Rongorongo man te Moan Beretitentii
Ti a Tabekaarake Bwanaara Ni Kauring
Bukina bwa e akoi te Uea, E weteia tooro bwa a na kauringiia aomata bwaai aika kakamaaku. Te wewete ni kauring e rikirake ni matoatoa ao ni kakaawaki ibukin te koaua are angiin kauring aika uaana bon ibukin kabuanibwai aika a tuai kakoauaaki irouia aomata. Iangoa Iona. E waekoa ni birinako man ana wewete te Uea ni kauringiia kaain Nineveh ake a kamatakiiaki nakon te kangaanga man te bure. E ataia bwa aomata aika a bubuaka aika a tia n rinanon te roro n aki kakoauaia burabeti ao n tabetai a kamateia. Ma ngke e waakirake Iona ma te onimaki, te Uea e kakabwaia ma te kamanoaki ao te tokanikai.
Ti kona naba n reirei man ara atatai ni karo ao n ataei. Ngaira aika kaaro ti a tia n noora te namakin ae kakamaaku ae a aki kona n noria natira. Tabeua tataro a kaota te nano n tangira n aroia kaaro n titiraki ni kan ataia bwa ko na kanga n anaa nanon te ataei ni kitana te kabuanibwai. E angii mai ibuakora ae a tia n namakina te kakabwaia man te ongo ao te kakauongo raoi nakon bwanaan te karo.
I kona n uringa tinau n taetae ni karaurau nakoiu n tawanoun te Kaonobong teuana ngke, I ataeinimwaane, I butia ana kariaia ibukin karaoakin te bwai teuana ae I taku bwa e rangi n raoiroi are e ataia bwa e kakamaaku. I teimatoa ni mimi n aron te mwaaka are e anga, I kakoaua ma iroun te Uea, bwa e anganai te kaeka ma taeka aika uarereke. Ngke I uringii, a kangai: “O, au kantaninga bwa ko kona ni karaoa anne. Ma te rinerine e nakoim.” Te kauring e mena ti inanon taeka aika kona ao rinerine. Ma kakaawakin te bwai are taekinna n ana taeka ni kauring e bon rangin n tau ibukiu.
Mwaakana ni kauring ma taeka tabeua a karina n roko man bwaai aika tenua ae I atai irouna. Te moan, I ataia bwa e tangirai. Te kauoua, e a tia ni kaitara ma kangaanga n aron aikai ao e a tia ni kakabwaiakaki man rinean rinerine aika eti. Ao te kateniua, e a tia n anganai ana koaua ae a tia n rinanona bwa te rinerine are n na karaoia e bon kakawaki are e na bon tuangai te Uea bwa tera ae n na karaoia ngkana I tuanga. Te Tangira, te katooto, ao te kakoaua: a rangin ni kakaawaki bwaai aika tenua aikai nakon au iango n te bong anne, ao a tia n riki n taabo ake I mena iai ni kakabwaiai n ongoraau ao ni kakauongo raoi nakon ana taeka ana toro te Uea.
Ara konabwai n ringi nanoia tabeman ma bwanaara ni kauring a rangi ni kakawaki nakoia ana reirei ni kabane Iesu Kristo. Aio te bukinaki are a tia n anganaki kaain Ana Ekaretia Iesu Kristo Ni Boong Aika Kaitira: Bwa a kanakoaki iroun te Uea bwa a na kakoaua ao a na kauringiia aomata, ao e riki bwa tabeia aomata ni kabane ake a tia ni kauringaki bwa a na kauringiia kaain rarikiia (tara D&C 88:81).
Tabera Ni Kauring
Kauringakiia kaain rarikira bon tabera ni kabane ngaira ake ti a tia ni kariaia te berita n te bwabetito. Ti na taetae ma raoraora ao ara utu ake tiaki kaain te ekaretia taekan te euangkerio. Tabera bwa ti na kaoia bwa a na reirei ma mitinare ake a bwanin aia tai, ake a tia ni weteaki ao ni kamatoaki bwa a na kona n anga reirei. Ngkana e a tia te aomata ni kariaia ara kakao ibukin te reirei, te “kan buokaki” ibukin berita aika korakora a tia ni karaoaki, temanna ae kantaningaaki bwa e na bon rin n ranin te tabo ni bwabetito ao n teimatoa n onimaki.
