I TALAFOU

Ua Tuu Avanoa le FamilySearch i Fitafita, ma Seila a Peretania

Ua auaufaatasi le FamilySearch ma se saite o talafaasolopito a le Malo Tele o Peretania e tuuina atu se avanoa e sao atu ai i faamaumauga o fitafita ma seila ua maliliu a Peretania e tau atu i tua i le seneturi sefuluvalu.

Na maua e le Findmypast.com ma le FamilySearch ia laisene e tuu faakomepiuta ai ia faamaumauga o fitafita ua litaea na maua faamanuiaga mai le Penisione i Chelsea mai le 1760 e oo i le 1914. O se isi galuega o le a maua ai le avanoa i faamaumauga o seila faatauoloa a Peretania mai le 1835 e oo i le 1941. O le tele o faamaumauga o le seneturi luasefulu o le a aofia ai ata pue o seila ma faamatalaga auiliili o folauga a le neivi.

Ua Fesoasoani Taiala i Suesuega o Talafaasolopito o Aiga

Ua faaopoopoina e le FamilySearch.org ia Egelani ma Sikotilani i lana aotelega i le Initoneti o taiala saili gafa o le Sailia Faamaumauga o Ou Tuaa. O nei tusi e leai se totogi pe a kopiina mai le initoneti o loo faamalamalama mai ai laasaga taitasi o le gasologa o le sailiga ma e aofia ai Uepi saite taua, o manatu mo sailiga, ma faamatalaga i le auala e saili ma faaaoga ai isi faamaumauga a le Ekalesia.

O tusi lesona o se vaega o se faasologa lea e aofia ai taiala o Tenimaka, Finelani, Iselani, Italia, Mekisiko, Nouei, ma Suetena. O nei taiala o loo maua nei i le faaPeretania, sei vagana ai le taiala Mekisiko lea o loo maua foi i le faaSipaniolo. O loo i ai foi se taiala mo i latou o loo sailia tuaa Aferika-Amerika. E mafai ona sao atu i taiala ma isi fesoasoaniga i le FamilySearch.org. Kiliki le ki o le Search, sosoo ai ma le Research Helps.

Ua Mafai Nei Ona Kopiina le Talai La’u Talalelei i Luga o le Initoneti

O le tusi lesona o le Talai La’u Talalelei lea e faaaogaina e tagata o le Ekalesia ma faifeautalai i le lalolagi atoa ua mafai nei ona maimoaina i luga o le initoneti pe kopiina foi i le faiga o le PDF i gagana e 42. O loo maua foi se puega o le leo i le faaPeretania i luga o le MP3. Ina ia kopiina ia faila, asiasi i le GospelLibrary.lds.org ma filifili le Talai La’u Talalelei mai le faasino autu o le “Shortcuts” o loo i le itu taumatau. O loo maua foi faila a le Ekalesia mo leo i le www.lds.org/ mp3/newarchive.

Ua Maua Tusi Lesona a Iosefa Samita i le MP3

O le tusi lesona o Aoaoga a Peresitene o le Ekalesia: Iosefa Samita o loo maua nei mo le kopiina i le faiga o le MP3 i gagana e 11. O loo maua faila i le faaKenitonisia, faaPeretania, faaFarani, faaSiamani, faaItalia, faaSapani, faaKorea, faaManetarini, faaPotukale, faaRusia, ma le faaSipaniolo. E mafai ona sao atu i nei faila o leo i le www.lds.org/ mp3/newarchive po o le kiliki i luga o le Listen i tusiga o mataupu taitasi o loo maua i le LDS.org Gospel Library.