Fakakaungāmeʻá
Ko e Tokoni ki Hono Fāmilí
ʻOku saiʻia e fānau ʻi he funga māmaní ke tokoni ki honau ngaahi fāmilí—ʻo hangē pē ko kimoutolú! ʻI he māhina ní, te tau feʻiloaki ai mo Sinitia Noemi Iala Humata mei ʻAsenisioni ʻi Palakueí.
Ko e Feʻiloaki mo Sinitiá
ʻOku tuʻu ha kiʻi fale ngāue mo ha falekoloa tuki ukamea ʻi he tuʻakolo pē ʻo ʻAsenisioní ʻi Palakuei. ʻOku fonu ʻa e falekoloá ʻi he ngaahi meʻangāue ukamea mo e ngaahi meʻa naʻe fie maʻu ke fakaleleiʻí. ʻOku tuʻu he tuʻa falekoloá ha kiʻi fale. ʻOku tautau ʻi he fakafaletolo ʻi muí ha fō maʻa. Ko e ʻapi ʻeni ʻo e taʻahine taʻu hiva ko Sinitia Noemi Iala Humatá mo hono fāmilí.
Tokoni ʻi ʻApí
ʻOku ʻi ai e kiʻi tuongaʻane ʻo Sinitia ko Kusitafu (taʻu 7) mo hono kiʻi tokoua siʻisiʻi ʻoku kei pēpē ko Tēpola. ʻOku faʻa lahi taha pē ʻene tokangaʻi ʻa Kusitafú, ka ʻokú ne toe saiʻia foki ke tokoni hono tokangaʻi ʻo Tēpolá. ʻOku talamai ʻe heʻene faʻeé ʻoku tokoni lahi ʻaupito ʻa Sinitia ʻi hono tauhi ke maʻa hono lokí, fakamaʻa ʻa e falé, mo tafi e fakafaletoló. ʻOku fie maʻu ʻe Sinitia ke ʻi ai ha ʻaho ʻe hoko ai ko ha faʻē pea ʻi ai ʻene fānau ʻe toko ono.
Ko e Tuʻu Fefeka ʻi ʻApiakó
ʻOku vahevahe fakataimi e ʻapiako ʻo Sinitiá. ʻOku ako e fānau ako ʻe niʻihi he taimi pongipongí, niʻihi he hoʻataá, pea niʻihi ʻi he efiafí. ʻOku ako ʻa Sinitia he taimi pongipongí. ʻOku kalasi tolu pea ko ha taʻahine ako lelei ʻaupito ia. Ko e lēsoni ʻokú ne saiʻia taha aí ko e siokālafí mo e hisitōliá.
ʻOku laka hake he fānau ako ʻe toko 1,000 ʻi hono ʻapiakó, ka ko e toko 12 pē ʻoku kau ki he Siasí. ʻOku faʻa fehuʻi ange hono kaungā-akó ʻo kau ki heʻene tui fakalotú. Naʻá ne tali e ngaahi fehuʻí ʻi he lelei taha ʻokú ne lavá peá ne tā ha sīpinga ʻaki ʻene moʻui ʻaki e ongoongoleleí.
Ngaahi Efiafi Fakafāmili ʻi ʻApí
ʻOku mateuteu maʻu pē ʻa Sinitia ke tokoni ʻi he efiafi fakafāmili ʻi ʻapí. Taimi ʻe niʻihi ʻoku femoʻuekina ai ʻene tamaí ʻi hono fale tuki ukameá, pea ʻoku fie tokoni leva ʻa Sinitia ki ai ʻaki ʻene teuteuʻi e lēsoni ki he efiafi fakafāmili ʻi ʻapí. ʻOku fie maʻu ʻe Sinitia ke hoko ko ha faiako ʻi he kahaʻú. ʻOkú ne saiʻia hono akoʻi e niʻihi kehé.
Ko e Ako mei he Folofolá
ʻOku manako ʻa Sinitia he laukongá—tautefito pē ki he folofolá. Ko e talanoa folofola ʻokú ne manako taha aí ko e talanoa ko ia ki he malanga ʻa ʻĀmoni ki he kau Leimaná (vakai, ʻAlamā 18). ʻOkú ne saiʻia hono fakahā mai ai ʻoku totonu ke tau ngāue fakafaifekau kotoá.
Ngaahi tā ʻo e fāmilí naʻe fai ʻe Don L. Searle
Ko Sinitia mo hono fāmilí: tamaí (Mikaele), faʻeé (Lisi), Sinitia, Kusitafu, mo Tēpola.
Ko e Fē ʻi Māmani ʻOku Tuʻu ai ʻa ʻAsenisioni ʻi Palakuaí?
ʻAsenisioni
Palakuai
Tā fakatātaaʻi ʻo e ʻū tohí ʻe Scott Greer; mapé naʻe tā ʻe Thomas S. Child