Ngaahi Fehuʻi mo e Talí
“ʻOku fakakikihi lotu ha niʻihi hoku ngaahi kaungāmeʻa Siasí mo kinautolu ʻoku ʻikai Siasí. ʻOku ou ʻiloʻi ʻoku hala ʻa e fakakikihí, ka te u fakahā fēfē ke ʻilo ʻe hoku ngaahi kaungāmeʻá ʻa e ongo ʻoku ou maʻu ki he ongoongoleleí?”
ʻOua naʻá ke feinga ke fakahā kiate kinautolu e ngaahi ongo ʻokú ke maʻú lolotonga ʻenau ʻita lahí pea ʻikai ke ʻi ai e Laumālié, ka ke feinga ke ke talanoa tautau toko taha ai mo ho ngaahi kaungāmeʻá ʻi ha taimi mo ha feituʻu ʻe lava ke tokoni ai e Laumālie Māʻoniʻoní.
Lotu ke maʻu ha ngaahi faingamālie ke talanoa ai ki ho ngaahi kaungāmeʻá ʻo kau ki he ongoongoleleí. Ko hoʻo maʻu pē ha faingamālié peá ke fakamatala ki he ngaahi meʻa ʻokú ke tui ki aí pea fai hoʻo fakamoʻoní. Fakapapauʻi ke ke fakahā ʻokú ke tokanga moʻoni kiate kinautolu. Kapau ʻoku fie maʻu ʻe ho ngaahi kaungāmeʻá ke nau toe ʻilo lahi ange, peá ke ʻoange ha kaati ke nau paasi atu ki ha niʻihi kehe, fakaafeʻi kinautolu ki he lotú, fakafeʻiloaki kinautolu ki he Mormon.org, pe ko haʻo fetuʻutaki ki he kau faifekaú.
Lotu ke maʻu e fakahinohino ʻa e Laumālié ke ke ʻiloʻi e meʻa ke lea ʻaki ki ho ngaahi kaungāmeʻá mo e founga ke ke lea ʻakí. Lotu ke maʻu ha tokoni ʻo fakaʻehiʻehi mei he fakakikihí. Ka kamata fakakikihi atu ho ngaahi kaungāmeʻá, ʻe faʻa lelei taha pē ke fetongi e kaveinga ʻoku mou talanoa ki aí pe ko haʻo mavahe mei ai.
Lotu ke Maʻu ha Fakahinohino
ʻOku ʻikai mei he ʻOtuá ʻa e fakakikihí (vakai, 3 Nīfai 11:29), ko ia ai ʻoku ʻikai ko e founga totonu ia ke vahevahe atu ʻaki e ongoongolelei fakaʻofoʻofá ni ki he niʻihi kehé. Ko e founga lelei ke vahevahe ai mo e niʻihi kehé ʻa e ongoongoleleí ko hono fakaafeʻi ho ngaahi kaungāmeʻá ki he lotú pe ngaahi ʻekitivitī ʻa e Siasí. Kuo tokoniʻi au ʻe he lotú ke u ʻiloʻi e founga ʻe lava ke u vahevahe ai ʻa e ongoongoleleí mo hoku ngaahi kaungāmeʻá. ʻOku ou ʻilo ʻoku tali ʻe he ʻEikí ʻa e ngaahi lotú. Te Ne fakahā maʻu pē kiate koe ʻa e founga totonu ke fai ʻaki e meʻa kotoa pē.
Silesi R., taʻu 22, Kalefōnia, USA
Akoʻi Ange e Founga ʻe Lava Ke Nau ʻIlo Aí
ʻE mavahe ʻa e Laumālié ʻi he taimi ʻokú ke fakafekiki pe fakakikihiʻi ai e meʻa ʻokú ke tui ki aí. He ʻikai lava ke Ne ʻi ai ke fakamoʻoni ʻokú ke lea ʻaki e moʻoní. Ko e meʻa lelei taha pē ke faí ko haʻo fakamoʻoni. Fakahā ange pē ʻa e meʻa ʻokú ke tui ki aí mo e founga ʻokú ke ʻiloʻi ai ʻoku moʻoní. ʻI he taimi ʻoku ou talanoa ai mo ha kakai ʻo kau ki hotau Siasí, ʻoku ou talaange ʻe lava ke nau ʻiloʻi ʻiate kinautolu pē ʻoku moʻoni ʻaki haʻanau lotu, lau e Tohi ʻa Molomoná, pea fakafanongo ki he ngaahi ongo ʻi honau lotó. ʻE kei lava pē ke taʻetui ki ai ho ngaahi kaungāmeʻá, ka he ʻikai ke nau lava ʻo fakaʻikaiʻi ʻa e mālohi hoʻo fakamoʻoní.
Sisitā Kelemeni, taʻu 22, Misiona Tenesī Nokisivilá
Fakaʻehiʻehi mei he Fakakikihí
ʻOku ʻi ai hoku kaumeʻa ʻoku kau ia ki ha siasi ʻe taha. ʻI he ʻaho ʻe taha naʻá ne haʻu ai ʻi ʻapiako ʻo kamata feinga ke fakamoʻoni mai kiate au naʻe ʻikai ke moʻoni e Tohi ʻa Molomoná pea naʻe ʻikai ko ha siasi Kalisitiane ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Hili ʻeku tali kotoa ʻene ngaahi fehuʻí, naʻe kamata ke u fakatokangaʻi naʻe ʻikai tokanga ia ki heʻeku ngaahi talí he naʻá ne toutou fai mai pē ʻa e fehuʻi tatau. Mei he meʻa ne u ako mei hení, ko ʻeku faleʻí ke ke fakamatalaʻi ange pē ʻoku ʻikai ke ke fie fakakikihi koe peá ke fai hoʻo fakamoʻoní ki hono moʻoni ʻo e Siasi ʻo e ʻEikí.
