Ko e Malimali ke Vahevahe
“Ke mou fiefia, pea ʻoua ʻe manavahē, he ko au ko e ʻEikí ʻoku ou ʻiate kimoutolu, pea te u tuʻu ʻi homou tafaʻakí” (T&F 68:6).
Ko e hā e meʻa naʻá ke ako he Palaimelí he ʻaho ní, Sasa?” ko e fehuʻi ange ia ʻa e Fineʻeikí ʻi heʻena foki mei he lotú ki honau ʻapí.
Naʻe pehē ange ʻe Sasa, “Naʻe akoʻi kimautolu ʻe Sisitā Tafi ʻo kau ki ha ngaahi meʻaʻofa makehe ʻoku ui ko e ngaahi talēnití. Naʻá ne pehē naʻe foaki mai ʻe he Tamai Hēvaní ha ngaahi talēniti maʻatautolu kotoa koeʻuhí ke tau lava ʻo tokoni ki he kakai kehé. Naʻá ne pehē ʻe fiefia e kakaí ʻi he taimi ʻoku tau vahevahe ai mo kinautolu hotau ngaahi talēnití.”
Naʻe pehē ange ʻe he Fineʻeikí, “ʻOku moʻoni ia. Naʻe akonaki ʻa Sīsū ʻoku totonu ke tau fakaʻaongaʻi hotau ngaahi talēnití ke tokoni ki he kakai kehé.”
Naʻe tangutu fakalongolongo pē ʻa Sasa ʻo sio ki tuʻa he matapaá. “Fineʻeiki, fēfē ʻa Loleini?” ko ʻene fehuʻí ange ia.
Naʻe fehuʻi ange ʻe he Fineʻeikí, “He ʻoku hā ʻa Loleini?”
“ʻOku ʻikai te ne lava ia ʻo ʻalu, pea ʻoku heka sea teketeke pē. Ko e hā ha faʻahinga talēniti ʻokú ne maʻu ke ne lava ai ʻo tokoni ki ha niʻihi kehe?”
“Ko e hā e ʻuluaki meʻa ʻokú ke fakatokangaʻi kau kia Loleini he taimi ʻokú ke sio ai ki aí?”
Naʻe kiʻi fakakaukau siʻi ʻa Sasa peá ne pehē ange, “Ko ʻene malimalí. ʻOku malimali maʻu pē ʻa Loleini.”
Ne pehē ange ʻe he Fineʻeikí, “ʻOku moʻoni ia. Mo e hā?”
“ʻOkú ne kata maʻu pē. Kae tautefito ki he taimi ʻoku mau hiva aí pe ko haʻane fanongo ki he pianó. ʻOkú ne fiefia maʻu pē. Pea ʻokú ne taʻalo maʻu pē ki he kakaí.”
“Ko e hā e ongo ʻokú ke maʻu ʻi he taimi ʻokú ke fakataha ai mo Loleiní?” Ko e fehuʻi ange ia ʻa e Fineʻeikí.
“Fiefia. ʻOku ou fiefia maʻu pē heʻeku nofo mo Loleiní,” ko Sasa ange ia.
Naʻe pehē ange ʻe he Fineʻeikí, “Mo au pē. Ko e taha ia ʻo e ngaahi talēniti ʻo Loleiní. ʻOkú ne vahevahe ʻene ʻofá mo ʻene fiefiá mo kinautolu kotoa pē ʻoku feohi mo iá. Ko e taha ia ʻo hono ngaahi talēniti makehe tahá.”
Ngaahi tā fakatātā ʻa Natalie Malan