Lesona mai le Tusi a Mamona
Vaai Atu i le Alii
A o ma galulue ai ma lou toalua i le Eria a Asia, e masani lava ona ma savavali i luga o le Wan Chai Gap, o se auala e latalata i lo matou fale i Hong Kong. O le aega faalaotū ma e faigata ona aea, ae maise lava i aso vevela ma le susu o le ea i le taumafanafana.
I se tasi Aso Toonai, sa ou matauina ai sa ou le fiafia i le ma savaliga, lea na foliga mai o se faasalaga ae le o se faamalositino. O lou savali punou ma tilotilo i le ala sima i le savaliga atoa, na ou lagonaina ai le pei o le a ma le taunuu lava i le tumutumu.
E malie lava se mea na ou iloa i lena aso. Ina ua ou tilotilo ifo i lalo, sa tapulaa lau vaai i se auala vaiti. A faatosotoso lau savali, ou te vaai lava i lena vaaiga vaiti o le auala, auala, auala. Ae a ou ea ae i luga, e manaia lava se vaaiga na i ou luma atu. Na ou vaaia laau ma ni fugalaau samasama sesega. Sa ou vaaia ni manulele o felelei ma pepese i ni pese malie. Na ou vaai tamaiti aooga Tai Chi o tatalaina ma le gatusa o latou ili felanulanuai o se vaega o a latou faamalositino. Na le umi lava ae ausia le ma sini, o Stubbs Road, ma o tua atu sa ou vaaia ai ni lagi lanumoana manaia ma ni ao tetele papae.
Vaai atu i le Alii
A tatou tilotilo agai i lalo, ma taulai atu la tatou vaaiga vaapiapi i o tatou tulaga, atonu tatou te misia ai le vaaia o le tele o avanoa ua saunia e le Alii mo i tatou. Pe tatou te faatagaina ea o tatou tulaga e punitia la tatou vaaiga, pe tatou te vaai ae i le Alii, o le e mafai ona faalauteleina la tatou vaaiga?
O luitau—e pei o le le lelei o le ola maloloina, maliu o se tasi e pele, faalavelave faafuasei, tetea, po o faafitauli tautupe—o se vaega o le olaga o tagata uma. Tatou te oo uma i faigata e lei fuafuaina. O le tali atu ma le mautinoa i na faigata o se luitau maoae.
I le Mo Le Malosi o le Autalavou, ua folafola mai ai e le Au Peresitene Sili: “O le a anoanoai mea e faia e le Alii i lou olaga nai lo mea e te mafaia na o oe lava. O le a Ia faateleina ou avanoa, faalautele lau vaaiga i le lumanai, ma faamalosi ia te oe. O le a Ia tuuina atu ia te oe le fesoasoani e te manaomia e faafetaiaia ai ou tofotofoga ma luitau.”1
Na malamalama atalii o Mosaea i lenei mataupu faavae ma vaai atu i le Alii ina ua latou feagai ma tulaga faigata. I le tusi a Alema tatou te faitau ai:
“Na tele o latou puapuaga; na tigaina tele i latou i le tino atoa ma le manatu … atoa foi ma galuega e tele i la le agaga… .
“Ua oo foi ina latou malaga i le vao i aso e tele, ma ua latou anapogi tele ina ia tuu mai e le Atua se vaega o lona Agaga latou te malaga faatasi ai, ia mafuta foi ma i latou, ina ia avea i latou ma tufugaaao o le Atua e aumai ai o latou uso o sa Lamana i le malamalama o le upumoni, ma le iloa lelei o le leaga o uputuu a o latou tama e le tonu, pe afai lava ua mafaia” (Alema 17:5, 9).
Ma, nai lo le taulai atu i o latou puapuaga, sa latou sailia ni ala e avea ai o ni tufugaaao i aao o le Atua ina ia siitia ma faamanuiaina ai isi. I le tali mai ia latou anapogi ma tatalo ma lo latou faatuatua ma galuega, na tuuina mai ai e le Alii ia i latou le fesoasoani sa latou manaomia i o latou tulaga faigata.
