Ko hono Holoki ‘o e ʻĀ Vahevahe ʻo e Kehekehe ʻi he Lea Fakafonuá
ʻOku tafoki ʻa e kāingalotu ʻi he funga māmaní ki he ʻEikí ke maʻu mei ai ha ngaahi founga ke nau fetuʻutaki ai mo honau kāinga ʻi he ongoongoleleí.
ʻI he hiki ʻa Kasū Holikami ki Hauaiʻi mei hono fonua tupuʻa ko Siapaní ʻi heʻene kei finemui tāutahá, naʻe ʻikai fuʻu fie maʻu ia ke ne ako e lea faka-Pilitāniá. Naʻá ne lea faka-Siapani pē ʻi ʻapi, fai pē ʻene fakataú ʻi he ngaahi feituʻu naʻe lahi lea faka-Siapaní, pea ngāue kimui ai ko ha tokotaha takimamata maʻá e kau folau ʻeveʻeva Siapaní. Ko e lotú pē ʻa e feituʻu naʻe fehangahangai ai mo e taʻefemahinoʻaki ʻi he lea fakafonuá—ko ha meʻa kuo angamaheni ki ai e Kāingalotú. Naʻe lava pē foki ke lata he lotú ko ʻene feohi fakakaungāmeʻa mo ha kau fafine ʻe toko tolu pe fā, ʻa ia naʻa nau poto he lea faka-Siapaní.
Pea ʻi he hili ha taʻu ʻe 25 ʻo e nofo ʻa Sisitā Holikami ʻi Hauaiʻí, naʻe uiuiʻi ia ko e palesiteni ʻo e Fineʻofá ʻi honau uōtí, pea naʻá ne ongoʻi lōmekina ai. Ko ʻene manatu ʻeni ki aí, “Ko e tokolahi taha ʻo e kau fafiné naʻa nau lea faka-Pilitānia pē, pea lea faka-Haʻamoa mo faka-Takāloka atu ha niʻihi. ʻI he taimi ko ʻení kuo lava ke mahino kiate au ha ngaahi lea fakafonua ʻe niʻihi, ka naʻe ʻikai te u maʻu ha lotolahi ke lea ʻaki kinautolú. Neongo naʻe mahino kiate au ʻa e meʻa lahi naʻe lea ʻaki ʻe hoku ngaahi tokouá, ka naʻá ku fifili pe te u lava fēfē ʻo tokoniʻi kinautolu lolotonga iá ʻoku ʻikai te u lava ʻo lea kiate kinautolu.”
Naʻe ʻiloʻi ʻe Sisitā Holikami he ʻikai lava ke ne toʻo ha kalasi lea fakafonua—naʻe ʻikai pē hano taimi ke fai ʻeni. Naʻá ne fakahā ki heʻene palesiteni fakasiteikí ʻa e hohaʻa hono lotó ʻi haʻana ʻinitaviu lekomeni temipale. ʻOkú ne pehē, “Ne u talaange ʻeku manavasiʻí—ʻo ʻikai koeʻuhí pē ko e fatongiá ka ʻi ha hoko ha ngaahi taʻefemahinoʻaki.” Ne kiʻi fakakaukau siʻi ki ai e palesiteni fakasiteikí peá ne talaange kia Sisitā Holikami ke ʻoua ʻe hohaʻa leva ia ki he leá. Naʻá ne pehē ange, “Fai pē hoʻo ngāué ki he lelei taha te ke lavá.” Naʻe palōmesi ange ʻa Sisitā Holikami te ne fai ia.
Hili ha ngaahi ʻaho lahi mei ai lolotonga e ʻi he temipalé ʻa Sisitā Holikamí, naʻe haʻu ki heʻene fakakaukaú ʻa e talanoa ki he luelue ʻa Pita ʻi he funga vaí (vakai, Mātiu 14:22–33). Naʻá ne pehē, “Ne u ʻiloʻi kapau te u kei manavasiʻi ai pē, te u ngoto. Ka ʻo kapau te u tui ki he Fakamoʻuí, te Ne tokoniʻi au ke fakahoko e meʻa ʻoku ngali taʻe malavá.”
