Katamaroan Am Kamatebwai n te Doctrine and Covenants
E anganiira te ririki aei te tai ae moan te tamaroa ibukira ngaira n tatabemanira nako ni karekei kakabwaia aika a korakora man kamatebwaian te Doctrine and Covenants —bokin te kaotioti ae kamiimi are e koreaki n ara bong ao ibukin ara bong.
A. Roger Merrill (i nuka), te beretitent; Daniel K Juddl (maing), te moan kauntira; ao William D. Oswald, te kauoman ni kauntira.
N tabetai e atongaki bwa te boki ni kairi ibukin Kaokan Bwaai mairoun te Uea, iai inanon Doctrine and Covenants “bwanaan te Uea ae Iesu Kristo ae maraara ma ni matoa, n taetae riki n te aro teuana ni koron te bong.”1
A mwaiti kaain te Ekaretia aika a tia ni karekea tangiran te boki aei. E taku temanna te titita, “Te kaotioti ae onoti nakoia n tatabemaniia inanon te Doctrine and Covenants a rangi n ibuobuoki. I namakinna ae I kona n taekinna nakoia.” E kabwara temanna, “E buokai te Doctrine and Covenants n reitaki ma itera nako ake I kaitara mangaai ibukina bwa e aki rangi bwaka nako taina.” E taku temanna tarira, “I tangira te Doctrine and Covenants ibukina bwa e buokai n ataa te nakoanibonga.”
Ti kakoaua bwa te Doctrine and Covenants bon bwanaan te Uea ni koaua n ara tai nakoia natin te Atua n tatabemaniia nako ao kakabwaia naba nakoia naake a kamatebwaia. Ti anga naba iango aika aua ibukin kanakoraoan am kamatebwai n te ririki aei ao ni karioi kawai tabeua ake a na kona ni buoka te Reirei n Tabati.
Wareka te Boki mai Moana ni karokokoa Tokina
Te Doctrine and Covenants ao Church History Class Member Study Guide e na kaungaia kaain te Ekaretia bwa a na “wareka te Doctrine and Covenants mai maona ni karokoa tokina”2 inanon 2009, ai arona naba ni katabwanina te wareware ni katoa Tabati n aron are a baireaki n te atu n iango.
Te kamatebwai n te aro aei e na buokiira ni kaotaira ni kibuntaeka ni mwakoro ake a kamatebwaiakaki n ai arona naba ma taian mwakoro iboni irouia. E na katauraoira naba n ira buakon te marooro ae nakoraoi n te Reirei n Tabati—n are imwina, e na karekea riki te atatai ae nano ao te kairi ibukira ni kabonganai i bon iroura ao ni maiuia ara utu.
Inanon am kamatebwai ni booki aika tabu ni katoa bong, ko na kona ni kunea bwa e rangi n ibuobuoki ngkana ko aki katabea teuana ke uabong ni katoa wiki ni manga rinanon bwaai ake a na marooroakinaki n te kirati ao imwiina ko a manga reitanako am wareware n te Doctrine and Covenants mai moana ni karokoa tokina.
Wareware ma Titiraki n am Iango
Te Tari Renzo-Molly Barrios Matias, kaain Guatemala, e reiakina mwaakan kabonganan te kamatebwai ni booki aika tabu ni karekea te kaotioti iboni irouna ibukin oin maiuna.
“Imwin rokon Hurricane Mitch rinanon Amerika Nuka n 2001 ao ni katukui bwaai ni kabane n riki ni mange, e bati au titiraki,” e taku. “Ni kakaei kaekaia, I kawara raoraou ae I rangi ni karinea. E taku, ‘Wareki booki aika tabu. Ko na kunea inanona taian kaeka aika moan te raoiroi nakon am titiraki.’
“Warekan booki aika tabu e bita maiu,” e taekinna te Tari Matias. “Imwin kamatebwaian booki aika tabu n te tai ae rangi ni maan, I moanna ni kunei kaeka nakon au titiraki. I a kona n nooria bwa maiu bon iai nanona. Mai ikanne are I baireia ni karaoa te mwakuri ni mitinare ae bwanin taina.”
N te tai ae aki maan ao e a mwakuri te Tari Matias n te Mition i Honduras Tegucigalpa, ni buokiia temwangina ni ukoraukora mwaakan kamatebwaian booki aika tabu.
Te wareware ma titiraki aika onoti n am iango e na kona ni kaoa te Uea bwa e na anganiira te ungannano ao n tuangiira kawaira nakon kataakira ao n angaraoin ara tai. Ko na bae n tangiria ni kani korei titiraki n tataroakini n ikoti nakon am kamatebwai ni booki aika tabu. Ngkana ko karekei kaekaaia, ko na namakina te koaua n tibwaua te atatai ae nano anne n te Reirei n Tabati. Kaain am kirati a na kaonaki n te unga n nano ngke a ongo iroun temanna ma temanna ni kaota te kakoaua n ae e riai bwa e kanga te Uea ni kamanenai booki aika tabu ni karekea nakon temanna te kairiiri ao te atatai ae koaua.
Kakaae ibukin te Itoman, Bwai ni Kakairi, ao Boto n Iango
E a tia n iangoia Unimwaane David A. Bednar kaain te Kooram n Abotoro ake Tengaun ma Uoman bwa ni kabane ara kamatebwai ni booki aika tabu, ti ukoukori itoman, bwaai ni kakairi ao boto ni iango.3
Te katoto n te itoman n te Doctrine and Covenants bon te reitaki imarenan ara ongotaeka ao kakabwaia aika a beritanaki. Ngai, ae te Uea, I kabaeaki ngkana ko karaoa ae I taekinna; ma ngkana ko aki karaoa ae I taekinna, akea te berita nakoim (tara D&C 82:10). Ara kamatebwai iaon booki aika tabu e kona ni uaana riki ngkana ti kina te itoman aei ao ni kona ni karaoa te bwai ae a tia te Uea n tuangiira bwa ti na karaoia.