Ngkai ko a riki bwa kaain te Ekaretia, ao a kona mitinare aika bwanin aia tai ke kaain te uoote ke te mwaanga ni buokiko ni karinaniia aomata aika ko na kona n tibwaua te euangkerio ma ngaia. A kona n tuangko mitinare bwa ko na iangoia am koraki, kaain rarikim, ao aika ko kinaia. A kona n tuangko bwa ko na karekea te tai are ko na kataia ni karekea te aomata temanna ke kaain am utu n tauraoi n reireinaki irouia mitinare. I a tia ni karekea te atatai anne. Bukina bwa inanon ara utu ti butimwaea te kakao anne mairouia mitinare, I kakabwaiakaki ni karaoan te bwabetito nakon te aine ae akea buuna n ana ka 80 tabun n ririki, e reireinaki irouia mitinare aine.
Ngke I katokai baiu iaon atuna ni kamatoa bwa kaain te Ekaretia, I namakina te kukurei n atonga bwa a na rinerine ni kani bwabetitoaki e na kakabwaiaia ana utu inanon rooro ma rooro, imwiina ao imwaina. Riki ngke e a kitana te maiu aei, e reke au tai n rin n te tembora ma natina te mwaane ngke e kabaeaki nakoina.
Ko na bae n tia ni karekei atatai aikanne ma aomata ake ko a tia ni kaoia bwa a na reireinaki, ma ngaia ae ko ataia ae tabeua te tai inanon maiura a kakukurei. A koaua ana taeka te Uea ibukiia mitinare ao ibukira ni kabane: Ao ngkai e korakora kimwareireim iroun temanna te aomata ae ko a tia ni uotia nakoiu nakon abanuean Tamau, a na mwaitira riki kukureim ngkana ko uotiia aomata aika mwaiti nakoiu! (Tara D&C 18:16).
Mitinare a na buokiira ao a na kaungaira, ma e na kanga reken te tai n te nei ni bwabetito ao n te tembora n reke e na bon nakon aron taraan tabera ao tera ae ti na rineia ni karaoia ibukina. E na aki kabongana te Uea te taeka kauring ngkana akea te kangaanga. Ma aki mwaiti aomata aika ti ataia aika a namakinna. A tia ni kataia ni mwaninga koauan rikiraken mwaitiia aomata ae a maenako ngaia are maiuia ao aia utu a kabua te rau te bwai ae a taku bwa e kona ni karaoaki. Nanom ae korakora n aki tabeakina te kanikina ibukin te kangaanga e kona ni kabebeteko ni iango: “Bukin tera N na taetae nakoia aomata ibukin te euangkerio ae kona ni kakukureia? Tera te kangaanga ae na riki nakoia ke nakoiu ngkana I karaoa ke n aki taekina te bwai teuana?”
Ma, e kona ni kangaanga atakin te kangaanga, ma e bon koaua, ibukiia ao ibukira. Te katooto teuana, n te tai teuana n te maiu ae na roko, aomata ni kabane ake ko kaitibo ma ngaaia n te maiu aei a na ata te bwai ae ko ataia ngkai. A na ataia bwa karekean te kawai ni maeka n te maiu are akea tokina ma ara utu ao imatan Tamara are i Karawa ao Natina, Iesu Kristo, bon man te rin nakon te matoroa n te bwabetito ni baia naake iai irouia te kariaiakaki mairoun te Atua. A na ataia bwa te kawai ibukiia utu bwa a kona ni ikotaki n aki toki bon ti man kariaiakaia ni kawakin berita aika tabu ake a karaoaki n ana tembora te Atua n te aonaaba aei. A na uringa bwa ko kinaia. Ao a na uringa bwa ko anganiia te bwai ae anganiko temana.
E rangin ni bebete atongan, “E aki eti te tai.” Ma iai te kangaanga n taotaonan tain katiaan bwaai. Inanon ririki aika nako ao I mwakuri ibukin te mwaane i California. E kamwakurai; e rangin n akoi nakoiu; e tara n rangin ni karineai. Tao ti ngai ma ibuakoia Aika Itiaki Ni Boong Aika Kaitira ae kinaai raoi. I aki ata raoi bukina bwa e aera n na tataninga ibukin te tai ae riai n taetae ma ngaia ibukin taekan te euangkerio. I a tibwa namakina te nanokawaki ngke I ataia, imwiin are e ritaea ao I maeka n te tabo ae raroanako, are ngaia ma buuna a tia ni mate imwiin mwanangaia n te bwakanako n tai n te tairiki anne nakon mwengaia i Carmel, California. E tangira buuna. E tangiriia natina. E rangin n tangiriia ana karo. E tangiriia tibuna, ao e na tangiriia natia ao n tangiria ni maeka ma ngaia n aki toki.
