabeman aomata n namakina ana tangira ara Tia Kamaiu Iesu Kristo. Te koaua ae bon ti aki te bwai ae I ti taekinna—ma e bon nako mai nanou.

Susana V., 21, Tonga