Naʻe kamata ʻaki ʻa e “meʻa ngali taʻe malavá,” ha ngaahi feinga faingofua kae mālohi. ʻOku manatu ʻa Sisitā Holikami ki he taimi lahi naʻá ne nofo ai ʻo siofi e tohi taliui ʻa e Fineʻofá. “ ʻI heʻeku sio ki he hingoa ʻo ha fefine ʻe taha, ne u fakatokangaʻi e haʻu ki hoku ʻatamaí ha ngaahi fakakaukau fekauʻaki mo e fefine ko iá, pea ne u ongoʻi hono ueʻi au ʻe he laumālié ʻo kau ki ha ngaahi founga te u lava ʻo tokoniʻi ai iá. ʻI heʻeku muimui ki he ngaahi ueʻi ko ʻení, ne u ofo ʻi heʻeku ʻiloʻi ko e ngaahi fie maʻu fakafoʻituitui mo faka-tāutahá ʻeni.
Naʻe hoko atu ʻene fakamatalá, “Ko e founga ia ne u kamata ʻakí. ʻI ha ngaahi māhina lahi, naʻe hoko e fanga kiʻi ngāue iiki ko iá ko ha ngaahi vā fetuʻutaki naʻe ʻi ai ʻa e tokangá mo e tokoní, ʻo ʻikai ngata ʻi heʻeku tokanga kiate kinautolú, ka naʻa nau tokanga mai foki kiate au.”
Naʻe iku pē ʻo ako lea faka-Pilitānia ʻa Sisitā Holikami, ka ʻoku vave maʻu pē ʻene vahevahe ko e Laumālié—ʻo ʻikai ko e pōtoʻi leá—naʻe tokoni ʻi heʻene ngāué. ʻOku pehē ʻe Sisitā Holikami, “Ne u ʻiloʻi naʻe ʻikai fakangatangata e ngāue ʻa e Laumālié ki ha lea. ʻOkú ne lea kiate kitautolu kotoa ʻi ha ngaahi founga ʻe lava ke mahino kiate kitautolu.”
ʻOku tatau pē kāingalotu ʻo e Siasí ʻi he funga ʻo e māmaní mo Sisitā Holikami, ʻi he aʻusia ʻo e taʻefiemālie mo e taʻelata ʻi he taʻefetaulaki ʻi he leá. Ka ʻoku nau toe tatau pē mo Sisitā Holikami ʻi he lava ke nau kole tokoni mo honau kau takí ki he ʻEikí. Ko ha ngaahi fakakaukau ʻeni ʻoku maʻu mei he kāingalotu mo e kau taki ʻi he māmaní kotoa ke tau lavaʻi ai ʻa e faingataʻa ʻi he fetuʻutakí, tupu mei he faikehekehe ʻa e lea fakafonuá.
ʻIloʻi ʻOku Toki Fika Ua Hake ʻa e Lea Fakafonuá
ʻOku hoko ʻa e faingataʻa tatau ki he Siteiki Felengifeeti Siamané ʻi he faingataʻa ʻo e fetuʻutakí tupu mei he kehekehe ʻa e lea fakafonuá, he ko e haʻu ʻa hono kāingalotú mei ha ngaahi fonua kehekehe ʻe 80 tupu. Ka ʻoku pehē ʻe ʻEkisela Lima, ko e palesiteni fakasiteikí, ʻoku toki fika ua hake ʻa e mahuʻinga ia ʻo e lea fakafonuá.
ʻOku fakamahino mai ʻe Palesiteni Lima, ʻa ia naʻe ʻikai ke lea faka-Siamane hono fāmilí heʻenau fuofua hiki ki Felengifētí, mahalo ko e fakatātā mahino pē ki hení ʻa ʻene fānaú mo e fānau ʻa ha ngaahi fāmili kehe. ʻOkú ne pehē, “Hala ʻatā ke taʻofi ʻenau feohí ʻe he ʻikai ke nau femahinoʻakí. Naʻa nau vaʻinga pē mo e fānau kehé. Naʻe ʻikai mahuʻinga e leá ia kiate kinautolu. Kuo teʻeki ai ke nau ʻilo ʻe kinautolu ʻa e loto-fakamāú mo e ilifiá.”
