Savali a le Au Peresitene Sili
O Le Tatalo ma le Tafailagi Lanumoana
O se tasi o mea e sili ona ou fiafia i ai i le lele i vaalele o le tuuvaaese atu mai se malaevaalele pogisa ma timuga, ma a’ea’e atu i ao mafiafia ma taufaamatau o le taumalulu, ona faafuasei lea ona aluese mai le puao pogisa ma agai maualuga atu i le la susulu matagofie ma le lagi lanumoana e le gata.
E masani ona ou maofa i le ogatasi o lenei faatinoga faaletino ma o tatou olaga patino. E faafia ona siomia i tatou i ao taufaamatau ma tau louloua, ma tatou mafaufau ai pe mata e toe aluese le pogisa? Pe a na i ai lava se auala tatou te sii a’e ai i tatou lava mai faigata o le olaga ma sao atu ai i se nofoaga o le filemu ma le toafimalie.
Ua silafia e tagata o le Ekalesia a Iesu Keriso o le Au Paia o Aso e Gata Ai, e mafai ona tupu se mea faapena; o loo i ai se auala e sii a’e ai i tatou i luga atu o faigata o aso uma o le olaga. O le poto, malamalama, ma le taitaiga o loo tatou maua mai le afioga a le Atua, ma mai taitaiga faaperofeta o o tatou vaitaimi o loo ta’u mai ai ia i tatou le auala tonu e fai ai.
Masii i luga
Ina ia mafai ona aluese mai se vaalele mai le eleele, e tatau ona e fatuina se tulaga e masii i luga. I aoaoga i mea tau feoaiga i le ea, e tupu le masii i luga pe a pasi ae le ea i luga ae o apaapa o se vaalele i se auala o le a avea ai le ea i lalo ifo o le apaapa e malosi atu nai lo le savili i luga ae o apaapa. A sili atu le malosi o le uuna’i i luga e le savili nai lo le malosi o le toso i lalo e le kalave, ona masii lea i luga o le vaalele mai le laueleele ma mafai ai ona lele.
I se auala e talitutusa lava, e mafai ona tatou faia ni mea e sii ai i luga i o tatou olaga faaleagaga. Afai e malosi atu le malosiaga lea e tuleiina i tatou agai i le lagi nai lo faaosoosoga ma faanoanoaga lea e tosoina i tatou i lalo, o le a mafai ona tatou o a’e ma felelei atu i le malo o le Agaga.
O loo faamatalaina i lomifefiloi ia le upu masii ae o le tauaveina po o le taitai atu mai se tulaga maualalo i se tulaga maualuga; o le paoa po o le malosiaga e maua mo le siitia ae i se tulaga fou po o se mea maualuga; o se malosiaga e alu i luga, e faafeagai ma le toso i lalo e le kalave.1
Na maualuga atu le faatutuina e le Faisalamo o sini: “Ieova e, ou te faanaunau atu ia te oe ma lo’u loto” (Salamo 25:1) ma “E faasaga ae ou mata i mauga, e oo mai ai lo’u fesoasoani. O lo’u fesoasoani e mai ia Ieova lea” (Salamo 121:1–2).
E faasaga ae o tatou mata i le Atua o le lagi e ala i le faaleleia o o tatou lava ola faaleagaga patino. Tatou te faia lea e ala i le ola e tusa ai ma le finagalo o le Tama; le Alo, lo tatou Faaola; ma le Agaga Paia. Tatou te faia e ala i le taumafai ia “usiusitai, ma agamalu, ma faamaulalo, ma onosai, ma ia tumu i le alofa ma le fia gauai i mea uma ua silafia e le Atua e tatau ona faatiga ai [tatou] e pei lava ona gauai le tama itiiti i lona tama” (Mosaea 3:19).
O Le Tatalo Faamaoni a le Loto Amiotonu
E ui i le tele o mataupu faavae o le talalelei e fesoasoani ia i tatou i le mauaina o le masii i luga, ae ou te fia taulai faapitoa atu i se mataupu faavae e tasi. O le tatalo o se tasi lea o mataupu faavae o le talalelei e maua ai lena masii i luga. O le tatalo ua i ai le mana e siitia ai i tatou mai o tatou popolega faalelalolagi, e sii ae ai i tatou mai ao o le faanoanoa ma le pogisa ma avatu ai i se tafailagi susulu ma le manino.
