Taimi o Fetufaaiga

Faavae mo le Fiafia

Saunia e Cheryl Esplin

“O … aiga manuia e faavae ma tumau i mataupu faavae o le faatuatua, tatalo, salamo, [ma le] faamagaloga” (“O Le Aiga: O Se Folafolaga i le Lalolagi”).

O se faavae e maua ai se tulaga mautinoa, mautu e mafai ona fausia ai i luga se mea. O le tele lava o maota ma fale o loo fausia i luga o faavae.

Ina ua amata ona fausia e le Au Paia o Aso e Gata Ai le faavae o le Malumalu o Sate Leki, sa latou faaaogaina ni faaputuga o poloka maa amu. E lima tausaga na latou faaaluina e fausia ai le faavae e valu futu le loloto (2.4-m). Ina ua latou faalogo o le a oo atu fitafita, sa ufiufi loa e le Au Paia le faavae i palapala e nana ai. Ina ua tafi ese le palapala i se taimi mulimuli ane, na faapea ona ta’ei ma mei i lalo le faavae. Na iloa e le Au Paia e le mafai e se faavae ua ta’e ona taofiofia le malumalu. O lea na latou aveeseina ai le faavae maa amu ae toe sui atu i maapapa lapopoa. Ina ua uma lena faavae malosi, sa amata loa ona fauina e le aufaigaluega ia puipui o le malumalu.

E pei lava ona manaomia e le malumalu se faavae papa malosi, e faapena foi ona manaomia e oe ma lou aiga se faavae malosi e ola ai. Na fetalai le Alii, “Ia atiina ae i luga o la’u papa, o la’u talalelei lea” (MFF 11:24). O le talalelei a Iesu Keriso e aofia ai le faatuatua, tatalo, salamo, ma le faamagaloga. O le fauina i luga o nei mataupu faavae o le a e maua ai se faavae mausali e fesoasoani ia te oe ma lou aiga e tutu malosi ai.

Gaoioiga

Aveese le itulau U14 mai le mekasini. Oti ese ia kata. Tuu kata o ata i se tasi faaputuga ae tuu kata o upu i se isi faaputuga. Ilo mai se kata se tasi mai faaputuga taitasi. Afai e tutusa ia kata, ia faamatala pe faapefea ona e fesoasoani i lou aiga ia fai lena mea faapitoa, ona taofi lea o kata. Afai e le tutusa ia kata, ia amata nisi faaputuga se lua mo kata e le fetaui. Faaauau ona taaalo ai, ia tuu atu i tagata taitasi e ilo ni kata. A uma ia faaputuga muamua e lua, tōtō le faaputuga lona lua ma faaauau ai ona taaalo seia fetaui uma kata.

Manatu mo Taimi o Fetufaaiga

O le faatuatua i le Alii o Iesu Keriso e faamalosia ai au ma lou aiga. Fesoasoani i tamaiti e tauloto le “Afai ua ia te outou le faatuatua, tou te faamoemoe i mea e le o vaaia, a ua moni ia” (Alema 32:21). Faaali atu le Taga Ata o le Talalelei 240 (Iesu le Keriso), ma faamatala atu o le faatuatua ia Iesu Keriso o lona uiga e ui lava ina tatou le vaai ia te Ia, ae ua tatou talitonu o loo soifua o Ia. Tatou te faalagolago ia te Ia ma taumafai e mulimuli i Ana poloaiga. A o lei amataina le taimi o fetufaaiga, sue tala o tusitusiga paia ma ata e faaalia ai le ala na fesoasoani ai i tagata le faatuatua ia Iesu Keriso e tausi ai poloaiga i tulaga faigata. Mo se faataitaiga: Taga Ata o le Talalelei 102 (Fauina o le Vaa), 112 (Tavita ua Fasiotia Koliata), 114 (Tanielu o loo Teena Meaai ma Uaina a le Tupu), 125 (Eseta), 210 (Iesu ma le Faifaiva), 301 (Aiga o Liae ua Tuua Ierusalema), 313 (Fitafita Talavou e Lua Afe). Tuu atu i vasega taitasi se ata, ma fai atu i faiaoga e faamatala ia tala, ia faamamafa auala na faaalia ai e tagata o latou faatuatua. Tuu atu i vasega taitasi e mafaufau i se tulaga latou te ono feagai lea e manaomia ai le i ai o o latou faatuatua. Fai atu ia i latou e talanoa e uiga i le mafai ona fesoasoani le i ai o le faatuatua ia Iesu Keriso i lena tulaga. Fai atu i vasega taitasi e faasoa mai se tala i tusitusiga paia ma o latou tulaga i aso nei. Usu le pese “O Le A Ou Mulimuli ia te Ia i le Faatuatua” (Liahona, Fep. 2003, U16).
O le tatalo e faamalosia ai au ma lou aiga. Faaali atu i tamaiti se tamai masini e alu i le eletise po o se ata o le masini lea. Faamatala atu e mafai ona maua e le masini le paoa o le eletise pe afai lea e sulu i le faapogai o le paoa. Tau atu i tamaiti e tatau ona tatou fesootai atu i se “punavai o le paoa” ina ia maua ai le paoa faaleagaga. O le Tama Faalelagi o lo tatou punavai lea o le paoa faaleagaga, ma e mafai ona tatou fesootai atu ia te Ia e ala i le tatalo. Mai taga ata a le Peraimeri, ia faaali atu ata 7-13 (tamaitiiti o loo tatalo) po o le 1-9 (teineitiiti o loo tatalo), ma aoao atu e mafai ona tatou tatalo i le Tama Faalelagi e fesoasoani mai ia i tatou ma o tatou faafitauli ma filifiliga. Faamatala le tala ia Mosaea na tatalo mo se fesoasoani e fia iloa pe tatau ona ia tuuina atu ona atalii e talai atu i sa Lamana (tagai Mosaea 28:1–6). Fai atu i tamaiti e galulue faatasi e sue le tali a le Alii o loo i le fuaiupu e 7. Faamatala atu le tala ia Iosefa Samita na tatalo e fia iloa po o le fea le lotu e tatau ona auai (tagai Iosefa Samita—Talafaasolopito 2:7–18). Fai atu i tamaiti ia toe galulue faatasi foi e sue le tali a le Alii i le fuaiupu e 19. Ia faasoa atu se aafiaga patino ma lau molimau e uiga i au tatalo na taliina mai. Fai i tamaiti e fai a latou tatalo faaletagata lava ia i aso taitasi o lenei vaiaso. ●

Ata na tusia e Beth M. Whittaker

Faitau Tusitusiga Paia

Tatalo

Galue

Taalo

Auauna Atu

Alu i le Lotu

Afiafi Faaleaiga

Taimi o le taumafataga