ʻOku fakatokangaʻi ʻe Palesiteni Lima ko e tokolahi ʻo e ngaahi hoa faifekau mali lea faka-Pilitānia ʻi he uōtí, ʻoku ʻikai ke nau tokanga kinautolu ki he kehekehe ʻa e leá. “ʻOku ʻikai ke lea faka-Siamane ha tokolahi ia ʻo e kau faifekau mali ko ʻení, ka ʻoku nau ʻomi ha ngaahi taukei lahi ʻi he ngāue ʻoku nau faí mo fakahoko ha ngaahi tokoni mahuʻinga. Kuo ngāue ha kau fafine ʻi he nesilií, ngaahi kalasi Palaimelí, pea nau hoko ko ha kau tauhi-laipeli, kau ai mo ʻenau fokotuʻu ha laipeli ʻi ha feituʻu ne teʻeki ai ha laipeli kimuʻa. Kuo hoko ha niʻihi ʻo e houʻeiki tangatá ko ha kulupulita ʻo e kau taulaʻeiki lahí, kau kalake fakapaʻanga, mo ha kau faiako fakaʻapi. ʻOku nau kau atu ki he lēsoní ʻi he ngaahi kalasí (ʻo liliu lea ʻe ha taha ʻenau fakamatalá) pea aʻu pē ʻo nau faiako he taimi ʻe niʻihi.
ʻOku hoko atu e fakamatala ʻa Palesiteni Limá, “Ko e meʻa pē ʻoku faʻa fie maʻu ʻe he kakaí ia ko ha fakavaʻe ʻo e ongoongoleleí ke nau tatau ai. Kuó u mamata ʻi ha fepōtalanoaʻaki ʻi he ngaahi holó, ʻo ʻikai ke ʻilo ʻe he ongo meʻá ʻa ʻena takitaha lea, ka naʻá na kei femahinoʻaki pē kinaua. Te ke lava ʻo fakahoko ki he niʻihi kehé ʻa e ngaahi meʻa mahuʻingá neongo pe ko e hā e lea ʻoku fakaʻaongaʻí: ʻOku ou ʻofa ki he ʻEikí. ʻOku ou tokanga ki hoku kāingá. ʻOku ou ʻi hení ke tokoni.’
Tokoniʻi e Kakaí ke Nau Ongoʻi Lata
ʻI he taimi lahi, ʻoku lava pē ke tokoniʻi ʻe he ngaahi uōtí mo e ngaahi koló ʻa e kakaí ʻi ha founga te nau ongoʻi lata ai. Hangē ko e Uooti Mekalí ʻi he Siteiki Honolulu Hauaiʻí, ʻoku akoʻi e Lautohi Faka-Sāpaté ʻi ha lea fakafonua kehekehe ʻe valu (lea faka-Sukisi, Pilitānia, Siapani, Kōlea, Māsolo, Ponapei, Sipeini, mo faka-Takāloka) ke lava e kāinglotu tokolahi ʻo fanongo ki hono akoʻi ʻo e ongoongoleleí ʻi heʻenau lea fakafonua pē anautolú. ʻIkai ngata aí, ko kinautolu ʻoku ui ke lotu ʻi he houalotu sākalamēnití pe ʻi he ngaahi kalasí, ʻoku nau lotu ʻi heʻenau lea fakafonua pē ʻanautolú ʻo kapau ʻoku teʻeki ai ke nau mateuteu ke lotu ʻi he lea fakafonua ʻoku ngāue ʻaki ʻe he konga lahi ʻo e kāingalotú.
Neongo ʻoku fakahoko ha ngāue mahuʻinga ʻe he ngaahi vahevahe kalasi ʻa e Lautohi Faka-Sāpaté, ka ʻoku feinga pē ʻa e Uooti Mekalí ke palani ha ngaahi ʻekitivitī ke fakatahatahaʻi mai ʻaki ʻa e tokotaha kotoa pē. ʻOku fakahoko maʻu pē ʻa e ngaahi polokalama hangē ko e fakafiefia fakataʻu ʻoku fakaʻaliʻali ai e ngaahi meʻakai fakafonuá, ngaahi faiva fakafonua ʻoku fakaʻaliʻali ʻi he Mutualé, ko ha kuaea ʻa e Kau Maikolonīsiá (ke ua ʻaki e kuaea ʻa e uōtí), mo ha “ohana night” (pō fakafāmili) ʻoku fakahoko fakakuata e he uōtí, ʻo fakamanatu ai ʻe he kāingalotú honau ngaahi ʻulungāanga fakafonua tukufakaholó pea tumutumu ʻaki honau tukufakaholo fakalaumālie ʻoku nau faitatau aí.
ʻOku pehē ʻe Mālio Lopesi, ko e pīsope ʻo e Uooti Mekalí, “Ko e fānau kotoa kitautolu ʻa ʻetau Tamai Hēvaní. ʻOku ʻikai ha faikehekehe ʻi he matakalí pe ʻi he leá ʻi Hono ʻaó. ʻOku maʻá e tokotaha kotoa pē e ʻofa ʻa e ʻOtuá, pea ko kitautolú ko ha ngaahi meʻangāue pē ke akoʻi ʻa e moʻoni ko ʻení.”