Ngkai, I aki ataia bwa a kanga aron barongakia aomata ni kabane ke ni kamaekaaki n te aonaaba n tamnei. Ma au kantaninga bwa N na kaitibo ma ngaia, are e na tarai kanoan matau, ao are N na noria inanoia te titiraki: “Hal, ko ataia. Bukin tera ko aki tuangai?”
Ngke I tabe ni iangoia ao ngke iangoa te aine ae akea buuna are I bwabetitoia ma ana utu ake a nang kabaeaki nakoina ao nakoia n tatabemaniia, I tangiria ni karaoa ae tamaroa riki. I tangiria ni kakorakora mwaakau ni kaoia aomata bwa a na reireinaki. Ma te nano ae korakora ao ma te onimaki bwa e na buokiira te Atua, ti na karaoa ae tamaroa riki.
Te Tangira Bon Te Bwai Ae Rangin Ni Kakaawaki
E aki toki n rimoa moa te tangira. Te mwakuri n tangira teuana e bon rangi n tau. E kabwarabwara te Uea te tangira ae ti riai n namakinna, ao naake ti kaoia a riai ni kinaa iroura, ma taeka n aron aikai: “E taotaona nanona te tangira,” ao e “onimakini bwaai ni kabane, e kantaningai bwaai ni kabane, e nanomwaaka nakoni bwaai ni kabane” (1 I-Korinto 13:4, 7).
I a tia n nooria bwa tera ae nanonaki n ae te “taotaonaki n nano” ao “te nanomwaaka nakon bwaai ni kabane.” Te utu e mwaing nakon te auti irarikira. E boou te mweenga, ngaia are I a riki bwa a na taan mwakuri Aika Itiaki Ni Boong Aika Kaitira ni uniki uteute, buakonikai, ao taian nii, ni kanimwan te bwai ibukin karekean te ran, ao bwaai riki tabeua. I uringa te kabanea n tairiki, n tei irarikin mwanen te utu ngke ti a tia. E tuoa ara mwakuri ao e taku nakoira ngaira ake ti kaan ma ngaia, “Aio te katenua n tabo ae kamwa tia ngkami kaain te Moomon ni buokiira iai, ao I taku bwa aio te kabanea n tamaroa.” Ao imwiina e kamatoa n taetae ni karaurau nakoiu aron te nakoraoi ae a tia ni karekea ma irouia membwa n oin ana aro, te maroro ae ti a kaman ataia ngke e maeka ikekei.
Ni kabanea te tai anne, te mwakuri n akoi are e a manga reitaki nakoina ao a na utu e aki toki, bukina bwa kaain rarikina a roko ni kaota aia tangira nakoia. N te tairiki teuana I oki nakon mweengau n noora te turaki inanon kawaia. I a tia n tuangaki bwa a nang mwaing nakon te kaawa are teuana. I kawariia n anga naba au ibuobuoki. I aki kina te mwaane are e katokai bwaai nako aon te turaki. E taetae nakoiu ni karaurau ngke I a kaan ma ngaia, “Mauri, te Tari Eyring.” I aki kina bukina bwa te teei ni mwaane ngkoa, ngkai e a ikawai, are e a tia ni maeka ikekei, e iein, ao e mwaing n nako. Ao ibukin te tangira ma irouia aika mwaiti ibukina, e a riki ngkai bwa te membwa n te Ekaretia ae a tia ni bwabetitoaki. I aki ata tokin te karaki anne bukina bwa e na bon akea tokina. Ma I ataia bwa e moanaki man te tangira.
Te kauoua, ti riai n riki bwa banna ni katooto aika tamaroa nakoia aomata aika ti kaoia. N te aonaaba ae rotongitong, ana tua te Tia Kamaiu aei e na riki n rangi ni kakawaki riki: “Kam na kaoti ami ota imataia aomata, n ai aron aikai, bwa a na noori ami mwakuri aika raraoi, ao a na neboa Tamami are i Karawa iai” (Mataio 5:16).
