O mai e Faalogo i le Siufofoga o se Perofeta
O Se Savali mo Misti
Mai se saunoaga o le konafesi aoao ia Aperila 2007.
I le taimi o le savali na ou tuuina atu i le konafesi aoao ia Oketopa 1975, na musuia au e faatatau lau savali i se teineitiiti laitiiti lauulu enaena vaivai uumi, o le sa saofai i le polotito o le Tapeneko. Na ou tata’iina atu mafaufau o tagata ia te ia ma ou lagonaina ai na manaomia e lenei teineitiiti laitiiti le savali na ou mafaufauina.
I le faaiuga o le sauniga, na ou toe foi atu ai i lo’u ofisa ma iloa ai o loo faatalitali mai ia te au se teineitiiti e igoa ia Misti White, ma matua o se tasi o ona matua faapea se tamaitai o lona aiga. A o ou feiloai atu ia i latou, na ou iloaina o Misti o le teineitiiti lea sa i luma i le polotito lea na faatatau atu i ai lau tautalaga.
Na ou iloaina a o latalata mai le aso fanau e atoa i ai lona valu tausaga, na i ai o ia i se tulaga faapopoleina pe tatau ona papatiso pe leai. Na ia lagona lona fia papatiso, faapena foi i ona matua matutua, lea sa nofo ai, na mananao ina ia papatiso o ia, ae o lona tina sa le toaga i le ekalesia, na fautuaina e faatali seia 18 ona tausaga ona faia lea o lena filifiliga. Na tau atu e Misti i ona matua matutua, “Afai tatou te o i le konafesi, atonu o le a faailoa mai e le Tama Faalelagi ia te au le mea e tatau ona ou faia.”
A o faaauau la matou feiloaiga ina ua uma le sauniga, na faapea mai le tinamatua o Misti ia te au, “Ou te manatu o loo i ai se mea e fia tau atu e Misti ia te oe.” Na faapea mai lenei teineitiiti lelei, “Brother Monson, a o e lauga i le konafesi, na e taliina la’u fesili. Ua ou manao ou te papatiso!”
Na toe foi atu le aiga i Kalefonia, ma sa papatisoina ma faamauina Misti e avea ma se tagata O Le Ekalesia a Iesu Keriso o le Au Paia o Aso e Gata Ai.