Sailiga i Finelani
Sa ma lagona ma lou uso le leai o se aoga ona sa ma le iloaina po o ai o ma augatama o le au Laurunen. Na pau mea na ma iloaina, na latou o mai mai Finelani i Amerika i le 1901. O lea, ia Aokuso 2004, na matou o ai ma lou uso o Janice ma le ma tausoga o Sandy ma lou toalua o Charlie, i se malaga e saili o matou augatama.
O le faagasologa o le suesuega mo le matou malaga, na tau ai Sandy i se lipoti e lua itulau e uiga i le Nofoaga o le au Laurunen, na fausia i le 1605. O le taimi muamua na taua ai lo matou aiga o le 1569 i le taulaga o Kauhajoki.
O le taimi lava na matou taunuu ai i Finelani, sa matou totogiina ai se taavale ma matou usupo ai i le taeao na sosoo ai mo le tietiega umi i Kauhajoki. Sa faigata ona matou mauaina [Kauhajoki] ma na toeitiiti lava a matou fiu, ae vaaia loa e Charlie se malaevaalele laitiiti. Sa matou o atu i ai iina e fesili mo se fesoasoani. Sa faaali atu e Sandy la matou lipoti i se alii talavou, ma sa ia ofo mai ma le agalelei na te aveina atu i matou i le faletusi i le taulaga. Ou te mautinoa lava matou te le mauaina Kauhajoki e i matou lava, aua sa matuai punitia lava e se auala ua togavaoa. Na pei lava na taitaiina i matou e le Alii i la matou malaga.
I le faletusi, na tuuina mai ai e se tamaitai talavou ia i matou se faafanua, na faailogaina ia le falesa Luteru ma le fanuamaliu. Sa faigofie ona matou maua le falesa. Ina ua mavae le lua itula o sailiiliga, faatasi ai ma le fesoasoani a le faifeau ma nisi o failautusi, na faapea ona telefoni atu ai se tasi o i latou i o matou aiga o Laurunen ma tau atu ia i latou o loo i ai ni a latou malo mai Amerika. Sa vave ona latou oo mai ma gafa o le aiga e oo atu i tua i le tausaga 1550.
Faatasi ai ma le tausitusi a le ekalesia na fai ma a matou tagata faaliliu upu, sa matou savalivali ai i le fanuamaliu na matuai matagofie lona tausiga ma le teuina. Na tutu Sandy i le tuugamau o lona tamamatua mo le taimi muamua lava. Mulimuli ane, na matamata ai o ia i se ata [o lona tamamatua] ma uuina lana vaiolini. Sa matou lagona le ootia ma le faatutumuina o lagona gaogao sa ia i matou muamua.
Ona ave atu lea o i matou e o matou tausoga Finelani i le nofoaga o le aiga, lea sa i ai lona ata i le matou lipoti e lua itulau. Sa latou faailoa mai ia i matou, e tele naua fanua o lo matou aiga. O le fale o loo i le nofoaga o le aiga e matuai tele lava ma sa nonofo ai aiga o le au Laurunen i le taimi e oo atu i le 1550. Ina ua oo mai le militeli a Rusia i Kauhajoki, sa latou faaaogaina le fale o le matou aiga e fai ma ofisa autu mo le militeli. Na latou susunuina le falelotu ma isi fale uma i le eria. Na sosola tagata uma, e aofia ai lo matou aiga i le vao mo le saogalemu. Ina ua tuumuli tagata Rusia, sa taitaia e lou tamamatua le toe fauina o le falesa fou lea na matou vaai i ai. Mulimuli ane, na faapea ai ona vaevaeina ma faatau atu le fanua na siomia ai le nofoaga o le aiga.
I le 2005 na matou toe foi atu ai ma Janice ma Sandy i Kauhajoki mo se isi asiasiga faatasi ma o matou tausoga e lei leva ona matou masani ma mo nisi sailiiliga. O le 2006 na faia ai la matou faatasiga muamua o le auaiga o Laurunen i Amerika, ma e toa 15 o matou tausoga mai Finelani na matou auai faatasi ai. E toa valusefulu iva tagata o le matou aiga na faamanatuina olaga o o matou matuamatutua.
O se fiafiaga tele le iloa o se talafaasolopito tele ma le matagofie ma iloa atili ai pe o ai au ma pe o fea ou te sau ai. O talafaasolopito o aiga o se galuega a le Alii.