Te Kristo ae Maiu

Aia Kakoaua Abotoro n Ana Ekaretia Iesu Kristo ibukiia Aika Itiaki ni Boong Aika Kaitira

“Te Kristo ae Maiu: Aia Koaua Abotoro, “bonginaki Tianuare 1, 2000, e tiainaaki iroun te Moan Beretitentii ao Kooram n te Tengaun ma Uoman. E boretiaki n te Riaona Eberi 2000.

Ni kauringaan bungiakin Iesu Kristo uoua te nga te ririki n nako, ti a bon anga ara koaua ibukin koauan maiuna ae akea kabotauana ma raoiroin Ana mwakuri ni kamaiu ae akea tokina. Bon akea temanna ae a tia ni korakora riki mwaakana n rotiia aomata ni kabane ake a tia ni maiu ma ake a na manga maiu riki rimwi iaon te aba.

Bon Iehova ngaia ngkoa ae korakora are n te O Tetemanti, te Meetia n te Nu Tetemanti. Boni ngaia te tia karika aonaaba, iaan ana kaeieti Tamana. “A bane ni karikaki bwaai Irouna; ao ngke tao akea Ngaia ao e aki karikaki te bwai teuana ae karikaki” (Ioane 1:3). E bwabetitoaki ni kakoroa bukin te raoiroi ni kabane, e ngae ngke akea ana bure. E “nakonako ni karaoa ae raoiroi” (Mwakuri 10:38), e ngae ngke e kakeaaki bonganana iai. Ana euangkerio bon rongorongon te rau ao te akoi. E on’oniia aomata nako bwa a na toua Arona. E nakonako ni kawain Baretain ni kamaiua aoraki, ni kanorabaia aika mataki, ao ni kautiia maate. E reirei koaua mai karawa, koauan maiura imwaain rokora nako aon te aba, oin maiura iaon te aba, ao baika a na kona ni karekei natin te Atua aika mwaane ao aine n te maiu ae na roko.

E moana karaoan te toa bwa kauringaan Ana karea ni kamaiu ae kakannato. E kabureaki ao e kabuakakaaki ni bukinana aika a kaairua, e bukinaki ni bure bwa aonga n toki nanoia taan iowawa, ao e motikaki taekana bwa e na mate iaon kaibangakin Korokota. E anga maiuna ni kamaiuia aomata ni kabane man aia bure iai. Bon te bwaintutuaraoi ae kakannato Ngaia ibukiia aomata ni kabane aika a maeka iaon te aba.

Ti kaotioti ma nanora bwa Maiuna, ae moan te kakaawaki n rongorongoia botanaomata ni kabane, e aki moanaki i Betereem ao n toki i Korokota. Boni ngaia ana Moan Nati te Mwaane te Tama ae te Rikitemanna n te iriko, te Tia Kabooa aonaaba.

E uti man te mate n “riki bwa te moan ua ibuakoia aika matu” (1-Korinto 15:20). N utina man te mate ngke te Uea ngaia, e kawariia aomata ake e tatangiriia inanon maiuna. E beku naba ibuakoia Ana “tiibu ake tabemwaang” (Ioane 10:16) ake i America ngkoa. Ao n te aonaaba ni boong aikai, E kaoti ma Tamana nakon te ataeinimwane ae Iotebwa Timiti, ni kauka “te tai ae kororaoi bongina” are e a kaman tataekinaki n te berita (I-Ebeto1:10).

Ni kaineti ma te Kristo ae Maiu, e korea ae kangai te Burabeti ae Iotebwa bwa Matana ai aron uran te ai; iran atuuna e mainaina n ai aron te tino ae takaebuebu; e raneanea moana iaon raneanean taai; ao bwanana kaanga ai aron tangin raanga n ran aika korakora, boni bwanaan Iehova, ae kangai bwa

Boni Ngai te moa ao te kabane; boni Ngai are e maiu, boni Ngai are e tiringaki; boni Ngai ami tia tei nakon te Tama (tara D&C 110:3–4).

E taekinna naba ae kangai te burabeti Ibukina bwa ngkai imwin koaua aika bati ake a tia n taekinaki ibukina, aio te koaua, ni kabaneana, are ti anga ibukina: Bwa E maiu te Tia Kamaiu!

Bwa e nooria te Burabeti i angatain te Atua ao ti ongo te bwanaa ae tataekina rongorongona bwa bon ti Ngaia Ana Rikitemanna te Tama—

Bwa mai Irouna, ao n Rinanona, ao Irouna, are a karikaki iai aonaaba ngkoa ao ngkai, ao kaaia ni kabane bon natin te Atua aika mwaane ao aine (tara D&C 76:22–24).

Ti katanoata ma te koaua bwa Ana nakoanibonga ao Ana Ekaretia a bon tia ni kaokaki nako aon te aba—ni “kateaki iaon aana aika … abotoro ao burabeti, ao Iesu Kristo boni ngaia atiibun te maninganinga ae moan te kakannato” (I-Ebeto2:20).

Ti anga ara kaotioti bwa n te bong teuana E na manga oki nako aon te aba. “Ao e na kaotaki mimitongin te Uea, ao a na bane n noria aomata nako” (Itaia 40:5). E na tautaeka bwa aia Kiing Kiing ao e na uea bwa aia Uea Uea, ao a na katorobubua bubuaniwae ni kabane ao a na bane n taetae neewe n taromauri i Matana. Ti na bane n tei i Matana bwa a na motikaki taekara irouna ni kaineti ma ara mwakuri ao baike a bane nanora iai.

Ti anga te koaua, ngaira ana Abotoro ni koaua ake ti a tia ni katabuaki – bwa Iesu bon te Kristo ae Maiu, Natin te Atua ae maiu n aki toki. Boni ngaia te Kiing ae Emanuera ae kakannato, ae e tei n te bong aei i angatain Tamana. Boni ngaia otan, maiun, ao ana kantaninga te aonaaba. Kawaina bon te kawai ae kaineti nakon te kukurei n te maiu aei ao te maiu ae na roko. E na katituaraoaki te Atua ibukin Ana bwaintutuaraoi ae akea kabotauana, Natina te Mwaane ae Tabu.