Seitini C., taʻu 13, Uasingatoni, USA
ʻOku Fakatupu ʻe he Fakakikihí ʻa e Tāufehiʻá
Kuo teʻeki ai pē hoko e fakakikihí ia ko ha founga totonu. ʻOkú ne tuli e Laumālie ʻo e ʻEikí peá ne fakatupu ʻa e ngaahi ongo ʻo e fehiʻá mo e tāufehiʻá. ʻOkú ne liliu foki ʻa e anga hoʻo vakai ki he kakai kehé. Ko e meʻa ʻoku iku maʻu pē ki aí ko e felauʻaki ʻa e kakaí ʻo kau ki he ngaahi meʻa fakatokāteliné, ko ia ʻoku mahuʻinga ʻaupito ke ke hoko ko ha tokotaha fakamelino pea ʻoua ʻaupito naʻa ngalo ke fai hoʻo fakamoʻoní ki he ngaahi moʻoni ʻo e ongoongoleleí mo e ngaahi ola lelei kuó ne ʻomi maʻaú.
Kālosi F., taʻu 19, Kuāliko, Venesuela
Fakaʻapaʻapaʻi e Tui ʻa e Niʻihi Kehé
ʻOua naʻá ke pehē ange ki ho ngaahi kaungāmeʻá, “ʻOku moʻoni e tui fakalotu ʻoku ou kau ki aí, pea ʻoku ʻikai moʻoni haʻaú,” ka ke fai kiate kinautolu hoʻo fakamoʻoní. Ne tuʻo taha ʻeku fai ia ki haku kaungāmeʻa ofi ʻa ia ko ha Kalisitiane pea ʻokú ne tui ʻaupito ki hono siasí. Naʻá ne pehē ko ha meʻa lelei ia ʻeku maʻu ha fakamoʻoní. Naʻá ma talanoa pē ki he ngaahi meʻa naʻá ma tui ki aí, ka naʻe ʻikai ke ma fakakikihi. Neongo ia, kapau te ke haʻu ʻo pehē ange, “ʻOku ʻikai moʻoni homou siasí,” ʻokú ke taʻefakaʻapaʻapaʻi ʻe koe ha meʻa ʻoku fuʻu mahuʻinga kiate kinautolu. ʻOku ʻikai ke fai pehē ʻa e ngaahi kaungāmeʻá. Mahalo he ʻikai te mo loto tatau mo ho kaungāmeʻá ʻi ha ngaahi tokāteline, ka ʻe fakafanongo atu ʻa e kaungāmeʻa moʻoní ki hoʻo fakamoʻoní pea mahino kiate ia ʻene fuʻu mahuʻinga ʻa e ongoongoleleí kiate koé.
ʻEmipā P., taʻu 17, ʻIutā, USA
Moʻui ʻAki e Ongoongoleleí
Moʻui ʻi ha founga ʻe fie ʻilo ai ʻa kinautolu ʻoku nau ʻiloʻi koe kae ʻikai ke nau ʻiloʻi hono moʻoni ʻo e ongoongolelei ko ʻení, ki he ongoongoleleí koeʻuhí pē he ʻoku nau ʻiloʻi koe. ʻAi ke hā meiate koe ʻa e fiefia ʻo e ongoongoleleí. Hoko ko ha maama, ko ha fakahinohino, pea mo e faʻifaʻitakiʻanga lelei taha te ke lavá ki ho ngaahi kaungāmeʻá mo e niʻihi kehé.
ʻEletā Kama, taʻu 20, Misiona Keipi Kousi Kana
Fai ha Fakamoʻoni
Ko e founga lelei taha ke vahevahe ai ʻa e ongoongoleleí mo e niʻihi kehé ko hono fakahoko ia ʻi he loto fakamoʻomoʻoni pea ʻi he ʻofa. ʻE ʻikai ʻaonga ʻa e fakakikihí ia. Naʻe ʻikai fakakikihi ʻa Sīsu mo e kau Fālesí; ka naʻá Ne akonaki kiate kinautolu ʻi he ʻofa, lea, mo e faʻifaʻitakiʻanga. ʻOku pehē ʻi he Malangaʻaki ʻEku Ongoongoleleí : [“ʻE faʻa fehuʻi fakapoto ʻe he kakaí ʻa e meʻa ʻokú ke akoʻí, ka ʻoku faingataʻa ke fakafehuʻia ha fakamoʻoni ʻoku fakamoʻomoʻoni pea haʻu mei he lotó” ([2004], 199)]. Fai hoʻo fakamoʻoní ki he meʻa ʻokú ke ʻiloʻi ʻoku moʻoní mo e founga ʻokú ke ʻiloʻi aí. ʻI he taimi ʻoku fakamoʻoni ai ʻa e Laumālié ki hono moʻoni ʻo e meʻa ʻokú ke lea ʻakí, ko e faingamālie lelei taha ia ke mahino ai ki ho ngaahi kaungāmeá.
ʻIfalemi S., taʻu 20, Niu Sauele, ʻAositelēlia