Na Faamanuiaina Au e Pese o le Peraimeri
Ou te lei faamoemoe e aoga ia te au lou valaauga o se taitai musika. Ae o lenei ua faigata ona ou mafaufau i se auala e lei aoga ai ia te au.
“E toe 24 ona itula o loo totoe e ola ai, ma e tusa foi pe ola o ia, o le a pe [atoa lona tino] mai i ona mata e oo i vae, ae leai se avanoa e toe foi ai i se lelei.” O le faaiuga lena ua leai se faamoemoe lea na faaalia mai e fomai i lou aiga ia Mati 2004. I le na o le 30 o ou tausaga, na ou pagatia ai i le pe o le tino lea na le mafai ai ona ou tautala pe minoi. Ae i na itula pogisa ma le tuua toatasi, o aafiaga mai lo’u valaauga na i ai muamua o se taitai musika i le Peraimeri na aumaia ia te au le faamoemoe.
Sa ou fiafia lava i musika ma lagonaina le malosi i upu o viiga. Ae a o lei oo ina pe lou tino, ina ua valaauina au e avea ma taitai musika o le Peraimeri, sa matuai ou popole lava. E faapefea ona ou faia se eseesega i olaga o tamaiti? O ou tomai i le faamusika na aoaoina ai au ina ia faatutu ni sini i au aoaoga, o lea na ou filifili ai e faataitai ona fesoasoani i tamaiti ia lagona le Agaga a o matou pepese. Pe a matou usuina pese e pei o le “Sa Ou Nofo i le Lagi,”1 Sa ou maofa lava i le malosi o le mafuta mai o le Agaga Paia i totonu o le potu, ma fesili loloto ma le anoa a tamaiti e uiga i upu.
O se tasi o au metotia o le aoao atu o le faaaogaina lea o le Gagana Faailoga a Amerika (ASL). Na ou iloa ai na sili atu le malamalama o tamaiti i pese pe a matou talanoaina le faaalia e faailoga o se faatusa vaaia o upu. E ese lou fiafia e faalogologo i tamaiti pe a pepese ma matamata ao latou faia faailoga o le “O Loo Ou Taumafai e Avea e Pei o Iesu.”2 E tata pea lava pea le savali i lou loto, ma sa masani ona ou lagonaina o au le tagata na fesoasoani i ai le Agaga lea na valaaulia e tamaiti. Na ou lagonaina le tuputupu ae o lau molimau, ma na ou lagonaina moni le faamanuiaina o au e le Alii.
A e sa le faatapulaaina faamanuiaga o lou valaauga o se taitai musika a le Peraimeri i le potu Peraimeri. Na o mai faatasi ma le valaauga le tatau ona faataitai ma tata le musika i le fale, ina ia ou saunia lelei i Aso Sa taitasi. O le taunuuga, na faateleina ai foi le fiafia o lau lava fanau i musika o le Peraimeri. O upu o nei pese na aumaia ai le toafilemu, agaga toafimalie, ma faamafanafanaina ai le ma fanau pe a latou mafatia ma faamoemoe ai i latou i po taitasi. Na viga lava i latou e faalogologo i le CD o le Tusipese a Tamaiti i totonu o le taavale—e tusa lava pe na o se tietiega puupuu—ma na amata ai foi ona latou taulotoina le tele o pese.
Ae peitai, ana ou le maua lava i le ma’i o le pe o le tino ou te le iloa aafiaga ogaoga o musika i lo’u olaga. O le tele o ou aafiaga lata mai nei i le usuina o pese o le Peraimeri, na ou iloaina ai o pese nei o loo uunaia au i le taimi o ou tofotofoga. I ou taimi sili ona faigata, ou te tatalo ai ma ou pese “O Le Tatalo a se Tamaitiiti”4 i lo’u mafaufau. A o ou tagi atu e pei o le tamaitiiti i le fuaiupu muamua, “Le Tama e, o e i ai iina?” E tali mai o Ia ma le alofa e ala i le faamautinoaina mai ia te au e faapea, e le o tuua na o au ma sa i ai o Ia iina, e pei ona taua e le fuaiupu e lua o le pese. Oka se faamalosiauga ma se faamautinoaga!
