O Le Faataitaiga a Peresitene Grant
“Vasega, faamolemole pasi mai a outou pepa i le pito i luma.” Na aapa atu Heidi i ona tua e aumai le pepa a Moli. E ese lona fiafia e matamata i le tusitusi manaia a Moli ae na te lei pasiina atu i luma. Na foliga mai na sasao lelei ana mataitusi. Na tilotilo ane Heidi i lana lava pepa ma na matamuli nei iloa e se isi lana tusitusi lē lelei. Na ia tuu lana pepa i lalo o le pepa a Moli ma pasi atu loa i luma.
“Tina, e mafai ona e tusia lau meaaoga mo au?” o le fesili lea a Heidi a o savali atu o ia i le faitotoa. E ese foi le manaia o le tusitusi a lona tina. Masalo, a tusi e lona tina lana meaaoga, atonu o le a le maasiasi tele o ia.
“Aisea ua e manao ai ou te tusia lau meaaoga? Ua gaui ou lima?” na taufaalili atu ai lona tina.
Na faamatala atu e Heidi i lona tina e uiga i le manaia o le tusitusi a Moli. “Maimau pe a na ou faataitaia soo lau tusitusi i le tausaga ua tea.” Na saofai ifo Heidi i le laulau ma too ai lona auvae.
“E te iloa Heidi,” na fai atu ai lona tina, “afai e te galue malosi i ai, e mafai lava ona lelei lau tusitusi e pei o isi foi tagata. Ae ia tuu atoa i ai lou mafaufau.”
Sa le mautonu Heidi. Sa vaai atu faalemafaufau o ia i le tusitusi a Moli ma faapea ane, e le taitai lava pei la’u tusitusi o le tusitusi a Moli.
“E te manatua le perofeta o Heber J. Grant?” na fesili atu ai Tina.
Na ea ae i luga Heidi. “Ioe. Sa matou aoao e uiga ia te ia i le Peraimeri.”
“Sa leaga lava lana tusitusi a o laitiiti. Sa manao lava o ia ina ia faaleleia atili, o lea sa ia faataitai ma faataitai ai pea seia oo ina matuai lelei lava lana tusitusi, o lea na maua ai lona faailoga mo le lelei o le tusitusi.”
Na ofo Heidi! Na vaai maualuga o ia i perofea, ae na te lei iloaina lava na i ai ni o latou faafitauli e pei o ia a o laiti i latou. Na tonu ai ia te ia, afai e mafai ona galue Heber J. Grant e faaleleia lana tusitusi, na te mafaia foi la.
O le aso na sosoo ai i le aoga, sa galue malosi ai lava Heidi i lana tusitusi. O le taimi muamua na faigata. Sa ala umi o ia e faauma ana meaaoga tusitusi, ae na faaosofia o ia i le tala ia Peresitene Heber J. Grant ina ia faaauau pea.
Na leva ni vaiaso faatoa amata ona matauina e Heidi se alualu i luma. Na umi lava se taimi na fai ai ana meaaoga, ae na faasolosolo lelei lana tusitusi.
I se tasi aso na matauina ai e Moli. “Heidi, e ese le manaia o lau tusitusi,” na fai mai ai o ia.
“Faafetai.” Na mu foliga o Heidi [i le matamuli]. Sa le mafai ona taofiofia se ataata i ona foliga.
O lena po na tuu ai e Heidi se tusi i luga o le pusaaisa mo lona tina. Na tusia i se tusitusi matagofie lava.