Teuana te bwai ni kakairi n te Doctrine and Covenants e nooraki n aron tamaroan rongorongo inanon te boki. N aron are e koreaki ni moan taekana ae kangai, “Kaotioti aika tabu aikai a karekeaki man kaekaan te tataro, n taai ni kainnano, ao n otinako man iteran oin te maiu ni koaua are a irekereke ma aomata ni koaua.”4 Taian kaotioti a kaeti nakon temanna ao ni kaekai titiraki ni kaonoti nakon bwaai ake e atai Tamara are i Karawa ae na rangi n tau (tara D&C 15:6; 16:6) nakon temanna iboni irouna.5 Te bwai ni kakairi aei ni kakaea ao ni karekea ibukin temanna bon teuana ae ti na kona n iria inanoni maiura.
Teuana te boto ni iango n rinanon ni kabane booki aika tabu bon Teimatoa ni Ukoukoria ao ko na kunea; bubuti, ao ko na anganaki; karebwerebwe, ao e na kaukaki nakoim (tara D&C 88:63). Boto ni Iango n aekakin aei e kakorakoraira ni butimwaea mwiokoara aika kakannato ibukin oin ara kamatebwai ngkana ti wareka ao n iangoi raoi ana taeka te Atua.
Ngkai te Doctrine and Covenants e aki warekaki n tainako kanga te karaki, a uaia ni ikotaki ma te itoman, bwaai ni kakairi, ao boto ni iango. Teuana mai ibuakon kakabwaia ngkana ti uaia ni ikotaki ni marooroakini koroboki aika tabu n te Reirei n Tabati boni karikirakean te oota riki n atatai aika nano ngkana ti tibwaua are iroura ao n ongora nakon aia atatai ae nano tabeman.
Ukeuke Bwa Kam Aong Ni Uaia Ni Karikirakeaki ao ni Kimwareirei
E a tia n taekinna te Uea bwa ngkana a uaia kaain te Ekaretia n reiakiniia ao ni kaotaia imarenaia ma te Tamnei, a uaia n ikotaki ni karikirakeaki ao ni kimwareirei (tara D&C 50:22). E riki te anga-reirei n te euangkerio ao kamatebwai aika mwaaka ngkana taan reirei ao taan reiakinaki a ataia bwa te tia reirei ni koaua n ana kiraati nako te Ekaretia bon te Tamnei ae Raoiroi ao bwa te marooro n te umanreirei e kaota koauan te Tamnei.
N te kataneiai irouia taan kairiri n te aonnaba ni Beberuare 2007 iaon te anga-reirei ao te kamatebwai, e kaoira te Unimwaane Jeffrey R. Holland kaain te Kooram n Abotoro ake Tengaun ma Uoman nakon mwiokoara aika kakannato ibukin kamatebwaian te euangkerio. Imwiina ao e a manga katereterea bwa a kanga taan reirei ni kona ni kamarurungiia nakon ae a tetekateka naba n akea aia iango n tain te marooro n te kiraati.
E taku Unimwaane Holland, “Ngkana ti buoka te tia reiakinaki ni wakina te mwiokoaki ibukin te kamatebwai, ao ngkana ti na kakoaua ibukin te koaua are ti a tia n reiakinna, te Atua e na kamatoai inanora ao inanoia ataein ara reirei rongorongon ana euangkerio Iesu Kristo”6
Ngkai kaain te kirati a tataro mwaaka ni kamatebwai inanon te wiki ao imwina a ikotaki ni wareware man koroboki aika taabu ao n tibwaua aia atatai ae nano, te Tamnei ae Raoiroi e na kaota te kakoaua ao n uotia “nakon nanoia” (2 Nibwaai 33:1) kaain te kirati n tatabemania tera ae kaonoti are teuanne ke neienne e kainnanoia ni kan ataia ao ni karaoia (tara 2 Nibwaai 32:3–5).
Te Kakao Nakoim
Ngkana ti kamatebwai ao n reirei man te Doctrine and Covenants n te ririki aei, ara onimaki iroun Tamara are i Karawa ao Iesu Kristo e na kakorakoraaki ao ara koaua iroun Iotebwa Timiti bwa ana burabeti te Atua ibukin Kaokan Bwaai e na rikirake. E na katamaroai ara atatai te Uea ao koroboki aika tabu a na riki bwa reitan mwakoron maiuira.7
Ni moan te ririki ae e boou aei, ti kaoi ngkami n reitaki ma ngaira ni uaia ni kukurei n ukoukori tua aikai inanon Doctrine and Covenants, ibukina bwa a koaua ao ni kakaonimaki, ao taeka ni burabeti ao berita ake inanoia a na bon koro bukiia (tara D&C 1:37)
E riki te angareirei n te euangkerio ae mwaaka ao te kamatebwai ma te tamnei ngkana taan reirei ao taan reireinaki a taia bwa te tia reirei ni koaua n ana kiraati nako te Ekaretia bon te Tamnei ae Raoiroi ao bwa taan roko n te umwanreirei a kaoa te Tamnei ni kaota te kakoaua.
Tamnei raweaki iroun Craig Dimond
Doctrine and Covenants ao Rngorongon te Ekaretia
Te Boki ni Kairi ni Kamatebwai ibukiia Kaain te Kirati