Savali a Faiaoga Asiasi

Ua Aoao Mai e le Talalelei a Iesu Keriso le Faamoemoega e Faavavau o le Fanau a le Atua

Ia aoao atu mau ma upusii e talafeagai ma manaoga o uso o loo e asia. Molimau atu e uiga i le aoaoga faavae. Ia valaaulia i latou o loo e aoaoina e faasoa atu o latou lagona ma mea ua aoaoina.

O Le A Lo’u Taunuuga e Faavavau?

Elder Russell M. Nelson o le Korama a Aposetolo e Toasefululua: “O taui sili o se tamaitai o le a oo mai a o ia tulai atu e faataunuu lona faasinomaga o se afafine faamaoni o le Atua. I le Au Paia faamaoni uma ua Ia folafolaina mai i ai nofoalii, malo, itumalo, mamalu, tino ola pea, ma ola e faavavau. (Tagai Roma 2:7; MFF 75:5; 128:12, 23; 132:19.) O le faamoemoega lena mo tamaitai O Le Ekalesia a Iesu Keriso o le Au Paia o Aso e Gata Ai. E faaeaina, e faavavau, ma e paia” (“Woman—Of Infinite Worth,” Ensign, Nov. 1989, 22).

Julie B. Beck, peresitene aoao a le Aualofa: “Maimau pe ana tofu teineiti ma tamaitai uma ma se molimau e uiga i lona malosiaga faatina e faavavau… . E lei amataina le matafaioi a tamaitai i le lalolagi, ma e le muta ai foi iinei. O se tamaitai na te faatauaina le tulaga faatina i le fogaeleele o le a ia faatauaina foi le tulaga faatina i le lalolagi a sau, ma ‘o le mea e i ai [ana]oa, e i ai foi [lona] loto’ (Mataio 6:21). O le atiina ae o se fatu faatina e saunia ai teine ma tamaitai mo lana misiona paia e faavavau, o le tulaga faatina” (“O Se ‘Fatu Faatina,’” Liahona, Me 2004, 76).

O Le A Se Mea e Mafai Ona Fesoasoani Ia te Au E Ausia Ai Ou Taunuuga e Faavavau?

Elder M. Russell Ballard o le Korama a Aposetolo e Toasefululua: “E faailoa mai e le Atua lona alofa ia i tatou e ala i le tuuina mai o le taitaiga tatou te moomia e alualu ai i luma ma ausia ai o tatou taunuuga po o faamoemoega… . O Le na te silafia mea e tele e uiga ia i tatou, ma mea tatou te gafatia faavavau, ua [Ia] tuuina mai ia i tatou fautuaga faalelagi ma poloaiga i ana tusi lesona o aoaoga—o tusitusiga paia” (“God’s Love for His Children,” Ensign, Me 1988, 59).

Peresitene Henry B. Eyring, Fesoasoani Muamua i le Au Peresitene Sili: “O le faamoemoega o foafoaga a le Atua ma Lona tuuina mai ia i tatou o le ola, ina ia mafai ona tatou maua le aafiaga o le aoaoina lea e tatau mo lo tatou toe foi atu ia te Ia i le ola e faavavau. Ma na pau le ala e mafai ai lena tulaga pe afai ua suia o tatou uiga e ala i le faatuatua i le Alii o Iesu Keriso, salamo faamaoni, ma le osia ma tausia feagaiga ua Ia ofoina mai mo le fanau uma a Lona Tama e ala i Lana Ekalesia” (“Education for Real Life,” Ensign, Oke. 2002, 16).

Peresitene Ioane Teila (1808–87): “O lo tatou faamoemoega autu lava o le ola faavavau ma le faaeaga; o lo tatou faamoemoega autu o le saunia lea o i tatou lava, o a tatou fanau ma o tatou augatuaa mo nofoalii, o malo ma itumalo sili i lalolagi o le faavavau … ; ina … ia saunia ai i tatou ma i latou, pe a uma ona faataunuuina le faamoemoega o lo tatou foafoaga i le lalolagi, ina ia tuufaatasia ai ma atamai o i ai i le lalolagi o le faavavau; ia toe ulu atu ai i le afioaga o lo tatou Tama, lea na tatou o mai ai, ma auai i le faatinoina o na mataupu faavae faavavau o le upumoni, lea e le iloa lava e le tagata se mea e uiga i ai, e aunoa ma faaaliga. Ua tatou i ai iinei mo lena faamoemoega; … ua tatou fausia malumalu mo lena faamoemoega; ua tatou maua faaeega paia mo lena faamoemoega” (Aoaoga a Peresitene o le Ekalesia: Ioane Teila [Kosi aoaoina a le Perisitua Mekisateko ma le Aualofa, 2001], 8–9).

MFF 78:18: “Ia fiafia pea, aua o le a ou taitaiina outou. O le malo e o outou lava ma faamanuiaga o i ai e o outou ia, o oa foi o le faavavau e a outou ia.”