O Le Api o Talaaga a Tina
Na toeitiiti atoa le lima tausaga o ma nonofo ma tina. I le alofa ma le loto faafetai, sa ou fiafia ai lava ona sa mafai ona ou tausia o ia e pei o lona tausiga o au i le tele o tausaga. Ae na ou misia lava ana ataata ma ana tala malie. Sa ou moomoo ina ia ona toe maua le olioli ma le fiafia sa ia lagonaina pe a alu a ma tietiega. Sa le afaina lava po o fea na ma o i ai. Sa le misi lava ona tusi atu le lima o tina i fugalaau, i manu felelei i luga o uaea o telefoni, po o tamaiti o taaalo.
Sa ou misia le mafutaga sa ma fiafia ai a o ma fisi pateta, fatifati pi, pe faitau faatasi. Sa ou moomoo lava e faafesoaai i aafiaga a o ou laitiiti ma faamatala atu ia te ia ni talafou e uiga i nai ou tei ma fanau a lana fanau. Sa fiafia o ia i taimi uma e asiasi mai ai o matou aiga, ae maise lava o fanau a lana fanau. Ae o lenei, o le le lelei o lona mafaufau [ona ua matua] na suia ai mea uma. Sa le mautinoa e ia po o ai au, e ese mai i lo se tagata faapitoa na tausia o ia.
O se aso na iloga lava le faigata ia Tina. Sa tilotilo mai o ia ia te au ma le le iloa o se mea pe a ou taumafai e amata se talanoaga faapea ma se vaaiga le talitonuina o au pe a ou taumafai e fesoasoani atu ia te ia. Sa ou lelava ma lē fiafia a o ou saofai ifo i le nofoa ma mafaufau. Sa amata ona ou faitau leotele i se tasi o api o talaaga a Tina ma le faamoemoe atonu o le a faafiafiaina ai o ia ma atonu foi e manatua ai sina vaega. Sa leai se aoga o au taumafaiga, ae a o faaauau ona ou faitau ia te au lava ia, na amata ona ou manatuaina le tele o mea.
I na itulau, sa faaalia soo ai e Tina le olioli sa ia lagonaina pe a asiasi atu lona aiga ma le faanoanoa sa ia lagonaina pe a latou tuumuli. Sa ia tusia e uiga i le faigata ia te ia o le taimi na gasegase ai lou tama, ma i le mavae ai o se tauiviga umi, na tuua ai o ia o se fafine ua oti lana tane i le 59 o ona tausaga. Sa ia tusia e uiga i lona misia o Tama ma e uiga i lona popole mo lou tuagane matua, o le na pagatia foi i lea lava gasegase.
Sa tusia e Tina ni aafiaga fiafia ma faamalieina e pei o le aoaoina o vasega i le Ekalesia ma le auai i gaoioiga a le au matutua nofofua. Sa ia tusia e uiga i lona lotomalie na ia maua i le alu atu i Dilkon, Arisona, e faatasi i le vaiaso e aoao atu le talalelei i le nuu o Initia Navajo. O lenei mea na ou manatua ai lona faamamafaina i taimi uma o le taua o le faatuatuaina pe afai o faamoemoe se tagata ia te oe. O nisi taimi o ana tusitusiga na pupuu ona sa fesoasoani o ia i se tasi; na faamanatu mai ai ia te au taimi uma na te avatuina ai ni meaai po o meaalofa i soo se tasi e manatu o ia na manaomia le fesoasoani po o le faafiafiaina. O le tele o taimi i ana tusiga, na te tuuina mai ai lana molimau e uiga i le talalelei.
Sa ou ootia faapitoa lava i le ala na ia faaalia ai le faanoanoa ma le popole na ia lagonaina ina ua fanau mai lau tama teine e le atoatoa le malosi o lona mafaufau, ma isi faafitauli na o mai faatasi ai. Pe na ia faaaluina moni ea se masina atoa i le fafagaina ma le tausiga o le ma fanau a o ma o atu ma o mai ma lou toalua i le falemai a o feagai Debra Sue ma se taotoga o lona fatu ma isi faafitauli faapena? Ioe! Ma sa ia faia i le 70 o tausaga o lona matua!
Ou te manatuaina lava lona i ai i taimi uma iina mo au pe a ou manaomia o ia. I le aluga o tausaga, na ou iloa ai, afai e le mafai ona ma faatasi pea ma ia, o ana tusi ma tatalo faamaoni o le a lagolagoina au.
O lena po, a o ou usuina ni viiga ia Tina e faatoafimalieina ai o ia e moe, na lofituina au i se alofa faateleina mo lou tina toa, ma ositaulaga e le aunoa ma se agaga faafetai loloto mo upu o lana api o talaaga na faapea ona toe aumaia ai o ia ia te au.