Manatu Faaopoopo mo Taimi o Fetufaaiga, Setema 2008

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaiga o loo lomia i le Liahona o Setema 2008. Mo le lesona, faatonuga ma le gaoioiga e o faatasi ma nei manatu, tagai i le “Le Tama e, O E i Ai Iina?” i itulau U4 ma le U5 o le vaega a tamaiti o le lomiga lenei.

1. Ao lei oo i le taimi o fetufaaiga, ia faia ni uputusi o upu eseese lea e faaaoga e tamaiti e faafetai atu ai lea o loo maua i le “Tamaiti i le Lalolagi Atoa” (Tusipese a Tamaiti, 4–5). Ia faamasani i le pese, ma ia saunia e faaaoga i le taimi o fetufaaiga e aoao atu ai e uiga i le tatalo.

   Faaali atu le Pusa o Ata o le Talalelei 600 (O Le Lalolagi). Usu le fuaiupu lenei i tamaiti, ona tuu atu lea ia i latou e mate mai le upu o loo misi: “A uma le aso atoa, tootuli fanau a le Tama ma _______.” Tusi le upu tatalo i luga o le laupapa.

   Faaali atu upu tusi o auala eseese e faafetai atu ai tamaiti i le lalolagi atoa. Ia tau soo upu. Ia usu soo le vaega lena o le pese ina ia masani ai tamaiti i upu. Tusi i luga o le laupapa le faaupuga Matou te faafetai i lau Afio.

   Usu le pese e amata i le faaupuga “O le Tama e lagona i latou.” Fai atu i tamaiti e faalogo po o le a le mea e fai e le Tama Faalelagi (lagona, malamalama, iloa, alofa). Tusi i luga o le laupapa ia upu e faamatala ai le mea Na te faia.

   Ia tuu ata nei i luga o le laupapa faatasi ma se mau e faatatau i ai e tusia ai i lalo o ata taitasi: Pusa o Ata o le Talalelei 107 (O Mose ma le Laau Na Mu)—Esoto 3:4; Pusa o Ata o le Talalelei 120 (Ua Aveina Enoka ma Lona Nuu i le Atua)—Mose 6:27; Pusa o Ata o le Talalelei 111 (Ua Valaauina le Tama o Samuelu e le Alii)—1 Samuelu 3:10; Pusa o Ata o le Talalelei 303 (Ua Faatoilalo e Nifae Ona Uso Fouvale)—1 Nifae 2:19; Pusa o Ata o le Talalelei 403 (O Le Uluai Faaaliga)—Iosefa Samita—Talafaasolopito 2:17; Peraimeri 5 afifi o ata, 5-38—MFF 11:23. Talosaga atu mo ni tagata e ofo mai e faitau ia mau taitasi. Aoao atu i fanau e faapea ua silafia e le Tama Faalelagi Ana fanau uma i o latou igoa.

   Mo tamaiti taitoatasi, ia tuuina atu i ai se kopi o le gaoioiga o loo i le itulau e U4. Ia tuu atu se taimi mo tamaiti e valivali ai le ata.

   Mai le “Tamaiti i le Lalolagi Atoa,” usu le fuaitau “Faafetai atu, faafetai atu i lana gagana.” Faitau le mau mai le Alema o loo maua i le itulau e U4, ma talanoa e uiga i le faafetai atu mo faamanuiaga uma ua tatou maua. Ia usu le pese atoa, ma molimau atu faapea e tali mai e le Tama Faalelagi ia tatalo mo faamanuiaga tatou te moomia.

2. Tusi i luga o le laupapa le upusii mai ia Peresitene Boyd K. Packer o loo sii mai i le Peraimeri 7, lesona 11, gaoioiga e faamauoa ai 4. Ia faamatala atu i tamaiti e faapea afai latou te faalogo lelei i le taimi o fetufaaiga, o le a mafai ona latou faatumuina ia upu o loo misi.

   Ia saunia ni nofoaga se tolu e aoao mai ai lea e aoaoina ai e tamaiti o tatalo e taliina mai e ala i le Agaga Paia, o tusitusiga paia, ma isi auala musuia (tagai i le “Nofoaga e Aoao Ai,” O Le Aoao Atu, E Leai Se Isi Valaauga e Sili Ai [1999], 189). Faaaoga musika e faailo atu ai le taimi e agai atu ai i se isi nofoaga fou. O nisi o pese fautuaina o le “Listen, Listen” (Children’s Songbook, 107), “Saili, Mafaufau Loloto, na Tatalo” (Tusipese a Tamaiti, 66), “O Loo Tautalagia Iinei le Alofa” (Tusipese a Tamaiti, 102–103), “Mulimuli i le Perofeta” (Tusipese a Tamaiti, 58–59), ma le “Mana o Tusitusiga Paia” (2006 Otootoga mo le Taimi o Fetufaaiga ma le Polokalama a Tamaiti o le Sauniga Faamanatuga).

   I le faaiuga o nofoaga e aoao mai ai, ia faapotopoto tamaiti ma faatumu le gaoioiga o upu o loo misi i luga o le laupapa. Ia tuu atu le molimau e tali mai tatalo e ala i le Agaga Paia, o tusitusiga paia, ma isi auala musuia.