Puipuia o Tupe a le Aiga e ala i le Aloese mai Faiga Taufaasese

Saunia e Karianne Salisbury, Mekasini a le Ekalesia

Manatu o le Faatonu: Ia Fepuari o le 2008 na tuuina atu ai e le Au Peresitene Sili se tusi i tagata o le Ekalesia e lapataia ai i latou i le aafia ai i teugatupe faaagaga taufaasese. O le tusiga lenei o loo auiliiliina ai nisi o lapataiga e faatatau i faailoilo masani o faiga taufaasese.

I le avea ai ma se talavou ua faauu mai le kolisi, e lei tele se iloa o Marshall Romney i le teuina o ni tupe faaagaga ina ua fiafia o ia i le maketi tau tupe. Ina ua uma ona talanoa i ana paaga faigaluega o e o loo mauaina se polofiti e ala i teugatupe faaagaga i auro ma siliva, sa fuafua loa Brother Romney o se teuga tupe faaagaga lea mo ia. Sa ia faatau mai se taga tupe, ma fuafua e teu ia tupe siliva i le kamupani na ia faatauina mai ai, ma sa ia faatauina mulimuli ane nisi taga siliva e ala i se nonogatupe mai le faletupe.

Ae paga lea, na le toe alu i luga le tau o tupe siliva ae ua faasolosolo i lalo. E le gata i le nofo aitalafu, na iloa mulimuli ane foi e Brother Romney ua le toe i ai le kamupani lea sa teu faaagaga ai ana tupe. Sa latou faalotovaivaia a latou tagata faatau i le faatauina atu lea i ai o ni taga auro e leai ni auro o i ai, lea sa latou ofo atu latou te teuina malu i lo latou faleteuoloa. Sa avea Brother Romney ma se tasi na aafia i faiga taufaasese.

E pei o le toatele na faamanuiaina mai faiga o teuga tupe faaagaga, sa tausisi lava lenei kamupani i le mea sa matuai tele le polofiti sa maua ai i lea taimi. Ae sa le gata ai iina faiga a le au taufaasese.

O Brother Romney, o loo avea nei ma se polofesa i le Iunivesite o Polika Iaga, faatasi ai ma se sailiiliga e faapitoa lava i faiga taufaasese, na saunoa e faapea o faiga taufaasese ua matuai faateteleina lava le taatele ma ua avea ma se popolega e tulai mai pea mo le toatele o tagata, e aofia ai ma tagata o le Ekalesia.

“O faiga taufaasese i tupe faaagaga i aso nei e oo mai i soo se ituaiga faiga, ae e tele uiga e tali tutusa ai lea e tatau ona oso ai le masalomia,” o lana saunoaga lea.

E ui o nisi teuga tupe faaagaga e i ai ni tulaga maaleale, ae o faiga ua fuafua e faaseseina ai o le a masani ona faaalia mai ai se lagona o le faatatope, e tuu mai ai ma se polofiti e mautinoa e laitiiti sona tulaga maaleale, po o le faatauanau mai foi e ala lea i le faailoa mai o ni tagata e masani lelei i ai.

Lagona o le Faanatinati

O se avanoa e moomia ai le vave ona tali atu e masani lava o se faailoga manino lea o le taufaasese. O se tasi o loo taumafai e faatau atu se avanoa e mafai ona taumafai e faatauanau e ala lea i le faapea atu o se avanoa e le lau maua pe na o se aofaiga lava e mafai ona auai, ae o le moomia ona faia o se faaiuga vave o lona uiga e laitiiti pe leai se taimi e mafaufau ai e uiga i le tautinoga po o le siakiina o le talaaga o le teuga tupe faaagaga.

Na faamamafa mai e Elder M. Russell Ballard o le Korama a Aposetolo e Toasefululua i se lauga o le konafesi aoao i le 1987, le taua o le iloiloina faaeteete o faaiuga tau tupe.

“E leai ni ala ‘alo i le saogalemu i mea tau tupe,” na saunoa ai Elder Ballard. “Aua e te faatuatuaina le tuuina atu o au tupe i isi e aunoa ma le faia o se iloiloga auiliili o soo se teugatupe faaagaga ua fuafuaina. Ua tele naua tupe a o tatou tagata ua leiloloa i le faatuatuaina lea o isi tagata i a tatou aseta. I la’u faaiuga, o le a tatou le mauaina lava se paleni i o tatou olaga seiloga ua matuai saogalemu lelei le puleaina o a tatou tupe” (“Keeping Life’s Demands in Balance,” Ensign, Me 1987, 13).

