Ko Hono Tataki ʻo e Ngaahi Fealēleaʻaki Fakakalasí
Naʻe fai ʻe Misa Sionisoni ha fehuʻi ki he kalasi Tokāteline ʻo e Ongoongoleleí. Ne kiʻi lōloa e fakalongolongó ʻo tupu ai ʻene ongoʻi taʻefiemalie mo e kalasí. Ko au naʻe palesiteni Lautohi Faka-Sāpaté, pea naʻá ku ʻi ai ke vakaiʻi e kalasí, ʻo u fakatokangaʻi ʻi he kamata pē ke tali hake ha niʻihi ʻo e kalasí, naʻe toe tali pē ʻe Misa Sionisoni ia ʻa e fehuʻí pea hoko atu ia ki he konga kehe ʻo e lēsoní.
ʻE lava pē ke hoko ʻeni ʻi he ngaahi kalasi ʻa e Siasí mo ʻetau faiako ʻi hotau ngaahi ʻapí. Kuó u ʻiloʻi ʻoku ʻi ai ha meʻa ʻe ua ʻoku mahuʻinga ke fakaʻaiʻai ʻaki e ngaahi fealēleaʻaki fakakalasí: (1) fai e ngaahi fehuʻi ko ia ʻe ʻi ai ha tali ʻe ua pe lahi ange ki aí pea (2) ʻoange ha taimi feʻunga ki he kalasí ke nau fekumi pe fakakaukauʻi ha tali.
Fai e Ngaahi Fehuʻi ʻOku ʻIkai Taha pē ʻa e Tali Ki Aí
ʻE hanga ʻe hono fai ʻo e faʻahinga fehuʻi totonú ʻo fakatupu ha fealēleaʻaki fakakalasi lelei. ʻOku fonu e ngaahi tohi lēsoni ʻa e Siasí ʻi he ngaahi lēsoni kuo ʻosi fokotuʻutuʻu fakalelei ke fakalotolahiʻi ʻaki e kalasí ke nau fekumi ʻi he ngaahi akonakí ki ha tali pe ke nau fakalaulauloto pea fakaʻaongaʻi e meʻa kuo nau akó.
Te ke lava ʻo fai e ngaahi fehuʻi ko ia ʻe fie maʻu ke fekumi ai e kau akó ʻi he folofolá pe ngaahi lea ʻa e kau ʻaposetolo mo e kau palōfita ʻo e ngaahi ʻaho kimui ní ke maʻu mei ai ha fakamatala. Ko ha sīpinga ʻeni ʻe ua ʻo e ngaahi fehuʻi ke fai ai ha fekumí ʻo makatuʻunga ʻi he ngaahi fokotuʻu ki hono akoʻí ʻi he Ngaahi Akonaki ʻa e Kau Palesiteni ʻo e Siasí: Siosefa Sāmita: “Ako e kamataʻanga ʻo e vahé ʻi he peesi 53. Ko e hā kuo fai ʻe he Fakamoʻuí ka tau lava ai ʻo hoko ko e kau ʻea-hoko fakataha mo Ia?” pea “Toe fakamanatu e kamataʻanga ʻo e vahé he peesi 242. Ko e hā naʻe akoʻi ʻe Siosefa Sāmita ʻo kau ki hono mahuʻinga ʻo e maʻu ha sino fakamatelié?”
ʻOku kole ʻe he ngaahi fehuʻi ʻe niʻihi ki he kalasí ke nau fakakaukau ki he ʻuhinga ʻo e meʻa kuo nau laú pe fakaʻaongaʻi ʻi heʻenau moʻuí e ngaahi meʻa kuo nau akó. ʻOku toki faʻa fai pē ʻa e ngaahi fehuʻi ko ʻení hili hono ʻiloʻi ʻe he kalasí ʻa e ngaahi meʻa naʻe fakamatala he lēsoní. Hangē ko ʻení, hili hono fai ʻo e ngaahi fehuʻi ʻi ʻolungá ke fai e fekumi ki aí, te ke lava ʻo fai e ngaahi fehuʻi ko ʻení ke tokoni ki he kalasí ke nau fakakaukau ki he meʻa kuo nau laú pea nau fakaʻaongaʻi ia: “Ko e hā ha ngaahi founga ʻe lava ke tau fakahā ʻaki ki he ʻEikí ʻetau houngaʻia Heʻene feilaulau fakaleleí?” pe “ʻE tokoni fēfē ha mahino kiate kitautolu ʻa hono mahuʻinga ʻo ʻetau maʻu ha sino fakamatelié, ki he founga ʻoku tau tauhi ʻaki hotau sinó?”
