Iai Tamau i Karawa, Ae E Tangirai

Mairoun Cheryl Esplin

“Natin Teuare Moan te Rietata ngkami ni kabaneingkami” Taian Areru 82:6).

Ko na kanga n ataia raoi bwa ngkoe natin te Atua? A mwaiti ataei aika aki ataia ae iai Tamaia i Karawa, ae tangiria ao E kona ni buokiia. A mwaiti ataei ae aki ataia ae a maeka ma Tamara are i Karawa imwaain rokoia nako aon te aba. Aki ataia ae a kona n tataro Nakoina. N ai arom, a tia ni mwaninga bwa e kanga aron te maeka i karawa.

Iai iroumi booki aika tabu, burabeti, te Tamnei ae Raoiroi, ao te utu ae e na reireiniko ao ni kauringko bwa tera aron te maeka ma Tamara are i Karawa bwa natina. A reirei booki aika tabu bwa ko karekei am moan reirei i karawa ao ko katauraoaki bwa ko na nako aon te aba (tara D&C 138:56). A reireinira naba bwa te Tamnei ae Raoiroi “E buobuoki ma tamneira ni kaotiotira bwa natin te Atua ngaira” (I-Rom 8:16). Taian anene aika “Ngai Natin te Atua” ao “I Lived in Heaven” (Children’s Songbook, 2–3, 4), a kona ni kauringko bwa antai ngkoe ao ko roko mai ia.

E tangiriko Tamara are i Karawa bwa ko na uringnga bwa boni Ngaia Taman tamneim; E karikiko. Ngkana ko karaoa am tataro, bubutia Tamara are i Karawa bwa E na buokiko n uringnga bwa ngkoe bon Natina. Te Tamnei ae Raoiroi e kona ni buokiko ni iango ao ni karaoa te mwakuri n ai aron natin te Atua.

Te Waaki ae na Karaoaki

Korea bwain kanikinaean baan te booki are i aon iteraniba R4, ao kanimmwa i aon te beeba ae matenten riki. Rukumma mai nukana. Boota tinanikuna ni kanimmwa n te kuru, ao kabwangabwanga mai i eta. Kabaea te reben ke te karai rinanon te bwangabwanga. Kabongana bwain kanikinaea baan te booki n am boki aika tabu bwa e na kauringko bwa iai Tamam i Karawa, ae kinako, E tangiriko, ao E ongo ao E na kaekai am tataro n taai nako.

Iango ibukin Tibwauaan te Tai

Kabongana Moanrinan 6, iteraniba 2, ni katauraoi korobanna ao taeka aika koreaki i aon mwakorokoro ni beeba ibukin tamneia aomata n te babaire ni kamaiu ao katekei n aron rikiia. Moanna n tuangiia bwa Tamara are i Karawa e tangirira ao e a tia n anganiira te babaire ae kororaoi. Iesu Kristo boni ngaia boton te babaire, ao ngkana ti iriria, ti na kona n oki ni maeka ma Tamara i Karawa. Tibwatibwaia kaain te Moanrinan nakon aua kurubu, ao katoaia n angania tabeia te mwaneka ae kakaokora n aron tein te maiu. Tibwatibwai beeba, bentira ke taian bwai ni kara, koroboki aika tabu ake a na taraaki, ao te anene ke mwaieena ae na karaoaki (ane karinanaki inano). Katoaia kurubu n tuangiia bwa a na wareka aia koroboki aika tabu, ao imwiina korea tamnein te bwai teuana are e riki n te mwaneka teuana n te babaire. Ngkana a tauraoi taian kurubu, ao anga reirei i aon te babaire ni kamaiu n aron taia n riki, ni kabonganaia taian kurubu bwa a na buokiko n anga reirei i aon mwakorona nako. Te maiu imwaiin te maiu ae mamate: D&C 138:56; Moses 4:2; Abraham 3:22–23 (te bwai ae na karaoaki: katean baai ao wirikirikia, “Uraa!”). Te maiu i aon te aba: Abraham 3:24–25; Taekan te Onimaki 1:3 (te anene: “Keep the Commandments,” Children’s Songbook, 146–47). Te aonaaba n tamnei: Aramwa 40:11–14; D&C 138:30–32. Abanuea aika mimitong: teretio—D&C 76:81; teretirio—D&C 76:71; tiretio—D&C 76:92–96 (te anene: “Families Can Be Together Forever,” Children’s Songbook, 188).
Kaota tamnein te tembora. Titiraki: “Tera ae ko iangoia ngkana ko nora te tembora ke tamnein te tembora? Tera n am iango bukin ae a mwakuri korakora aomata ni kawakina te tembora bwa e na tikiraoi ao e na itiaki?” Kabwarabwara bwa te tembora te tabo ae tabu, ae mimitong.

Buokiia ataei ni kamatenanoa 1 I-Korinto 3:16. Kabwarabwara bwa n ai aron te tembora, rabwatara a bon tabu ao a mimitong. Ti riai ni kawakini raoi. Kaota te Kete n Tamnei n te Euangkerio 114 (Taniera ngke e aki butimwaea te Iriko ni Man ao te Wain mairoun te Uea). Taekina te bwai are e riki nakon Taniera ao raoraona ngke a karaoa rabwataia bwa ai aron taian tembora (tara Taniera 1:5–20). Kaoti bwaai aika tei ibukin te matu, amwarake aika raraoi, te kamarurung, te itiaki, ao te aki kamoamoa (katooto: te uninga, te uanikai, te booro, te koom, te neketai). Tuangiia ataei bwa a na kabuti bwaai imarenaia n aia tai n anenea taekan te tembora. Kamwaita katokitokan te katangitang, ao kaoia ataei ake a taui bwaai bwa a na taekina te bwai teuana are a kona iai ni karaoa rabwataia bwa ai aron taian tembora. Kaota am koaua bwa n ai aron te tembora, rabwatara a bon tabu ao a mimitong naba.

Iai Tamau i karawa, ae E tangirai.

“Natin Teuare Moan te Rietata ngkami ni kabaneingkami” (Taian Areru 82:6)

Kabwarabwaraaki n te Korotamnei iroun Dilleen Marsh