Uo i le Uo
O Lo’u Uso ma le Tamai Taifau
“Ia agalelei ma alofa o le tasi i le tasi” (Sakaria 7:9).
Sa faamanuiaina au ou te ola ae faatasi ma tagata o e na alolofa ia te au ma faatosinaina au mo le lelei. O aafiaga maoae lava i lou olaga o tagata o lou aiga. Na filifili e ou matua le mea tonu, ma sa la faamoemoe ia ou faia foi faapea. Ma na faia e ou uso matutua ni faataitaiga lelei ou te mulimuli ai.
O se tasi o ou uso matua na aoaoina au i se lesona taua lava ina ua lima ou tausaga. O le taimi lena na ma maua ai ma lou uso masaga o Karl, se tamai taifau. Sa ma le malamalama i tiute e o mai faatasi ma le faia o se fagafao—sa ma manatu lava ua na o se isi foi meataalo sa le manaomia se tausiga faapitoa. Sa ma le popole tele e fafaga pe faainu pe tausia foi o ia. Ae na i ai so ma uso matua na matuai faafeagai lava ona lagona [ma i maua]. E ese lona alofa i meaola. Sa ia vaaia le manaomia o le tausiga o le tamai taifau ma sa ia faia loa.
Na ola ae le taifau ma le manatu o ia o le taifau a lo ma uso, ae sa masani ona ma finau pe o ai e ana le taifau. Sa ma finau atu ma Karl o i maua e ana le taifau, ma sa matou tauva ma lo ma uso matua po o ai e alu i ai le taifau pe a matou valaauina o ia. O taimi uma lava na alu ai le taifau i lo ma uso.
Na malamalama le taifau i le faamaoni ma le alofa o lo ma uso na faaali atu ia te ia. O lenei aafiaga na aoao mai ai ia te au se lesona mamana, e uiga i le tulafono o le seleselega, lea e faapea mai, o mea lava e te luluina, o le a e seleseleina foi. Na lulu e lo’u uso le alofa ina ua ia tausia le ma taifau, ma na ia seleseleina foi taui o le talitonuina ma le faamaoni.
Na iloa foi e lou tina lenei lesona. E ese le malosi o lona faatuatua. A o laitiiti o ia, sa seasea o ona matua i le lotu, o lea sa masani ai lava ona alu na o ia i le lotu. O ana faataitaiga alofa na fesoasoani e aumai ai ona matua ma toe toaaga i le Ekalesia.
A o ou tuputupu ae, e tulai soo lava lou tina i sauniga anapogi ma molimau ma tuuina atu lana molimau. Ona faapea mai lea na te talisapaia tele ona atalii ma o i matou o ni alii lelei. O lona faatuatuaina o i matou na tuuina mai ai ni faamanuiaga maoae. E tusa lava pe sa le oo le lelei o a matou amio e tusa ma ana upu, ae sa ia faaalia mai ia i matou ituaiga tagata e mafai ona avea ai i matou.
E pei lava ona i ai le faatuatua o lou tina ia i matou ma ou uso, ou te faatuatua tele foi i le augatupulaga tuputupu ae o fanau i aso nei. Na faasaosaoina outou mo aso nei. Ou te maofa i le vaaia o le toatele o fanau laiti lelei ma le lalelei, o i latou ua i ai lea faatuatua faapena. O outou tamaiti o le lumanai o le Ekalesia, ma ua saunia outou mo se galuega tele. A o outou auauna atu i le faatuatua, o le a outou luluina ni fatu o le amiotonu ma selesele faamanuiaga ua saunia e le Alii mo outou.