E angii ibuakora ti iangoia bwa man katooton ara taura aika uareereke e na kona ni karako noorakina. Ma ngkoe ma am utu kam taraaki riki nakon ae kam na ataia. Tabeua te tai n nako ao e reke au tai n nako iai ao n taetae n taian bootaki ma kaaina ae kaniia 300 minita ao mataniwiin ekaretia ake tabeua. kawarii bootaki aikai n aron are I kona. I titirakiniia bwa bukin tera ae a rangin n anaaki nanoia nakon au rongorongo, are taekinan aron moan katean te Ekaretia, n taekina te moan kaotioti nakon te ataeinimwaane Iotebwa Timiti ao burabeti aika maiu. N angiin te tai, ao anga te kaeka ae ti tebo. A taekina karakinan te aomata ke te utu—ae a rangin ni kina ae kaain te Ekaretia. N tainako ao I ongo, “Utu aika moan te tamaroa ae I tuai ni kinaia.” N tainako ao aki toki n taekin tabeua mwakuri ni ibuobuoki ibukin te botanaomata ke mwakuri ni ibuobuoki n tain angi buaka are a karaoi kaain te Ekaretia ni kawai aika kamiimi.
Aomata ake I kaitibo ma ngaia n tain te bootaki a tuai kona n ata koauan reirei, ma a tia n noori uaaia aika raraoi ni maiuia kaaina, ngaia are a tauraoi n ongora. A tauraoi n ongora koauan Kaokan bwaai—are a kona iai utu ni kabaeaki n aki toki ao te euangkerio e kona ni biti anuara. A tauraoi ibukin ami banna ni katooto.
Te katenua ni bwai ae ti riai ni kanakoraoia riki bon kaoakiia ma te kakoaua. Te tangira ao te banna ni katooto a na kauka te kawai, ma ti bon riai ni kauki wiira man taekin ara kakoaua. Ti buokaki man te koaua ae beebete: te koaua ao te rinerine bwaai aika aki kona ni maenako. Iai rinerine tabeua ae a riai ni karekea natin Tamara are i Karawa bwa aonga n tau nakon te kakoaua ibukin koaua n tamnei, ao n te tai are ti ata te koaua n tamnei, ti riai n rineia bwa ti na kamatoa maiura nako iai. Ngkana ti kaota ara kakoaua ibukin te koaua nakoia ake ti tangiria ke nakoia raoraora, ti riai n taekin nakoia rinerine aika a riai ni karaoi n te tai are ata te koaua bon irouia. Uoua katooto aika rangin ni kakaawaki: tuangakin temanna bwa e na wareka Ana Boki Moomon ao ni kaoa temanna bwa e na kariaia bwa e na reireinaki irouia mitinare.
Ibukira bwa ti na ataia bwa e koaua Ana Boki Moomon, ti riai ni warekia ao ni karekea te rinerine ae kuneaki ni Moronai: tataro bwa ko aonga n ataia bwa e koaua (tara Moronai 10:3–5). Ngkana ti a tia ni karaoa anne, ti kona ni kakoaua man oin ara atatai nakoia raoraora bwa a kona ni karaoa te rinerine anne ao n ata te koaua naba anne. Ngkana a ataia bwa Ana Boki Moomon bon ana taeka te Atua, a na manga kaitara ma te rinerine teuana: bwa a na kariaia am kakao bwa a na reireinaki irouia mitinare. Karaoan te kakao anne ma te kakoaua, ko riai n ataia bwa mitinare a tia ni weteaki bwa a na toro te Atua.
Ko kona ni karekea te kakoaua anne man kaoakiia mitinare nakon mweengam n reireiniia am utu ke raoraom. A na butimwaea te tai anne Mitinare. Ngkana ko tekateka ma ngaia n anga reirei, n aron ae I a tia n ataia, ko kona n ataia ae iai irouia te mwaaka ma i karawa n riaon aia ririki ao aia reirei. Ngkanne, ngkana ko kaoia tabeman bwa a na reireinaki irouia mitinare, ko na kona n anga am kakoaua ae a na reirei te koaua ao n anga taian rinerine ake e na karika te kukurei.
Kakoauaana
Tao tabeman mai ibuakora e na kanganga irouia kakoauaan ae ti tangira n ae tau ke maiura a tau tamaroaia ke mwakara ni kakoaua a tau ibukin kariaiakan ara kakao nakoia kaain rarikira. Ma e ataia te Uea bwa e na kona n riki ara namakin n aekan anne. Kakauongo nakon Ana taeka aika kaunganano, are E anga te kaetieti iaona bwa a na katukaki ni moan te Doctrine and Covenants, ngke E anganiira tabera: Ao te bwanaa ni kauring e na reke irouia aomata ni kabane, man wiia au reirei, ake I a tia n rineia n te kabanea ni bong (tara D&C 1:4).