O le a taumafai tagata tau faasese e faatupuina se lagona o le faanatinati ina ia uunaia ai tagata e teu tupe faaagaga ina ia vave faia se faaiuga a o lei faamautuina le tele o popolega ma atugaluga. E taua tele le faaalu o le taimi e mafaufau lelei ai i vaega taitasi o le faaiuga. O se teuga tupe faaagaga taua o le a umi se taimi e i ai ina ia lava ai le taimi e moomia e mafaufau loloto i ai i vaega e filifili mai ai.

Polofiti Faamaoniaina, Laitiiti se Tulaga Maaleale

O ai e mafai ona teenaina se avanoa mo teuga tupe faaagaga e leai ni tulaga maaleale ae mautinoa se polofiti? E foliga mai ua matuai lelei lava e mafai ai ona le moni, e tusa ai ma le saunoaga a Brian Sudweeks, o se polofesa lagolago o mea tau tupe i le Iunivesite o Polika Iaga, e matuai lelei lava.

“E leai se tasi e mafai ona folafola maia se tulaga maualuga faifaipea o se polofiti e maua mai ai, ma e leai ni faiga ‘e vave mauoa ai’ e aoga i se faiga faifaipea,” na saunoa ai Uso Sudweeks. “O le faamautinoa mai o ni polofiti maualuluga e le mautinoa lava ma e le maualuluga foi.” Ae o i latou e faalauiloaina mai o le a masani ona aumaia ni manatu faapena, e faatosina ai i le manao ia vaai i se polofiti e vave ona maua.

Ua uunaia e Uso Sudweeks ia tagata e ono faia ni teuga tupe faaagaga ina ia faaaogaina ni mataupu faavae taua se lua i soo se faaiuga o teuga tupe faaagaga.

“Muamua, ia iloa po o le a le mea lena o le a e faaalu i ai au tupe ae o ai foi e faaalu i ai,” na ia saunoa ai. “Lua, ia teu au tupe faaagaga ia na o tagata taitoatasi po o faalapotopotoga e maualuga le lelei.”

E masani lava o se fuafuaga faapea e faaauau pea ona faagaoioia ona e le o iloa e tagata o loo teuina faaagaga a latou tupe le mea o loo latou faaaluina i ai a latou tupe, ae na o le pau le mea o loo latou vaai i ai o se polofiti. A o tuuina atu e tagata fou o loo teuina a latou tupe faaagaga a latou tupe, o na tupe o le a totogiina ai tagata sa teuina faaagaga muamua a latou tupe, ma fatuina ai se fetuunaiga o tupe e le muta seia oo atu ai lava i le faatoilaloina.

Na faamalamalamaina e Elder Joseph B. Wirthlin o le Korama a Aposetolo e Toasefululua i se lauga o le konafesi aoao i le 2004 e faapea o nisi taimi e maua ai tagata i lagona o le faaloloto po o le manatu faapito lea e mafai ona tau atu ai i ni faiga le atamai ma faavalevalea o mea tau tupe.

“Uso e ma tuafafine, aua le matapeapea,” na ia saunoa ai. “O se tasi lea o mafatiaga o nei aso e gata ai. Ua mafua ai le faaloloto ma le feitagai. E masani ona oo atu ai i le pologa, loto tiga, ma aitalafu lofituina, ma le mamafatu” (“Aitalafu Faalelalolagi, Aitalafu Faalelagi,” Liahona, Me 2004, 40).

Tagata e Masani I ai e Faailoaina Atu

O le toatele o tagata taitoatasi e matele lava i le auai i se avanoa mo teuga tupe faaagaga pe afai latou te iloa o lo latou uso, faiaoga o aiga, tuaoi, po o se paaga faigaluega o loo auai ai foi. O le a masani ona faaaoga e tagata e faalauiloaina ia nei faataitaiga e faatosina ma fausia ai se tulaga o le faatuatuaina. E ui lava e mafai pe le mafai foi ona faamaonia o loo aofia ai nei uo ma e masani, ae le mafai e tagata o loo teuina faaagaga a latou tupe ona tali atu i lenei tulaga faaosofia o faatosinaga a uo.