Tatali ke Fai Mai e Tali ʻa e Kau Akó
Ko e hā pē ha ngaahi fehuʻi te ke fai, ʻoange ha taimi feʻunga ki he kalasí ke nau fekumi pe fakakaukau ki he talí. ʻE ako e kau akó ke tali e ngaahi fehuʻí ʻo kapau te nau ʻiloʻi he ʻikai te ke tali pē ʻe koe ʻa e fehuʻí.
Hili e meʻa ne u mamata ai he kalasi ʻa Misa Sionisoní, ne u fakapapauʻi te u siofi angé pe ko e hā hono fuoloa e tatali ʻa e kau faiakó ki ha tali hili ʻenau fai ha fehuʻi. Ne u ʻiloʻi ai ʻoku tatali pē e kau faiako ia ʻe niʻihi ʻi ha sekoni ʻe ua pe tolu, ka ʻi heʻeku ʻeke ange kiate kinautolú, naʻa nau pehē naʻe kiʻi fuoloa ange ai ʻenau tatalí. Kae talamai ʻe he kau akó ia naʻa nau fie maʻu ha taimi lahi ange ke faka-kaukauʻi ʻenau ngaahi talí.
ʻI haʻaku feinga ke tokoniʻi e kau faiakó ke tokolahi ange ʻa e kau mai ʻa e kalasí ki he lēsoní, naʻá ku fakalotolahiʻi kinautolu ke nau laulauloto pē ke aʻu ki he 20 hili ʻenau fai ha fehuʻi kae lava ke maʻu ʻe he kalasí ha taimi feʻunga ke nau fakakaukau ai. Naʻa nau ako ke fai ha ngaahi lea peheni, “Te u tuku atu ha taimi ke ke fakakaukau ai” pe “Mou kātaki muʻa ʻo fakakaukauloto ki he fehuʻi ko ʻení, pea te u toki kole atu ke fai mai haʻamou tali.” ʻI he kamata ke fakahoko ʻeni ʻe he kau faiako ʻi hoku siteikí, naʻe lahi ange ʻa e kau mai ʻa e kalasí pea nau ongoʻi ʻa e Laumālié ʻi he kamata ko ia ke nau “feakoʻiʻaki ʻiate [kinautolú]” (T&F 88:77).
Ne u ʻalu ki ha kalasi naʻe laka hake he miniti ʻe uá ne tuku ange ʻe he faiakó ke fakakaukau ai e kalasí ki ha foʻi fehuʻi fekauʻaki mo hono moʻui ʻaki ʻo ha tokāteline ʻo e ongoongoleleí. Kiate au ko ha taimi ia ke te fakalongolongo ai ʻo fakalaulauloto. Naʻá ku ongoʻi e Laumālié peá u ʻilo ki he tokāteliné ʻa ia ne ʻikai te u mei maʻu ka ne taʻeʻoua e ngaahi momeniti ko ʻeni ke u fakakaukauloto aí. Naʻe tokoni e meʻa naʻe hokó ke mahino kiate au ko e taimi ʻoku ʻoange ai ki he kalasí ha taimi ke nau fakalaulauloto ai ki ha fehuʻí, ʻoku nau maʻu ai ha taimi ke toe fakakaukau lahi ange mo fakaongoongo ki he Laumālié. (Vakai, 3 Nīfai 17:1–3.)
ʻE aʻusia ʻe hoʻo kalasí pe fāmilí ha ngaahi fealēleaʻaki fakalaumālie tatau kapau te ke fakaʻaongaʻi e ngaahi fehuʻi ʻoku ʻikai taha pē ʻa e tali ki aí, pea mo e tuku ha taimi feʻunga ke fakakaukau ai ʻa e tokotaha kotoa pē pea toki fai ʻenau talí.
Ngaahi tā naʻe fai ʻe Welden C. Andersen
ʻI he taimi ʻokú ke faiako aí, ʻahiʻahiʻi angé e fanga kiʻi tokoni ko ʻení ke toe lelei ange ai e kau mai ʻa e kalasí ki he lēsoní.