Ohi e Anga Fakafonua ʻa e Fonua ʻOkú ke Nofo Aí
Neongo e fakaʻamu ʻa ha kakai tokolahi ke nau kei poto lelei pē ʻi heʻenau lea fakafonuá mo e ngaahi konga fakaʻofoʻofa ʻo honau anga fakafonuá, ka ʻe toe ʻaonga pē foki ki he kāingalotú ke nau ako ʻa e lea mo e anga fakafonua ʻo e feituʻu ʻoku nau nofo ai he taimi ní. ʻOku poupouʻi ʻeni ʻe Palesiteni ʻĒliki Malaniteini ʻo e Siteiki Pālesi Falanisē Hihifó he ʻoku ʻi ai ha kāingalotu mei he ngaahi feituʻu kehekehe ʻo māmani ʻi hono siteikí. ʻOku pehē ʻe Palesiteni Malaniteini, “ʻOku angamaheni ʻaki hono poupouʻi ʻe he kau takí ʻa e kāingalotu ʻoku nofo hení ke nau ako e lea faka-Falaniseé. ʻE lava ke tokoniʻi ai kinautolu ke nau fakalakalaka fakapalofesinale, fakatāutaha, mo fakalaumālie.”
ʻOku poupouʻi foki e kāingalotu ʻo e Siteiki Seni Felenisisikou Kalefōnia Hihifó ke nau fakatupulaki mo ha toe ngaahi taukei makehe ʻi he ngaahi lea fakafonuá. ʻOku fokotuʻu ʻi he siteikí ha ngaahi ʻiuniti makehe ʻe tolu, makehe ia mei he ngaahi uooti lea faka-Pilitāniá (ʻa ia ʻoku nau lea faka-Siaina, Haʻamoa, mo faka-Takāloka), ke lava ʻo akoʻi ʻa e ongoongoleleí ki he kāingalotu ʻoku nau lea ʻaki e leá ni ʻi heʻenau lea fakafonua pē ʻanautolú. Ka ʻoku poupouʻi ʻa e kāingalotú ʻe he kau taki fakasiteiki mo fakauōtí ke nau kau ki ha ngaahi kulupu ʻoku ako ai ʻa e fetalanoaʻakí. ʻOku fakataha tuʻo ua e fanga kiʻi “kulupú” he uike kotoa ke ako ki he fetalanoaʻaki he lea faka-Pilitāniá. ʻOku fakatefito e ngaahi lēsoní ki hono ako e ngaahi kupuʻi lea hangē ko e “Te u aʻu fēfē ki falemahaki?” pe “Ko e fē ʻa e tauʻanga pasi ofi taha maí?” Pea koeʻuhí ko e tokolahi ʻo e kāingalotu he siteikí ko e ʻuluaki toʻu tangata kinautolu ke kau ki he Siasí, ʻoku nofo taha leva e ngaahi lēsoni faka-Pilitānia ʻe niʻihi ʻi he ngaahi meʻa tefito ʻo e ongoongoleleí, hangē ko e lotú pe ko hono tataki ʻo e efiafi fakafāmili ʻi ʻapí.
ʻOku pehē ʻe Loni Tilenitā, ko e palesiteni fakasiteikí, “Ko ha tukupā mahuʻinga kiate kimautolu ʻa e meʻa ko ʻeni fekauʻaki mo e lea fakafonuá, ka ʻoku mau ngāue ki ai, pea ʻoku ʻalu pē taimí mo e fakaʻau ke toe lelei ange ʻemau fakahoko iá. ʻE kei hokohoko atu pē ʻemau ngāué, akoʻi, mo fakaʻatā ʻa e faingamālie ki he kāingalotú ʻi he ngaahi konifelenisi fakasiteikí, fakaʻaliʻali talēniti fakasiteikí, fakataha akó, mo e polokalama kotoa pē ʻoku faí. ʻOku mau loto ke aʻusia ʻe he tokotaha kotoa pē ʻa e meʻa kotoa ʻoku lava ke ʻomi e he Siasí mo e ongoongoleleí maʻanautolú. ʻOku mātuʻaki mahuʻinga ʻaupito ia.”