“O le toatele o tagata e le malamalama i mataupu faavae tonu o teuga tupe faaagaga ma e le mananao e faaalu le taimi e suesueina ai ma sailiilia se mea,” na saunoa ai Brother Romney. “Nai lo le faia o se sailiiliga, ae ua latou faalagolago i le mea moni faapea o loo i ai se tasi sa suesueina. Latou te faalogo loa i igoa o tagata latou te iloaina, e otometi lava ona latou taumateina ua uma ona faia le suesuega.”

Faatasi ai ma le anoano o faiga tau faasese e faapena foi le anoanoai o ituaiga tagata taufaasese. E ui o faaupuga taufaaoleole po o le taufaasese e mafai ona oo mai ai i le mafaufau se ituaiga vaaiga masani, e leai ni uiga faatulagaina o se tasi e faalauiloaina mai ni teuga tupe faaagaga taufaasese. O le mea moni, e mafai ona avea i latou o ni tagata e te masani ai mai le galuega po o le lotu, tagata o le aiga, po o ni uo mamae, ma e le mafai foi ona latou iloa le loloto o le mea o loo latou aafia ai.

“Fesili ifo ia te oe lava pe o e naunau lava i ai ona e te masani i se tasi o loo aafia ai,” na saunoa ai Brother Romney. “Afai o le tulaga lea, atonu e ao ona e toe faatali teisi lava ma sei toe tagatagai totoa lava i le teuga tupe. E leai se afaina po o le a le faatuatuaina e i ai le faapogai, o tagata e ono avea ma tagata teu tupe faaagaga, e le tatau ona faia se faaiuga e faavae patino lava i fautuaga a isi.”

Aloese mai le Faaseseina

A o faatupulaia le taatele o teugatupe faaagaga taufaasese, ua ofoina mai e taitai o le Ekalesia le fautuaga ina ia aloese ai mai teugatupe faaagaga e leai se faautautaga, ma aloese mai le aitalafu.

“Matou te toe uunaia foi tagata ina ia aloese mai le faia o aitalafu e le tatau ai, ina ia faautauta lelei i a latou matafaioi tau tupe o loo latou taulimaina, ia faaputuputu sina tupe e tua i ai i faalavelave faafuasei,” na saunoa i ai Peresitene Gordon B. Hinckley (1910–2008) i se saunoaga o le konafesi aoao i le 2003. “Matou te lapatai atu i o tatou tagata ina ia aloese mai faiga ia e folafola mai ai le ‘mauoa i se taimi vave’ ma isi fuafuaga lavelave ia e toetoe lava e maileia ai i taimi uma i latou e faavalea gofie” (“O Le Tulaga o le Ekalesia,” Liahona, Me 2003, 6).

Ia Fepuari 2008 na tuuina mai ai e le Au Peresitene Sili se tusi i taitai aoao ma le lotoifale i le Iunaite Setete ma Kanata o loo i ai se savali ina ia faautauta i le puleaina o mataupu tau tupe. Sa latou faailoa mai le popolega e uiga i tagata taitoatasi o e e mafai ona faaaogaina ia sootaga o le faatuatuaina e faalauiloa ai ni faiga maaleale ma faasoa atu ai ni mataupu faavae logomalie o mea tau tupe ina ia puleaina ai le tulaga maaleale: “Muamua, aloese mai aitalafu e le talafeagai, aemaise lava i aitalafu o faatauga; lona lua, ao lei teuina ni tupe faaagaga, saili se fautuaga mai se faufautua agavaa ma ua laiseneina mo mea tau tupe; lona tolu, ia atamai.”

O punaoa e suesueina ai tulaga faavae o mea tau tupe a le aiga o loo maua lea i le Uepi saite a le Ekalesia i le ProvidentLiving.org. O loo vaaia ai i lea saite se lesona o mea tau tupe, o faamatalaga i lauga mai taitai o le Ekalesia, o mea e faaaoga i lesona, ma le sao atu i punaoa faaopoopo o mea e faaaogaina.