Uoua Ana Tai ni Kakabwaiaki
E bitaki maiu n aki toki ngke I nako ma kaainabu nakon te taokita n tuoa bwa te mwaane ke te aine natira are e tabe n rikirake ae tuai ni bungiaki. I tang ni kukurei ngke ti kunea bwa ngaia boni bwebwe. Ma e bitaki rannimatau nakon te bwarannano ngke e kabwarabwara te taokita bwa iai kangaanga nakon marurungia are a karika ae a na aki maiu ni karokoa a korounaia. E taekinna te taokita bwa a na kabwakaaki. E taku neiere te taokita bwa iai kangaanga ngkana e reitinako bikoukou ao N na riai ni karinaki n te onaoraki n te tai teuana.
E ngae ngke iai kangaanga, ma ti baireia bwa e na reitinako bikoukou.
Ngke ti buti n okira mweengara I ataia ae e korakora te kangaanga are ti mena iai. I iangoia bwa N na kanga ni katuka kainabau ma teniman natira aika uarereke ao n tiku n te onaoraki n te tai ae maan. Atakin ae a kona ni bungiaki natira imwain ae a korounaia—ao a na kona ni mate—e riki bwa rawawatau. I aki ataia raoi bwa I kona n rinanon te kataaki aei.
Bon ti imwiin reken te kakabwaia n te nakoanibonga irou mairoun kainabau ao tamana are I a namakina iai te rau. I ataia bwa tao tera te bwai are e na riki, ma a na bon nakoraoi bwaai ibukiu ma au utu. I namakina ana tangira au Tia Kamaiu ao I ataia bwa E na bon raonira n te kukurei ke te nanokawaki.
E aki maan imwiina, ao I kabo ma au utu ao I a rin n te onaoraki ibukin te tai ae aki ataaki maanna. E aki toki ni kakauongoaki burooia natiu ni kakoauaki bwa akea aia kangaanga. E rawawata nanou ngkana I nooria bwa a bwaka aron biribirin ikeiken burooia, ao I tabeaianga ni iangoan teimatoani maiuia bwa ai tera ngke a kona n roko n aia tai ni bungiaki are e taketenaki bwa 34 te wiiki. Ngke ai 25½ aia wiiki, ao e rangi ni kerikaaki aron biribirin ikeiken buroon are temanna, ao e a kuri n toki. E baireia te taokita bwa ngkana e aki okira arona, ao e na kataweaki te korokoro tabeua te miniti man te tai arei bwa a na anaaki man te biroto. E nako nanou ngke I ongo weteakin kainabau iroun te neeti ao e tuangnga bwa I a katauraoaki ibukin te korokoro ao a tauraoi taokita aika taan rabakau n tararuakiia ataei aika tibwa bungiaki.
I ataia bwa I kainnanoa ana buoka Tamau are i Karawa bwa I aonga ni kona n rinanon kataakiu aei. I tataro i nanou, ni bubuti bwa a na marurung natira, bwa aonga n anganaki aia tai n ririkirake ni nneia n te biroto. I tataro naba ibukin karauan nanou. I a manga namakina naba te rau teuana riki te tai, n aron are e reke ngke I anganaki te kakabwaia n te nakoanibong. I aki ataia bwa a na maiu ke a na mate natira, ma I ataia bwa tao tera are e na riki, ao ngkana I rairaki nakon te Uea, E na bon buokai ni uota rawawatau. Te bwai ae riki, bwa e okira arona ikeiken buroon te teei, ao e a aki kainnanoaki te korokoro.
E reitinako tikuu n te onaoraki ibukin uoua namwakaina, ao a mwaaiti taai are I tabeaianga iai ibukin bibitakin biribirin ikeiken burooia natira. Ma te kakukurei, bwa akea mai buakoia bwebwe ae bwaka ikeiken buroona n aron are mai mwaaina. Natira mwaane, John ao Jacob, a bungiaki ngke 33 aia wiiki. A minominotaki kaoia ao waniua timoina, ao John—natira te mwaane are e rangi ni kerikaaki aroni biribirin ikeiken buroona—uoua niran roroana ni kaona. A tiku ara bwebwe n ana tabo te onaoraki are a kaawakinaki iai aika rangi ni mamaara bwa a na tarataraaki kabuebuen rabwataia ao ikeikeia. E ngae ngke iai kangaanga aika irekereke ma ataei aika aki koro unaia, ma John ao Jacob a bon okira mweengaia imwiin 19 te bong.
Ngkai a moanna n nakonako ara bwebwe, ao akea aia kangaanga imwiin aki koron unaia ngke a bungiaki. I kakaitau bwa te bwai are moan riki bwa katakiu e a riki ngkai bwa te kakabwaia ae te kabane ni korakora i nanon maiu. I anganaki uoman natiu mwaane aika marurung, ao au kakoaua ibukin mwaakan te kakabwaia n te nakoanibonga e bon kakorakoraaki. I kakaitau naba bwa I kona n uringa te rau ao te tangira are I namakinna n ataakin ae te Uea e bon ataa arou are I mena iai. I ataia ikanne bwa n reitaki ma ana ibuobuoki te Uea, ti na boni karekea te korakora ni kaitarai katakira.