Haʻu ʻo Fanongo ki he Leʻo ʻo e Palōfitá

Ko ha Kakai ʻe Toko Fiha ʻe Lava Ke Tau Tokoniʻí?

Fai ʻe Palesiteni Thomas S. Monson

Mei ha lea naʻe fai ʻi he Coalition for Utah’s Future, Common Good Awards Luncheon, 25 ʻo ʻOkatopa, 2000.

ʻOku pehē ʻe Palesiteni Monisoni ʻoku tokolahi e kakai ʻi māmani ʻoku fie maʻu tokoní. ʻOkú ne pehē ko e finangalo ia ʻo e Tamai Hēvaní ke tau fakatokangaʻi kinautolu pea vakai pe ko e toko fiha ʻe lava ke tau tokoniʻí.

ʻI he taimi ʻoku tau maʻu ai ʻa e mata ke mamata mo e telinga ke fanongó, te tau ʻiloʻi ʻa e ngaahi fie maʻu ʻa hotau kāinga ʻoku kole tokoní.

Te nau kai fēfē—taʻe ʻi ai ha meʻakai? Te nau māfana fēfē—taʻe ʻi ai ha vala? taʻe ʻi ai ha nofoʻanga? Te nau moʻui fēfē—taʻe ʻi ai ha meʻa ke nau moʻui ai? ʻE faitoʻo fēfē kinautolu—taʻe ʻi ai ha kau toketā, faitoʻo, mo ha ngaahi falemahaki?

ʻOku ou tui ʻi he taimi te tau fehangahangai ai mo ʻetau Tamai Hēvaní, te Ne fehuʻi mai, “Ko e kakai ʻe toko fiha naʻá ke tokoniʻí?”

Fakatauhoa e tokotaha takitaha ʻoku fie maʻu tokoní mo ha ngaahi meʻa ʻe ala fie maʻu ʻe he tokotaha ko iá.

Kakai ʻOku Fie Maʻu Tokoní

Palesiteni Monisoni mo e Taimi Ne Tō Lalo ai e Tuʻunga Fakapaʻangá

Naʻe fāʻeleʻi ʻa Palesiteni Tōmasi S. Monisoni ʻi he 1927. Naʻe kamata ke Tō Lalo e Tuʻunga Fakapaʻangá ʻi hono taʻu uá. Naʻe faingataʻa ke maʻu ha ngāue ʻa ha kakai tokolahi. Naʻe faingataʻa ke nau maʻu ha paʻanga feʻunga ke fakatau ʻaki ha meʻakai. Naʻe ʻikai maʻu ʻe ha niʻihi ʻo e ngaahi kaungāmeʻa ʻo Palesiteni Monisoní ha vala māfana he taimi momokó pe ha meʻakai feʻunga ke nau kai.

Lolotonga e taimi ko ʻeni ʻo e Tō Lalo ʻa e Tuʻunga Fakapaʻangá, ne fononga lēlue holo ha kakai tangata tokolahi ʻi he ʻIunaiteti Siteití ʻo kumi ngāue. Naʻe ofi e ʻapi ʻo Palesiteni Monisoní ki he halanga lēlué. Taimi ʻe niʻihi naʻe faʻa hifo ai ha kau tangata mei he lēlué ʻo tukituki he matapā ʻo e ʻapi ʻo e fāmili Monisoní ko e kole meʻakai. Naʻe ʻoange maʻu pē ʻe he faʻē ʻa Palesiteni Monisoní ha meʻa ke nau kai. Naʻá ne fekau foki hono fohá ke ʻalu ʻo ʻave ha peleti meʻakai mafana ki hanau kaungāʻapi naʻe masiva.

Naʻe ngata e taimi ne Tō Lalo ai e Tuʻunga Fakapaʻangá ʻi he 1939, ʻa ia ko e taʻu 12 ia ʻo Palesiteni Monisoní.

Naʻá ke ʻIloʻi Koā?

ʻE lava ke tokoni e fānau mo e kakai lalahi ʻo e ʻaho ní ki he kakaí ʻaki hono fai ʻo e ngaahi tokoni ʻofa fakaetangata ki he Siasí ʻo hangē pē ko e tokoni ʻa e faʻē ʻa Palesiteni Monisoní ki he kakai faingataʻaʻiá ʻi he ngaahi taʻu lahi kuo hilí. Te ke lava ʻo faʻo hoʻo tokoní ʻi he sila vahehongofulú pē pea ʻave ia ki hoʻo pīsopé pe palesiteni fakakoló. ʻE tokoni e paʻanga ko ʻení ki he kakai ʻi he funga ʻo e māmaní. Naʻe foaki ʻe he Siasí ha tokoni ki ha kakai ʻe toko fā miliona nai ʻi he ngaahi fonua ʻe 85 ʻi he 2007. Ko e ngaahi founga ʻeni naʻe tokoni ai e Siasí:

Ngaahi nāunau fie maʻu fakavavevavé—fonua ʻe 45

Tokoni ki he mofuiké—fonua ʻe 5

Tokoni ki he tāfea mo e matangí—fonua ʻe 34

Tokoni ʻi he velá—fonua ʻe 6

Vai maʻá—fonua ʻe 25

Sea teketeké—fonua ʻe 60

Matasioʻatá—fonua ʻe 11

Huhu maluʻi mīsele ʻo e fānaú—fonua ʻe 10

Ako ke tokoniʻi e kau toketaá mo e kau nēsí ʻi hono tokangaʻi ʻo e kau pēpē valevale toki fāʻeleʻi ʻoku puké—fonua ʻe 23

Ngaahi tā fakatātā ʻa Adam Koford; tā ʻo Palesiteni Monisoní naʻe fai ʻe Craig Dimond