Ngāue Fakataha
ʻOku pehē ʻe Palesiteni Peleni ʻOloseni ʻo e Siteiki Filatelifia Penisolovēniá, ʻoku lahi e ngaahi meʻa ʻoku faingataʻa hono fakahokó tupu mei he kehekehe ʻa e lea fakafonuá, ʻo kamata pē mei he ngaahi ʻinitaviu lekomeni temipalé ʻo aʻu ki hono liliu ʻo e ngaahi lea mo e ngaahi lotu ʻi he houalotu sākalamēnití. Ka ko e lelei lahi ʻeni kuo hoko ki he kāinglotu ʻo e siteikí koeʻuhí pē ko hono ngāue ʻaki ʻo e faʻa kātakí mo hono talitali lelei kinautolú.
ʻOku pehē ʻe Palesiteni ʻOloseni, “ʻOku ʻi ai ha kaveinga ʻoku mau toutou lea ʻaki maʻu pē ʻi homau siteikí: ko hai pē ʻe hū mai ʻi he matapā ʻo e falelotú, ko e fekauʻi mai ia ʻe he ʻEikí. ʻI he taimi ʻoku mau fakaʻaongaʻi ai ʻa e ʻulungāanga ko ʻení ki hono tali lelei ʻo e kakaí, ʻoku mau ʻiloʻi ʻoku ʻikai fakakavenga ʻa ʻemau feinga mavahe ko ia ke tokoniʻi ʻa e tokotaha kotoa peé. Ko hano moʻui ʻaki pē ia ʻo e ongoongoleleí.”
Neongo ʻoku lea faka-Pilitānia ʻa e Uooti Kelenitoni ʻo e Siteiki ʻAokalani Nuʻu Sila Manuleuá, ka ʻoku toe fakaʻaongaʻi pē ʻe he kāingalotú ʻa e lea faka-Maulí, Niuē, Haʻamoa, Tonga, faʻahinga lea ʻoku fakaʻaongaʻi fakalotofonuá, mo e ngaahi lea kehekehe ʻoku fakaʻaongaʻi ʻi he ʻOtu Motu Kukí. ʻOku pehē ʻe Pīsope Hānisi Kī ʻoku feinga ʻa e kau taki fakauōtí ke nau hangē ko e Tauhisipi Leleí, ʻa ia ʻokú ne ʻiloʻi ʻa e tokotaha kotoa pē ʻi Heʻene tākangá—“ʻo tatau ai pē pe ko e lea fē ʻoku nau lea ʻakí.”
Hangē ko ʻení, ʻi hono fakakaukauʻi ʻi he faʻa lotu ʻa e kau faiako fakaʻapí mo e kau faiako ʻaʻahí, ʻe fokotuʻutuʻu leva ke hoa ha tangata ʻoku lea ʻi heʻene lea fakafonua pē ʻaʻaná mo ha tangata ʻokú ne lea ʻaki e lea ko iá mo e lea faka-Pilitāniá foki. ʻI he ngāue fakataha ʻa e ongo tangatá ʻi he faiako fakaʻapí, ʻoku ongoʻi fiemālie leva ʻa e tangata ʻuluakí ke lea faka-Pilitānia. Te ne toki lava ʻo tali ʻamuiange ha fakaafe ke ne lea ʻi he houalotu sākalamēnití.
ʻIloʻi ʻOku Fakafeʻungaʻi Kitautolu ʻe he ʻEikí Ki Heʻene Ngāué
Naʻe kau ʻa Felenisisikou ʻEasi Heminekilitou ki he Siasí ʻi hono taʻu 21ʻi Lio ti Sinelo ʻi Palāsila ʻa ia naʻá ne tupu hake aí, pea toki ngāue fakafaifekau kimuiange ʻi Sā Paulo. Hili ʻene mali mo hono uaifi ko Keliá, naʻá na hiki ki Senē ʻi ʻAositelēlia ʻi he 2002. Naʻe uiuiʻi ʻa Felenisisikou ko e palesiteni ʻo e kolo ko Haiti Paʻaké maʻá e kakai lalahi kei talavoú. Naʻe ʻikai ngata pē he ongoʻi lōmekina ʻe Palesiteni Heminekilitou koeʻuhí he naʻá ne kei akoako lea faka-Pilitānia peé, ka ko e haʻu ʻa e kāingalotu ʻo e koló mei ha ngaahi fonua kehekehe ʻe 10 tupu, pea ko honau tokolahí foki naʻe kei ako lea faka-Pilitānia.