Ao ngkanne kakauongo nakon Ana kabwarabwara nakon aia konabwai ana reirei—ibukira: Kekerikakin bwain te aonaaba e na roko ao e na uruia ake a mwaaka ao ni korakora (tara D&C 1:19).
Ao imwiina: Bwa e kona bwaninin au euangkerio n tataekinaki irouia aika mamaara ao aika kakaonimaki nakon tokin te aonaaba (tara D&C 1:23).
Ao imwiina riki: Ao ngkai a bwaina te nanorinano a kona ni kakorakoraaki, ao ni kakabwaiakaki mai ieta (tara D&C 1:28).
Te koaua anne are anganaki moan mitinare inanon te Ekaretia ao mitinare n te bong aei. Ma ti boni bane n anganaki naba. Ti riai ni karekea te onimaki bwa e aonga n tau ara tangira ao te euangkerio e a tia n ringa nanora n ae tau bwa e aonga ara kakao n rinerine n ataaki ae roko mairoun te Matita are bon ana kakao.
Ngaia raoi te banna ni katooto ae kororaoi ibukin te bwai ae ti riai ni karaoia. Ko a tia n namakina Ana tangira ao Ana mwamwannano e ngae ngkana ko aki kaekaa, n aroia ake ko kawaria ma te euangkerio a na bon aki kaeka. Te tai teuana imwiin teuana E a tia ni kaoko bwa ko na reireinaki irouia Ana toro. Ko na bae n tuai n noora anne ni mwamwanangaia taan reirei n te mweenga ao taan ni kakawari n reirei ke n ana tareboon te bitiobi, ma akanne bon Ana kakao bwa e na buokaki ao n reireinaki. Ma e a tia te Uea n tainako ni kamatatai mwiin bwaai ao ni kariaira bwa ti na rinerine bon iroura.
Tera ana reirei ana toro te Uea ae Riaai n reireiniia natina mwaane e a tia ni koaua iroura ni kabane: “Ao ngkai, natiu, I tangiria bwa kam na onimakina te Tia Tei ae Korakora, ao n ongeaba nakon ana tua aika korakora; ao ni kakaonimaki nakon ana taeka, ao rinea te maiu are akea tokina, n aron nanon te Tamnei ae Raoiroi” (2 Nibwaai 2:28).
Ao ma iroun Iakobwa ti karekea te kaunganano aei ni kakoroa nanon kabaeakira ni kakoauaa, n aron ae ti riai, bwa rinean ae ko na reirei irouia mitinare bon rinean te kawai n rin n te maiu are akea tokina, te kabanea ni kakawaki ma ibuakon ana bwaintituaraoi te Atua: “Ma ngaia ae, kakukureia nanomi, bwa kam inaomata ni karaoa oin nanomi—n rinea te kawai nakon te mate are aki totoki ke te kawai nakon te maiu are akea tokina” (2 Nibwaai 10:23).
I kakoaua bwa ti man kariakan ao maiuakinan a na euangkerio ae maiu ae kaokaki Iesu Kristo ae e na uota te rau are e a tia ni berita iai te Uea n te maiu aei ao te kantaninga n te maiu are akea tokina n te aonaaba ae na roko. I kakoaua bwa ti a tia n anganaki te tibwanga ao te katabeaki n anga te koaua ao taian rinerine are e na kairiira nakon kakabwaia nakoia natin Tamara are i Karawa, ake tarira ao mwanera. Iesu bon te Kristo, E maiu, ao aio Ana mwakuri.
Kabwarabwaraaki n te tamnei iroun David Stoker
Ngkana ko kaoia tabeman bwa a na reireinaki irouia mitinare, ko na kona n anga am kakoaua ae a na reirei te koaua ao n anga taian rinerine ake e na karika te kukurei.
Ti riai ni karekea te onimaki bwa e aonga n tau ara tangira ao te euangkerio e a tia n ringa nanora n ae tau bwa e aonga ara kakao n rinerine n ataaki ae roko mairoun te Mwatita are bon ana kakao.
Bwaninin rongorongona mairoun E a Uti, iroun Del Parson