Pōpoaki ʻa e Faiako ʻAʻahí

Kau ʻi he Lotu Fakamātoató

Akoʻi ʻi he faʻa lotu ʻa e ngaahi potufolofola mo e ngaahi lea ko ʻení, pe ko ha tefitoʻi moʻoni kehe ʻe faitāpuekina ai e kau fafine ʻokú ke ʻaʻahi ki aí, ʻo ka fie maʻu. Fakamoʻoni ʻo kau ki he tokāteliné. Fakaafeʻi e niʻihi ʻokú ke akoʻí ke nau vahevahe atu ʻa e ongo ʻoku nau maʻú mo e meʻa kuo nau akó.

ʻOku ʻI ai ha Ivi fakamālohi ʻo e Lotu Fakamātoató

Suli B. Peki, palesiteni lahi ʻo e Fineʻofá: “Fakakaukau angé ki hono fakatahaʻi hotau mālohí ʻo kapau ʻe lotu fakamātoato ʻa e fefine kotoa pē ʻi he pongipongi mo e efiafi, pe ʻe toe lelei ange ʻo kapau te ne lotu taʻetuku ʻo hangē ko ia kuo fekau mai ʻe he ʻEikí. Kapau ʻe lotu fakafāmili ʻa e fāmili kotoa pē … , te tau hoko ʻo toe mālohi ange” (“Ko e Meʻa ʻOku Fakahoko Lelei Taha ʻe he Kau Fafine ʻo e Siasí: Tuʻu Mālohi mo Taʻeueʻia,” Liahona Nōvema 2007, 110).

ʻEletā Pulusi R. Makongikī (1915–85) ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku liliu ʻe he lotú ʻetau moʻuí. ʻOku tau ʻunuʻunu ofi ange ai ki he ʻEikí, pea ʻoku mafao mai Hono toʻukupú ʻo ala kiate kitautolu, pea he ʻikai ke kei tatau ai pē ʻa ʻetau moʻuí.

“Ko e lotú ko ha taua ia ʻo ha mālohi lahi, ko ha pou tuʻuloa ʻo e angamāʻoniʻoní, ko ha ivi māfimafi ʻokú ne ʻunuakiʻi e ngaahi moʻungá mo fakamoʻui e ngaahi laumālié” (“Patterns of Prayer,” Ensign, May 1984, 32).

ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku tānaki atu ʻe he lotu moʻoni mo fakamātoato kotoa pē ha konga ki he teunga taú. … Ko e taha ʻo e ngaahi founga mahuʻinga taha ki hono tui ʻo e teunga tau ʻo e ʻOtuá, ko hoʻomou fakapapauʻi ʻoku hoko ʻa e lotú—ʻa e lotu fakamātoato, moʻoni, mo fai maʻu peé—ko e konga ʻo hoʻomou moʻui fakaʻahó” (“Be Strong in the Lord,” Ensign, July 2004, 10).

T&F 112:10: “Ke ke loto-fakatōkilalo; pea ʻe tataki nima koe ʻe he ʻEiki ko ho ʻOtuá, pea foaki kiate koe ʻa e tali ki hoʻo ngaahi lotú.”

Ko e Fetuʻutaki Māʻoniʻoní ʻa e Lotu Fakamātoató

Palesiteni Sēmisi E. Fausi (1920–2007), Tokoni Ua ʻi he Kau Palesitenisī ʻUluakí: “ʻUluakí, ko e lotú ko ha fakahā ia ʻi he loto fakatōkilalo ko e ʻOtuá ʻa ʻetau Tamaí pea ko e ʻEiki ko Sīsū Kalaisí ʻa hotau Fakamoʻuí mo e Huhuʻí. Uá, ko hano vete ia ʻo ʻetau angahalá mo e maumaufonó ʻi he loto moʻoni mo kole ha fakamolemole. Tolú, ko hano fakamahinoʻi ia ʻoku tau fie maʻu ha tokoni ʻoku lahi hake ʻi he meʻa ʻoku tau lavá. Faá, ko ha faingamālie ia ke tau fakahā ai ʻetau fakafetaʻi mo e loto-houngaʻia ki hotau Tupuʻangá. ʻOku mahuʻinga ke tau faʻa pehē: ʻOku mau fakamālō ki Hoʻo ʻAfió … ,” ʻOku mau fakahā ʻi Ho ʻaó … ,” ʻOku mau fakafetaʻi ki Hoʻo ʻAfió …’ Nimá, ko ha faingamālie ia ke tau kole ai ki he ʻOtuá ha ngaahi tāpuaki makehe.

“… ʻOku haʻu mei he lotó ʻa e ngaahi lotu ʻoku fai fakamātoató. ʻIo, ʻoku fie maʻu ʻe he fakamātoató ke tau lotu mei he ngaahi ongo vivili mo fakamātoato ʻa hotau lotó” (“Ko e Afo Fakahaofi ʻo e Lotú,” Liahona, Siulai 2002, 62).

ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku fie maʻu ʻe he lotu ʻoku ʻuhingamālié ʻa e fetuʻutaki ʻi he māʻoniʻoní mo e ngāue fakatapuí. ʻOku fie maʻu ke tau feinga ki muʻa pea tau toki maʻu ʻa e ngaahi tāpuakí, pea ko e lotú, ʻi heʻene hoko ‘ko e ngāué, … ko e founga ia kuo fokotuʻu ke tau lava ʻo maʻu ai ʻa e ngaahi tāpuaki māʻolunga tahá’ (Bible Dictionary, ‘Prayer,’ 753). ʻOku tau vilitaki atu ki muʻa mo kītaki ʻi he ngāue fakatapui ʻo e lotú hili ʻetau pehē “ʻēmení” ʻaki ʻetau ngāueʻi ʻa e ngaahi meʻa kuo tau fakahā ki he Tamai Hēvaní” (“Kole ʻi he Tui,” Liahona, Mē 2008, 95).

Palesiteni Tōmasi S. Monisoni: “ʻI heʻetau ʻoatu ki he ʻEikí ʻa ʻetau ngaahi lotu fakafāmili mo fakatāutahá, tau fai muʻa ia ʻi he tui mo e falala kiate Ia. Tau manatuʻi muʻa e fekau ʻa e ʻAposetolo ko Paulá ki he kakai Hepeluú: ʻHe ko ia ia ʻoku haʻu ki he ʻOtuá, ʻoku totonu ke ne tui ʻoku ai ia, pea ʻokú ne totongi kiate kinautolu ʻoku kumi lahi kiate iá.’ Kapau ʻoku fakatuotuai hatau niʻihi ke tokanga ki he faleʻi ke tau lotu maʻu peé, ʻoku ʻikai mo ha taimi lelei ange ke kamata ai ka ko e taimí ni” (“Ko ha Lakanga Fakataulaʻeiki Fakaʻeiʻeiki,” Liahona, Nōvema. 2007, 61).