Nofo Heni!
ʻOku fakafiefia maʻu pē kiate au ʻeku fakataha mo hoku fāmilí. Ko ʻeku ngāué ko e ʻenisinia ʻi he halanga lēlué pea ʻoku taʻepau maʻu pē ʻeku taimi-tēpilé. ʻOku ou faʻa hiki ki ha ngaahi feituʻu mamaʻo ʻo hoko ai ʻeku mavahe mei hoku uaifí mo e fānaú. Lolotonga e ngaahi taimi pehení, ʻoku ou sio pē kiate kinautolu ʻi ha ngaahi ʻaho siʻi ʻi he uike takitaha—pea ʻi he hili haʻaku fakaʻuli lōloa ki ʻapí.
Lolotonga e taha ʻo hoku ngaahi taimi mālōloó, naʻe ʻalu ange hoku uaifí, ʻa Sikālete, mo homa ongo fohá ʻo ʻaʻahi kiate au. Naʻe fiefia homa ongo fohá he mohe ʻi he loki he mōtelé mo kai falekaí. Naʻe hoko e ʻaʻahi ange ko ʻení ko ha ʻeveʻeva kiate kinaua. Naʻe taimi nounou pē ʻemau feʻiloaki fiefia ko ʻení kuo mau feʻiloaki mo lea fakamāvae. Ne u sio ʻi heʻeku sioʻata muí ki he puli atu e kā ʻa Sikāleté ʻo lele ia ki he tafaʻaki ʻe tahá ka u lele au ki he tafaʻaki ʻe tahá. Ne u foki ki he halanga lēlué kae foki a Sikālete ia mo ʻema fānaú ki ʻapi.
Ne u malimali heʻeku fakakaukau ki hoku fāmilí peá u fakakaukau ke u telefoni kia Sikālete ʻo toe fakamālō ki ai heʻenau ʻaʻahi mai kiate aú. Ne u ala hifo ki heʻeku telefoni toʻotoʻó he kato hoku koté ka naʻe ʻikai ke ʻi ai. Hili haʻaku kumi kae ʻikai ke maʻu, ne u ʻiloʻi kuo pau pē naʻe ʻi he kā ʻa Sikāleté ʻa e telefoní.
Ne u fakaʻaongaʻi ʻeku telefoni toʻotoʻó ke tā ai ki hoku fāmilí, ka naʻe toe ʻaonga foki ki heʻeku ngāué. Kuo ʻosi ʻa e miniti ʻe 10 ʻema takitaha fakaʻuli mo hoku uaifí ki ha ongo feituʻu kehekehe, ka naʻá ku ʻiloʻi ʻoku fie maʻu ke fakafoki mai ʻeku telefoní. Ne u fakakaukau ke u lele ki he hala hoko maí ʻi ʻolunga, ʻo u tafoki mai ki he tafaʻaki ʻe tahá, peá u feinga ke u tulituli ʻo maʻu atu ia. ʻI he teuteu ke u tafokí, hangē pē ne u fanongo ki ha pehē mai ha leʻó, “Tuʻu!”
Ne kamata ke holo ʻeku lelé, neongo ko e momeniti kotoa pē ne ʻosi atu naʻe toe faingataʻa ange ai hono maʻu mai ʻeku telefoní.
Ne hoko mai mo ha fakakaukau ko hono uá ia: “Nofo heni!”
Ne ʻalu hake ʻiate au ʻa e ongo mālohi ko ʻení. Naʻe ʻikai ke u toe fakaʻuhinga ka u afe ki he tafaʻakí ʻo tamateʻi e kaá. Naʻe ʻikai te u ʻilo hono ʻuhinga naʻá ku tuʻu aí ka naʻá ku ongoʻi pē naʻe totonu ke u fai ia. ʻI heʻeku talangofua ki he meʻa ne u ongoʻi ko ha ueʻi mei he Laumālie Māʻoniʻoní, ne u ongoʻi hono fetongi ʻe he loto-hohaʻá ʻa e nongá. Ne u fai ha lotu ʻi he loto-fakatōkilalo, ʻo fakamālō ʻi he tataki mo e fakahinohino ʻa e Tamai Hēvaní.
Taimi siʻi pē mei ai kuó u sio atu ʻoku lele hangatonu mai ʻa Sikālete. ʻI heʻene sio mai kiate aú, naʻá ne taʻofi fakavave ʻa e meʻalelé pea lue mai kiate au ʻokú ne toʻo mai ʻa e telefoni toʻotoʻó.
“Naʻá ke ʻilo fēfē ke ke tuʻu ʻo talí?” ko ʻene fehuʻí mai ia.
Naʻá ma fakatē loʻimata he fiefiá ʻi heʻeku fakamatala ange ʻeku maʻu e ngaahi ueʻi mei he Laumālie Māʻoniʻoní.
Ne u manatuʻi maʻu ai pē ʻa e meʻa ko ʻeni naʻe hokó, pea he ʻikai te u teitei lava ʻo fakaʻikaiʻi ʻa e tokoni fakalangi ne u maʻu ʻi he ʻaho ko iá. Naʻá ne fakamālohia ʻema fakamoʻoni ʻoku ʻafioʻi ʻe he Tamai Hēvaní ʻa e fanga kiʻi mingimingiʻi meʻa kotoa pē ʻi heʻetau moʻuí. ʻOku ou feinga ke u kei moʻui taau ke maʻu ʻa e fakahinohino tatau pē ko ia ne u maʻu ʻi he ngaahi taʻu lahi kuo hilí.
Naʻe ʻikai te u ʻilo hono ʻuhinga ne u tuʻu aí, ka naʻá ku ongoʻi pē naʻe totonu ke u fai ia.