Fesili ma Tali
“E finau nisi o au ou o le Ekalesia ma au uo e le auai i le ekalesia e uiga i mataupu tau lotu. Ou te iloa o finauga e sese, ae e faapefea ona ou faailoa atu i au uo ou lagona e uiga i le talalelei?”
Nai lo le taumafai e faasoa atu ou lagona ae o loo ita au uo ma ua le i ai iina le Agaga, ia vaavaai mo ni avanoa e te talanoa taitoatasi atu ai i au uo, i se taimi ma se nofoaga e mafai ona fesoasoani atu ai le Agaga Paia.
Tatalo mo avanoa e talanoa atu ai i au uo e uiga i le talalelei. A e maua le avanoa, ia faamalamalama atu ou talitonuga ma tuu atu lau molimau. Ia mautinoa e te faaali atu i ai e te alofa ia i latou. Afai e mananao au uo e fiailoa atili e uiga i le ekalesia, e mafai ona e tuu atu ia i latou se kata e faailoa atu ai, valaaulia i latou i le lotu, faasino i latou i le Mormon.org, pe faafesootai ia faifeautalai.
Tatalo mo le taitaiga a le Agaga ia iloa ai upu e fai atu i au uo ma le auala e fai atu ai. Tatalo mo le fesoasoani e aloese mai ai i finauga. Afai e amata ona outou finau ma au uo, e sili atu le lelei o le sui o le mataupu pe tuu loa le talanoaga.
Tatalo mo le Taitaiga
O finauga e le mai le Atua lea (tagai 3 Nifae 11:29), ma e le o le auala sao lea e faasoa atu ai lenei talalelei matagofie. O se auala lelei e faasoa atu ai le talalelei o le valaaulia o au uo i le lotu po o gaoioiga. Na fesoasoani le tatalo ia te au ou te iloa ai le auala e mafai ona ou faasoa atu ai le talalelei i au uo. Ou te iloa e tali mai le Alii i talosaga. O le a Ia faaali mai ia te oe i taimi uma le auala sao e fai ai mea.
Celeste R., 22, Kalefonia, ISA
Aoao i Latou i le Auala e Mafai Ai Ona Latou Iloa
A e faafinau pe tauupu e uiga i ou talitonuga, e aluese le Agaga. E le mafai ona i ai o ia iina e molimau atu o loo e tautala i le mea moni. O le mea sili lava e fai o le molimau atu. Tau lava o le tau atu o ou talitonuga ma le ala ua e iloa ai e moni. A ou talanoa i tagata e uiga i la tatou Ekalesia, ou te tau atu ia i latou e mafai ona latou iloa le moni mo i latou lava e ala i le tatalo, faitauina o le Tusi a Mamona, ma faalogo i lagona o o latou loto. E mafai lava e au uo ona auese ai, ae e le mafai ona latou teenaina le mana o lau molimau.
Sister Clement, 22, Misiona a Tennessee Knoxville
Aloese i Finauga
E i ai sau uo e auai i se isi ekalesia. O le tausaga na tea na sau ai ia te au i le aoga ma amata ona taumafai e faamaonia mai ia te au e le moni le Tusi a Mamona ma O Le Ekalesia a Iesu Keriso o le Au Paia o Aso e Gata Ai e le o se lotu Kerisiano. Ina ua uma ona ou tali atu i ana fesili uma, na amata ona ou iloaina sa lei faalogo mai o ia i au tali aua na faaauau pea ona ia luiina au i ia lava fesili e tasi. Mai le mea na ou aoaoina mai i lenei aafiaga, o lau fautuaga, na pau lava le mea e mafai ona e faia o le tau atu i ai e te le manao i ni finauga ma tuu atu lau molimau i le moni o le Ekalesia a le Alii.
Jayden C., 13, Uosigitone, ISA
O Finauga e Tupu Ai le Inoino
E lei avea lava finauga ma se auala sao [e tau atu ai le talalelei]. Na te tuliesea le Agaga o le Alii ma e faaosofia ai lagona o le inoino ma le ita. E suia ai foi lau vaaiga i isi tagata. O le mea masani lava, o le mea e uma ae ua finau ai tagata o manatu i aoaoga faavae, o lea e taua ai lava le avea ma faatupu filemu ma ia aua nei galo ona tuu atu lau molimau e uiga i upumoni o le talalelei ma taunuuga lelei ua ia aumaia ia te oe.
Carlos F., 19, Guárico, Venesuela
Faaaloalo i Talitonuga o Isi
Nai lo lou fai atu i au uo, “E sao la’u lotu ae sese lau lotu,” ia faasoa atu ia i latou lau molimau. Sue se taimi e tuu ai na o oulua ma lau uo, ma fesili i ai pe mafai ona faasoa atu lau molimau. Na ou faia lena mea i se tasi taimi i sau uo Kerisiano lelei lava, ma e ese foi le faamaoni i lana lotu. Sa manatu o ia o se mea maoae le i ai o sau molimau. Ina ua uma lena, sa ma talanoaina mea na ma talitonu i ai, ae sa le o se finauga. Ae peitai, a e alu atu ma fai atu, “E le sao lau lotu,” o le a e le faaaloalo i se mea atonu e sili ona pele i o latou loto. E le faia e ni uo lena ituaiga mea. Atonu e te lua feeseeseai ma lau uo i manatu o aoaoga faavae, ae o se uo moni o le a faalogo atu i lau molimau ma malamalama e matua taua tele le talalelei ia te oe.
Amber P., 17, Iuta, ISA
Ola i le Talalelei
Ola ina ia mananao i latou e iloa oe ae latou te le iloa lenei talalelei moni, ia latou iloa le talalelei ona latou te iloa oe. Ia vaaia ia te oe le olioli o le talalelei. Ia avea ma se malamalama, o se taiala, ma se faataitaiga sili ona lelei i le mea e te mafaia i au uo ma isi.
Elder Kamah, 20, Misiona a Ghana Cape Coast
Tuu Atu le Molimau
O le auala sili ona lelei e faasoa atu ai le talalelei o le faia lea ma le faamaoni ma le alofa. E leai se iuga lelei e maua i le fefinauai. Sa lei finau Iesu Keriso ma Faresaio; ae, sa Ia aoaoina i latou e ala i le alofa, upu, ma faataitaiga. Fai mai le Talai La’u Talalelei: “Atonu o nisi taimi e fesiligia ai ma le atamai e tagata mea o loo e aoaoina atu, ae e faigata tele ona fesiliga se molimau faamaoni mai le loto” ([2004], 216). Tuu atu lau molimau o le mea ua e iloa e moni ma pe faapefea ona e iloa. A molimau atu le Agaga i le moni o mea o loo e fai atu ai, o le avanoa sili lena mo au uo e malamalama ai.
Ephraim S., 20, Niu Saute Uelese, Ausetalia