Faamalosia le Faatuatua a o E Sailia le Poto

SAUNIA E Elder Quentin L. Cook

O Le Korama a Aposetolo e Toasefululua

Mai se faigalotu a le Iunivesite o Polika Iaga–Idaho na faia i le aso 14 o Mati, 2006.

O aoaoga faavae a le Ekalesia, e le faapea ai ua le tutusa le faatuatua ma le sailiga o le poto; e tutusa lava ma e fesootai lelei foi. A ou talanoa e uiga i le faatuatua, o loo ou talanoa e uiga i le faatuatua i le Alii o Iesu Keriso.

O le faatuatua ma le poto e manaomia ai ni taumafaiga ma ni tautinoga tutusa. E le mafai ona tatou faamoemoe e maua le faatuatua i le ogatotonu o o tatou olaga pe afai e faaalu uma a tatou taumafaiga i le poto, taaloga, mea e fiafia i ai, ma le sailiga o tupe, po o isi taumafaiga.

Sei ou faasoa atu ia te outou ni mataupu faavae se lima ou te talitonu e taua a o e tuuina le faatuatua i le Alii o Iesu Keriso i le totonugalemu o o outou olaga a o outou saili ma le filiga mo le poto.

1. Ia malamalama e moni lava e i ai le faafeagai o mea uma. E taua tele filifiliga e te faia.

Ua e i ai i se tulaga o le olaga lea ua matuai tele ia vaega e filifili ai mo nisi o faaiuga e sili ona taua o le a e faia. O nei filifiliga o ki ia i lou lumanai ma lou fiafia.

Na aoao mai le perofeta o Liae ina ua lata ina iu lona soifua, “Aua e ao lava ina i ai le faafeagai o mea uma” (2 Nifae 2:11).

Na faaauau lana saunoaga mulimuli ane: “O lea, ua saoloto ai tagata i la le tino, ma ua foaiina mai ia te i latou mea uma e tatau i tagata. Ua saoloto foi i latou e filifili le saolotoga ma le ola faavavau talu le Puluvaga sili o tagata uma, pe filifili le faatoilaloina ma le oti, e tusa ma le faatoilaloina ma le mana o le tiapolo, aua na te saili ina ia malaia tagata uma e pei o ia lava” (2 Nifae 2:27).

Ua tatou iloa na faia se taua i le lagi ona o le ata o le faaolataga, o lea la, e le o se mea e tei ai i le matuai ogaoga o le ofosaia o mataupu faavae faalelotu na aoaoina i lenei tisipenisione mulimuli.

Na fofogaina e Peresitene Gordon B. Hinckley (1910–2008) le folafolaga lenei ia te outou: “O lea ua outou i ai nei i le amataga o outou olaga faatagata matutua. Ua outou popole … i aoga. Ua outou popole e uiga i le faaipoipo. Ua outou popole i mea e tele. Ou te folafola atu ia te outou, o le a le tuulafoaiina lava outou e le Atua pe afai o le a outou savavali i Ona ala e taitaiina e Ana poloaiga.”¹

2. Ia faamalosia lau lava molimau o se faavae mo filifiliga uma e te faia.

O le faavae o faaiuga taua uma ma filifiliga o le a e faia o lau molimau lea ia Iesu Keriso ma le Toefuataiga o Lana talalelei e ala i le Perofeta o Iosefa Samita. O le Tusi a Mamona o se elemene taua o lena molimau.

Ina ua 15 ou tausaga, sa ou iloaina ai le taua o le i ai o se molimau i le Tusi a Mamona, Iosefa Samita, ma le Faaola ma le ala e aafia ai a tatou filifiliga.

O lou uso o, Joe, sa 20 tausaga lona matua. O le vaitaimi lea o le taua i Korea, ma sa na o le toatasi lava le alii talavou mai uarota taitasi e mafai ona alu e faamisiona. O isi e faatali mo le valaaulia i le fitafita. Na alu se alii talavou mai le matou uarota i lana misiona i le amataga o le tausaga; o le aso fanau o lou uso o Setema, ma na ia manatu ai e na te le maua se avanoa e faamisiona ai.

