Ua Faasilasila mai Malumalu mo Arisona

Na faasilasila mai e Peresitene Thomas S. Monson i le aso 10 o Aperila, 2008, ia fuafuaga ina ia fausia ni malumalu fou se lua i Arisona, i le Iunaite Setete, o se tasi o malumalu o le a fausia i le aai o Gilbert ma le isi i le Vanu o Gila. O le faasilasilaga o malumalu e lua o le laasaga muamua lea ua faia e Peresitene Monson talu ona avea ma Peresitene o le Ekalesia.

Sa valaaulia e le Au Peresitene Sili ia tagata o le Ekalesia o e mananao e tuuina atu ni foai tau tupe faapitoa i le fausiaina o malumalu uma e lua ina ia faia lea i le tusiaina i luga o le laina o le “malumalu” po o le “Isi” i a latou lisiti o foai ma faamaoti mai ai po o le fea malumalu latou te mananao e foai i ai nai lo le faaaogaina o le laina lautele o le “Fausiaina o Malumalu.”

O le malumalu i Gilbert o le a aoga e tuuitiitia ai le tele naua o le manaoga o loo i ai i le Malumalu o Mesa Arisona, e iva maila (14 km) le mamao ese, lea na uluai faapaiaina i le 1927 ma toe faapaiaina i le 1975.

O le malumalu o le Vanu o Gila o le a fausiaina e latalata i nuu o Thatcher ma Safford. O le malumalu i lenei itu o le a faamama avega i tagata o le Ekalesia mai faigamalaga e 300-maila (483-km) e o atu ma toe taliu mai ai ina ia auai i le malumalu o Mesa.

Na saunoa taitai o le Ekalesia e faapea o le fausiaina o malumalu fou o le a tumau pea ona tasi pe lua tausaga ona faatoa faatinoina lea. O loo i ai foi se isi malumalu o Arisona i Snowflake.