I le faagasologa o le toe manuia mai le ma’i, na oo mai ai lou toalua ma lau fanau i lou potu i le falemai e fai a matou afiafi faaleaiga ma e masani lava ona usuina ai le pese “O Loo Tautalagia Iinei le Alofa.”5 O le pese mulimuli lava lena na ou aoaoina i le Peraimeri, ma sa manaia tele le faalogoina o pepese ai lau fanau, ma le iloa sa ou totoina na fatu. A o latou pepese, sa mafai ona ou faatatau [au lava] i le tina o loo i le pese, na tatalo i ona tulivae (maimau e, pe a na mafai ona ou tootuli!). O ana olega i le Tama Faalelagi o au olega foi ia. Sa ou tau atu foi le agaga faafetai mo le perisitua i totonu o lou aiga. E ui ina sa le mafai ona ou faaleoina nei mafaufauga i lou aiga, ae na faaleoina e le pese o le Peraimeri nei lagona mo au.
Ua toeitiiti atoa le fa tausaga talu ona ou pagatia i le pe o le tino, ma ua mafai ona ou toe maua nisi gafatia se tele nai lo le mea na faamoemoeina e fomai e mafai ona ou faia. E le tele se gaoioi o lou lima taumatau, lea e mafai ai ona ou tata i lau komepiuta ma faaaoga se nofoa faataavalevale e alu i le uila. O loo ou faaaogaina se ituaiga gagana ua faafouina o le ASL—lea na ou aoaoina muamua lava i lou tofiga o le Peraimeri—e talanoa ai. Ona o lenei gagana faailoga, o loo mafai lava ona ou “peseina” pese o le Peraimeri faatasi ma lau fanau ma faailoa atu ou lagona i lou aiga ma uo.
A o lei pe lou tino, sa ou fuafuaina lava ou te pese i papatisoga a lau fanau. Ia Aokuso 2005 na papatisoina ai lau ulumatua o Zach. Sa mafai ona ou faaaogaina lou lima taumatau e tata tautoai ai [le piano] i le pese “Pe a Ou Papatiso”6 a o taofiofi au e lou toalua i luga o le nofoa o le piano. Na manaia le lagona o le faailoaina atu o ou lagona loloto e uiga i le papatisoga e ala i musika ma i se auala e mafai ona malamalama i ai Zach.
Ina ua amata ona ou auauna atu o se taitai musika o le Peraimeri, na leai sou manatu o le a aoga le valaauga ia te au. Ae ua manino lava lona aoga! O pese o le Peraimeri ua faamanuiaina ai au i se malamalamaaga sili atu e uiga i mataupu faavae o le talalelei, o se molimau malosi atu, o le gafatia ona fesootai ma lou aiga, ma le malosiaga e onosai ai. Atonu e faatauvaa lava upu ma le fati o pese o le Peraimeri, ae o le savali ma le malosi o ia pese taitasi o loo manino lava.
Atonu e le o taimi uma tatou te malamalama ai pe aisea ua tuuina mai ai e le Alii se tofiga faapitoa. Ae ui i lea, e tatau lava ona tatou faalagolago i le Alii ma tuu atu lo tatou faatuatua ia te Ia ma Ana musumusuga. Ou te matuai faafetai lava ona sa avea au ma taitai musika o le Peraimeri ae lei pe lou tino! O pese ua le mafai nei ona ou toe usuina o loo mafai lava ona fesootai atu ai ou lagona e uiga i le talalelei i isi. O taimi uma lava ou te faalogo ai o pepese lau fanau i pese o le Peraimeri, ou te iloa o loo faamalolosia a latou molimau ma e tutusa o matou alolofa i le Alii ma Lana talalelei.