ʻOku pehē ʻe Palesiteni Heminekilitou, “Naʻa mau ongoʻi taʻefeʻunga ʻi he taimi ne uiuiʻi ai kimautolu ke tokangaʻi e Kolo ko Paʻake Haití. Hangē ne hā faingataʻa fēfē fau e fetuʻutakí ʻi he kehekehe ʻa e ngaahi lea fakafonuá, pea mau lotu ai ki he ʻEikí ʻo kole ʻEne tokoní. Ka ʻoku ou ʻiloʻi ʻoku hanga ʻe he ʻEikí ʻo ueʻi, ngaohi kitautolu ke tau taau, mo fakamālohia ʻa kinautolu ʻoku ngāue ʻi hono langa hake Hono puleʻangá.”
ʻIkai ngata pē ʻi hono ʻiloʻi ʻe Palesiteni Heminekilitou hono tataki ʻe he ʻEikí ʻa ʻene moʻuí, ka ʻokú ne mamata ki he hoko ia ʻi he moʻui ʻa e kāingalotu ʻo e koló—ʻa ia ko e konga ʻo kinautolu ko e toʻu tangata ʻuluaki kinautolu ke kau ki he Siasí, ʻo hangē pē ko iá.
ʻOkú ne pehē, “ʻOku ʻi ai pē ʻuhinga naʻe ʻomi ai kitautolu ki heni ʻi he vahaʻataimi ko ʻeni ʻo ʻetau moʻuí.” ʻOkú ne pehē ʻoku ʻi ai ʻa e faingamālie ʻo e mēmipa takitaha ke tupulaki ʻene fakamoʻoní, fua ha ngaahi fatongia, pea ʻinasi mo hono ngaahi kaumeʻá mo e niʻihi ʻoku ʻofa aí ʻi he pōpoaki ʻo e ongoongoleleí.
ʻOku pehē ʻe Palesiteni Heminekilitou, “ʻOku mau tui ʻoku lolotonga fakakakato ʻa e ngaahi kikite ko ia fekauʻaki mo hono fakafonu ʻo e māmaní ʻe he ongoongoleleí. ʻOku hoko pea ʻe hoko ʻa e kāingalotu ʻo e koló ko ha kau taki ʻi ha feituʻu pē te nau ō ki ai he māmaní. Ko ha faingmālie maʻongoʻonga ke tokoni ʻi hono teuteuʻi ʻo e kau taki ko iá, ʻa ia ʻoku mau fakahoko ʻi he taimi kotoa pē ʻoku mau akoʻi mo fakatupulekina ai e kāingalotu ʻo e koló.”
Loto Taha mo Fakakaukau Taha
ʻOku pehē ʻe Pīsope Hānisi Kī ʻo e Uooti Kelenitoní, “ʻOku ou tui ko ha tāpuaki kae ʻikai ko ha faingataʻa, ke tokoni mo ngāue ʻi ha uooti ʻoku kehekehe ʻaupito ai ʻa e ngaahi anga mo e lea fakafonuá. Naʻe veuveuki ʻe he ʻOtuá e lea ʻa e kakaí lolotonga hono langa ʻo e Taua ʻo Pēpelí, ka te tau lava ʻo faifeinga ki he meʻa naʻe lavaʻi ʻe he kakai ʻi he kolo ʻo ʻĪnoké: ke nau loto-taha pē mo fakakaukau taha pea nofo ʻi he māʻoniʻoni.” (Vakai, Sēnesi 11:1–9; Mōsese 7:18.)
Naʻe toe fakamamafaʻi foki ʻe Palesiteni Kōtoni B. Hingikelī (1910–2008) ʻa e uouangataha ko iá: “Kuo tau hoko ko ha Siasi kuo mafola ʻi he funga ʻo e māmaní, pea kuo lava ʻeni ʻe ha konga lahi ʻo hotau kāingalotú ʻo kau mai … ko ha fāmili pē ʻe taha, ʻoku nau lea ʻaki ha ngaahi lea kehekehe ʻi he ngaahi fonua lahi, ka ko e tui pē ʻe taha ʻa kitautolu, mo e tokāteline mo e papitaiso pē ʻe taha.”1
Naʻa mo e taimi ʻoku ʻikai ngāue ʻaki kotoa ai ʻe he kāingalotu ʻo e ngaahi uōtí mo e ngaahi koló ʻa e lea tataú, te nau kei lava pē ke holoki ʻa e ngaahi ʻā vahevahé pea hoko ʻo uouangataha.
Ngaahi tā fakatātā ʻa Cary Henrie