Ua Uma Ona E Iloa
Ou te le’i masalomia lava le moni o le talalelei. Ae o le taimi lenei na ou manatunatu ai pe na lava lea.
E pei o Nifae, na ou fanau i ni matua na aoaoina au i le talalelei. Ma na faia e lou aiga suesuega o tusitusiga paia ma tatalo faaleaiga i aso uma. Na ou faalogologo a o molimau mai ou matua e uiga ia Iosefa Samita, le Tusi a Mamona, ma mataupu faavae taitasi o le talalelei. Ona o nei aafiaga, ou te le’i masalomia ai lava le moni o le Ekalesia.
Ae i se itu faapitoa, e ui ina aoaoina au i le talalelei ma aoao mai i faataitaiga lelei a ou matua, na ou iloaina, e ui ou te le’i masalomia le moni o le Ekalesia, ae sa le’i i ai foi sa’u molimau malosi i lona moni. E ui ina sa ou moemiti i lo’u olaga atoa ou te alu i se misiona, na ou iloaina lava e manaomia ona ou iloa ma le mautinoa e moni le talalelei.
E lei leva ona atoa lo’u 18, ae amata ona ou alu i se vasega a le uarota e sauniuni ai faifeautalai. Na amata foi ona ou tausia se api talaaga.
I se tasi aso i le vasega sauniuni a faifeautalai, na fai ai sa matou lesona o le a le galo lava ia te au. O le autu “O Le Tusi a Mamona—o le Fatu lea o le Galuega Faafaifeautalai.” Na faaali e le faiaoga ia i matou se vitio o ni tagata talavou i le lalolagi atoa o loo tuuina mai a latou molimau e uiga i le Tusi a Mamona, ma se aafiaga o se tasi alii talavou o le sa le mautinoa pe alu i se misiona, seia oo ina fesili atu o ia i le Atua.
Ona fai mai lea o le faiaoga e tuuina atu a matou molimau. Sa le mafai ona taofiofia le Agaga. Na ou iloaina ua faamanuiaina lo’u olaga e le Tusi a Mamona. Ae ui o lea, na ou iloaina foi ou te le’i tatalo lava ma fesili atu i le Atua e uiga i le moni o le Tusi a Mamona, po o le Uluai Faaaliga foi a Iosefa Samita.
O ni nai aso mulimuli ane, na ou faitauina ai le Tusi a Mamona ma ou filifili ai e tofotofo le folafolaga a Moronae (tagai Moronae 10:3–5). Na ou tootuli ifo ma sasaa atu lo’u loto i le Atua. Ou te le’i iloa pe o le a faapefea ona oo mai le tali po o afea foi o le a ou mauaina ai, ae na ou faatuatua o le a Ia faailoa mai nei mea ia te au i Lona lava taimi.
Ina ua ou tu a’e i luga, na ou lagonaina se manao e tusitusi i la’u api o talaaga. Na ou susueina la’u api o talaaga ma ou faitauina le vaega mulimuli na ou tusia ai, lea na tusia i le Aso Sa na muamua atu ina ua uma la’u vasega o sauniuniga e avea ma se faifeautalai. Ina ua ou faitau i au lava upu, lea na faamatalaina ai ou lagona, na oo mai se lagona toafilemu ia te au ma lofia ai lou tino atoa. Ma le matua mautinoa lava, na ou lagonaina ai upu nei i lou loto, “Ua uma ona e iloa; ua uma ona e iloa.”
Na ou toe tootuli ifo ma faafetai atu i le Tama Faalelagi mo le tali mai i lau tatalo. Na ou mauaina se tali na faapea ona faamautuina ai le mea na ou talitonu lava i ai i lo’u olaga atoa.
O le taimi lenei ua mafai ona ou molimau atu ma le lototoa na vaai Iosefa Samita i le Tama ma le Alo ma e moni le Tusi a Mamona. O le iloa sa ou iloaina lava [nei mea moni], na mafai ai ona ou auauna atu o se faifeautalai faamisiona i le Misiona a Peru Piura. I lau misiona, na ou vaaia ai auala na tali mai ai le Alii i talosaga a i latou uma o e sailia ma le faamaualalo le upumoni. Ma mo lenei mea o le a ou faafetai ai lava e le aunoa.
Ata na tusia e Dan Burr
Api o Talaaga