Na aami atu e le peresitene o le matou siteki ia lou uso ma ta’u ane ia te ia, e i ai se tasi o uarota e lei faaaogaina la latou vaega tupe ma atonu o le a mafai ona alu o ia e faamisiona. Sa valaauina faifeautalai i na aso i le tai 20 o o latou tausaga, ma na faatoa uma lava ona faatumu le tusi talosaga a lo’u uso i le aoga faafomai. O ia o se tagata e lelei i le aoga. O lou tama, o le sa le malosi i le Ekalesia, sa ia faia ni tapenaga i tulaga tautupe e fesoasoani ai i [lo’u uso] i le aoga faafomai ma sa le fiafia lou tama ina ua ia iloaina le talanoaga a lou uso ma le peresitene o le siteki. Na fautuaina e lou tama ia Joe e aua le alu ma sa ia fai atu i ai e tele atu mea lelei e mafai ona ia faia pe a alu i le aoga faafomai.

Na avea lenei mataupu ma se mataupu ogaoga i lo matou aiga. O lena po sa ma talanoa ai ma lou uso e uiga i le filifiliga. O ia sa lima tausaga e matua ai ia te au, ma na tele lava ni ona manatu. A o ma iloiloina le mataupu, sa tonu ai ia i maua e faapea: Afai o Iesu Keriso o se tagata maoae ae le faavavau, afai o Iosefa Samita o se faiaoga lelei ae le o se perofeta, pe afai foi na i ai i le Tusi a Mamona ni fautuaga matagofie ae e le o se afioga a le Atua, o lona uiga la e sa’o Tama—e sili ai le alu i le aoga faafomai. Ae afai e faavavau Iesu Keriso, afai o Iosefa Samita o se perofeta, ma afai o le Tusi a Mamona o le afioga a le Atua, o lona uiga e sili atu le taua o le talia o le valaau e talai atu le talalelei.

O lena po, o le taimi muamua lea nai lo se isi lava taimi na i ai muamua, sa ou fia iloa ai tali i nei fesili. Sa ou talitonu lava i le paia o Iesu Keriso. Sa ou talitonu ia Iosefa Samita ma le Tusi a Mamona, ae sa ou manao i se faamautinoaga mai le Alii. O lena po, a o ou tatalo, na molimau mai le Agaga i lou loto e uiga i le Faaola ma le moni o le Tusi a Mamona ma o Iosefa Samita o se perofeta. Na maua foi e lou uso lea lava molimau e tasi ma faia ai le filifiliga e auauna atu i se misiona. O le mea e lelei ai, ina ua foi mai le misiona a lou uso, sa alu o ia i le aoga faafomai. Ina ua atoa lou 20 tausaga, sa fiafia lava lou tama e vaai mai ia te au ua ou auauna i se misiona.

3. Saili le poto ma le filifiliga, ma le atamai ma le lotomaualalo.

I le sailiga mo le faatuatua ma le poto, e ao ai ona faatumauina le lotomaualalo. Na aoao mai Iakopo:

“E, o le togafiti poto a le ua leaga! E, o le faamaualuga, ma le vaivai, ma le valea o tagata! Pe a aoaoina i latou ua latou faapea ua popoto i latou, ua latou le faalogologo i le faatonuga a le Atua, aua ua latou tuu ese ai, ua manatu i latou ua iloa e i latou lava… .

“A e peitai, e lelei ona ia aoaoina afai latou te faalogologo i faatonuga a le Atua” (2 Nifae 9:28–29).

O le tasi mafuaaga e ao ai ona faamaualalo e uiga i le poto ona o le tele lava o le poto e au ina suia. E pei ona ou fai atu, o lou uso o Joe, o se fomai. O lenei ua 70 ma ona tupu lona matua, ae ua faaono ona ia toe sueina le suega e toe faamaonia ai i lana matata e atamai ai. Na faatalasua lava lona faailoaina mai ia te au e faapea, e tutusa lava fesili e pei o fesili na tuuina mai i le 35 tausaga ua mavae, ae e faaauau lava ona sui ia tali. I le suega i le 35 tausaga ua mavae, o se suega masani o le filifili le tali sao atonu na faapea: O le a le pogai autu o le pala o le totoga o le laualo? O le tali atonu e fesootai i le tele o mea e mamafa i le mafaufau. O aso nei, o le tali i le fesili lava lea atonu o le, e mafua ona o siama e mafai ona nonofo ma ola i musele o le manava. Pe a outou tagai la i ai, e lei suia lava ia fesili, ae o le tele lava o tali ua suia. E moni lenei mau i le tele o matata o le atamai.

O le faataitaiga lenei e le o faamoemoeina ina ia tuuitiitia ai lou tautino i le poto; e taua tele le poto. E taua le poto i itu uma lava. Ua faapitoa ona tatou laki i le ola ai i se vaitaimi ua televave ai le atiina ae faatekinolosi.