Lototele e Agai ai i Luma
E 37 ou tausaga i le taimi na faamauina ai au i lou toalua i le Malumalu o Sate Leki. O ou tausaga o se tagata nofofua na aumaia ai le tele o luitau tulaga ese. Sa ou manatu lava o le a ou faaipoipo ma maua se fanau pe a 25 ou tausaga, ae na ou oo i se tulaga na matuai ese lava mai au fuafuaga.
O le tele o taimi na ou tilotilo ifo ai i le auala, ma taulai ifo ai ia te au ma ou tulaga. Sa pumoomoo ou faamoemoega. O le olaga na foliga mai e faigata ma le sa’o. Sa oo ina ou loto vaivai. Na leai sou talitonu ia te au lava.
Ou te manatua se taimi taua o lou olaga, e pei o atalii o Mosaea, na ou vaavaai atu ai i le Alii. Sa ou toaga lava i le Lotu ma i ai lou “iloa lelei o le upumoni” (1 Timoteo 2:4; 2 Timoteo 3:7), ae e tele atu ni mea sa ou naunau i ai. Na fai lau filifiliga ina ia ou maelega atili i au suesuega o tusitusiga paia, ma ia ou ola agavaa atili mo le taitaiga a le Agaga. Sa ou moomoo ina ia avea au ma se “tufugaaao i aao o le Atua,” e pei o atalii o Mosaea.
Na [ou] “loto tele e alu atu” (Alema 17:12) ma vaavaai mo ni avanoa fou. Sa ou faatutuina ni sini faaleaoaoga ma lesitala i se polokalama mo se tikeri e faaleleia ai ou tulaga faalegaluega. Sa ou filifili e aluese mai le uarota a tagata nofofua i se uarota e i ai aiga. Sa amata ona ou aafia, alu i tafaoga a aiga ma taumafataga i afiafi ma polokalama mo tagata matutua. Sa ou auai i le aufaipese a le uarota. Sa oo ina ou masani lelei i le epikopo. O ia o se tamalii atamai ma le agalelei o le na tuuina mai ni valaauga ia te au na faapea ona faamanuiaina ai lou olaga.
O faiaoga o aiga ma gaoioiga a le Aualofa, na ou faauo atu ai i le toatele o tamaitai, ma sa masani ona latou faaaofiaina au i a latou gaoioiga faaleaiga. Ae sa ou le faatali seia faaaofia au; sa ou vaavaai mo ni avanoa ia ou aofia ai. Sa ou volenitia e vaai a latou fanau, ma valaaulia o latou aiga matou te fai taumafataga i afiafi. Na avea a latou fanau ma au fanau.
Na ou iloaina foi o le nofoaga sili lava e alofa i ai ma alofaina ai o totonu lava o lou aiga. O lou tuagane e toatolu lana fanau, ma na oo ina ou fiafia i o latou olaga, meaaoga, ma gaoioiga.
Ona sa fai lo’u sao, o lea na faaleleia atili ai lo’u talitonu ia te au lava, ma na ou iloa ai o le olaga e sili atu le manaia ma le faamalieina pe a ou vaai atu i le Alii. E pei lava ona ou vaai i laau, fugalaau, manulele, ma tagata i le ala pe a ou tepa ae i le Wan Chai Gap, o le vaai atu i le Alii na fesoasoani ou te iloa ai avanoa fou mo lo’u olaga.
A o faaauau ona ou vaai atu i le Alii, na ou iloa ai na Ia faalauteleina lau vaaiga faaletino i se vaaiga e faavavau. E ala i tali i talosaga, na ou iloa ai e silafia au e le Alii, e alofa ia te au, ma o loo malamalama e uiga ia te au ma ou tulaga. O lenei iloa ua tuuina mai ai ia te au le faatuatua o le a faaauau pea ona Ia fesoasoani mai ia te au i le taulimaina o tofotofoga ma luitau i le lumanai, a o ou vaai atu ia te Ia mo avanoa ma “filifili ai le amiotonu ma le fiafia, tusa lava pe o le a le tulaga ou te oo i ai.”2