O le poto na taua lava i vaitaimi uma, ma o aso nei ua tatou i ai i faitotoa o tekinolosi maoae fou ma mananaia. E mautinoa lava o nei suiga iloga i tekinolosi e mafai ona i ai se aoga tele lava mo le Ekalesia faapea foi ma mo ou uso a tagata. O le poto, e tusa lava pe ua leva pe fou, e taua pea lava.

4. Mulimuli i fautuaga a perofeta a o faia au filifiliga.

I se aoaoga mo taitai i le lalolagi atoa, na saunoa ai Peresitene Hinckley:

“E le tau tauina atu ia te outou o loo tatou ola i se vaitau sili ona faigata i le talafaasolopito o le lalolagi. Ua pau maualalo tulaga faatonuina i soo se mea. Ua leai se mea o toe foliga mai e paia.

“… Ou te le iloa pe sa sili atu ona leaga le taimi o Sotoma ma Komoro… . Ou te manatu ua tatau ona tutulu lo tatou Tama a o Ia silasila ifo i Ona atalii ma afafine le usiusitai.”

E pei ona faaalia i tulaga faaletaitai lelei o Peresitene Hinckley, sa faaauau ai ona ia saunoa mai:

“E le tatau ona tatou fiu. E le tatau ona tatou lotovaivai. E le tatau ona tatou sii lima atu i autu a le tiapolo… . Afai o lona uiga o le tutu na o i tatou, e tatau lava ona tatou faia.

“Ae e le tatau ona tuua ai na o i tatou.”²

E le saunoa perofeta mo na o o tatou lava vaitaimi; latou te tuuina mai ia fautuaga o le a faapea ona manuia ai i tatou ma a tatou fanau i le lumanai e oo atu i le faavavau.

Afai tatou te mulimuli i le perofeta, e mafai ona tatou vaai atu i le lumanai ma se lagona maoae o le a lelei mea uma.

5. Ola ina ia aoga atoatoa le Togiola i lou olaga.

O le faia o ’alofaga ona o filifiliga leaga o le a leai se aoga, ae o le a aoga le salamo. O i latou o e salamo o le a faamanuiaina faapitoa i latou e le Togiola. A aunoa ma le Togiola, o le a faapea ona manaomia e le mataupu faavae faavavau o le faamasinoga tonu le faasalaga (tagai Alema 42:14). Ona o le Togiola, e mafai e le alofa tunoa ona manumalo mo i latou o e ua salamo ma mafai ai ona latou toe foi atu i le afioaga o le Atua (tagai Alema 42:15).

O le taimi muamua na amata ai ona ou malamalama i le taua o le Togiola, o le taimi ina ua vaivai lou tamamatua. Ina ua uma au aoga i le aoga faaloia, sa ou suesue mo le suega o lou laisene faaloia i Kalefonia ae valaau mai lo’u tina a ou fia vaai i lou tamamatua a o lei maliu o ia, e tatau ona ou sau i Iuta. O lou tamamatua, o le na 86 tausaga o lona soifua, sa mai tigaina lava. Sa fiafia lava o ia ina ua vaai mai ia te au ma sa ia faasoa mai lana molimau.

E tolu ona atugaluga na i ai:

Sa alofa tele o ia i lana fanau e toa 10. O i latou uma o ni tagata lelei. Sa manao o ia ia agavaa uma i latou mo le malumalu.
O lona tama o se tasi lea o alii talavou o e na aveina atu tagata o le vaega o taavale toso a Matini e sopoia le Vaitafe o Sweetwater. Na maliu lona tama ina ua tolu tausaga o lou tamamatua, ma ua tulimatai atu lava o ia i lona feiloai atu ia te ia ma na faamoemoe ia fiafia lona tama ma isi tagata o le aiga i lona olaga.
Mulimuli lava ma e aupito sili ona taua, na fai mai o ia ia te au, ua tulimatai lava o ia e feiloai atu i le Faaola. Na faatatau atu o ia i le Faaola o le “Leoleo o le Faitotoa,” e faatatau i le 2 Nifae 9:41. Fai mai o ia, e faamoemoe ua lava lona salamo e agavaa ai mo le alofa tunoa o le Faaola.

Ua agasala i tatou uma, ma e ala atu i le Togiola e mafai ai ona tatou maua le alofa tunoa ma mafuta faatasi ai ma le Atua. E oo mai i nei aso ou te manatu pea le maoae o le alofa o Tamamatua mo le Faaola ma lona talisapaiaina o le Togiola.

Ou te molimau patino atu i le paia o le Faaola ma le moni o le Togiola, ma ou te faamoemoe o le a outou manatunatu ma le agaga tatalo i filifiliga taua o loo i outou luma.