O se tasi o faamanuiaga aupito maoae ma avanoa ua tatou maua o ni fanau a lo tatou Tama Faalelagi o le mafai lea ona tatou fesootai ma Ia. E mafai ona tatou talanoa ma Ia e uiga i mea e tutupu i o tatou olaga, tofotofoga, ma faamanuiaga. E mafai ona tatou faalogo atu ma maua le taitaiga faalelagi mai le Agaga Paia. E mafai ona tuuina atu a tatou talosaga i le lagi ma maua mai ai se faamautinoaga e faapea, ua faafofogaina a tatou tatalo ma o le a tali mai i ai o Ia, o se Tama agaalofa ma le poto.
O tatalo e o a’e i luga atu o le taualuga [o le fale] o tatalo na e faamaoni, ma aloese mai le tautu i upu po o le ta’uina o upu ma le faalēmanatu i ai. O a tatou talosaga e tatau ona puna ae mai o tatou faanaunauga loloto ina ia tasi i tatou ma lo tatou Tama oi le Lagi.
O le tatalo, pe afai e faia i le faatuatua, e taliaina e le Atua i taimi uma lava. Afai e i ai se taimi e te manatu ai e le mafai ona e tatalo, o le taimi tonu lena e matua manaomia ai lava ona e tatalo, e faaaoga ai le faatuatua. Na aoao mai ma le manino Nifae: “Aua afai e faalogo atu outou i le Agaga [o le Atua] e aoao atu i le tagata ia tatalo, ona iloa lea e outou e tatau ona outou tatalo; aua e le aoao atu le agaga leaga … e le tatau ona tatalo o ia” (2 Nifae 32:8).
Na aoao mai Peresitene Harold B. Lee (1899–1973): “O le tatalo faamaoni a le loto amiotonu e matala atu ai i soo se tagata le faitotoa i le atamai ma le malosi faalelagi lea na te sailia i le amiotonu.”2
Pe tali mai ea tatalo? Ou te molimau atu e tali mai.
Pe mafai ona tatou maua le fesoasoani faalelagi, poto, ma le lagolago mai malo faalelagi? Ou te molimau atu foi ma le mautinoa o le tulaga lava lena e i ai.
O le usiusitai e mautinoa ai se tali i a tatou tatalo. Tatou te faitau i le Feagaiga Fou e faapea “o mea uma foi tou te ole atu ai, e maua mai ia te ia, aua ua tatou tausi i ana poloaiga, tatou te faia foi mea e lelei i ona luma” (1 Ioane 3:22).
E oo mai tali i a tatou tatalo i le taimi a le Alii lava ia. O nisi taimi atonu tatou te lotovaivai ai ona o le tuai ona tali mai o le Alii i a tatou tatalo. I taimi faapena e tatau ona tatou malamalama e silafia e Ia mea tatou te le iloa. E silasila o Ia i mea tatou te le vaaia. Faatuatua ia te Ia. Na te silafia le mea e sili mo Lona atalii/afafine, ona o [Ia] o se Atua atoatoa, o le a tali mai ai o Ia ma le atoatoa i a tatou tatalo i le taimi sili ona lelei.
O nisi taimi, e oo mai ai tali i a tatou tatalo i le taimi lava lea. Na aoaoina e le Perofeta o Iosefa Samita i se faaaliga na tuuina mai ia te ia i Katelani i le 1831: “O lē ole atu i la le Agaga e ole atu e tusa ma le finagalo o le Atua; o lea ua faia ai e pei ona ia ole atu” (MFF 46:30; ua faatusilima mea e faamamafa). Oka se folafolaga ina a manaia!
O Se Vaaiga Fou
O le tatalo o se meaalofa faalelagi ua fuafuaina e fesoasoani ia i tatou ia ausia le masii i luga faaleagaga. Na te faaleleia ma atiina ae la tatou sootaga ma le Atua. Pe le matagofie ea le mafai ona tatou talanoa ma le Punavai sili o le poto ma le agalelei i le atulaulau i soo se taimi tatou te filifilia, ma i soo se nofoaga?
O tatalo faatauvaa, loto faamaoni, ma malolosi i aso uma e siitia ai o tatou olaga i se tulaga maualuga atu i le faaleagaga. I a tatou tatalo tatou te viia ai le Atua, ma faafetai atu ia te Ia, ma tautau atu o tatou vaivaiga, ole atu mo manaoga, ma faaali atu le tuuto loloto i lo tatou Tama Faalelagi. A o tatou faia lenei taumafaiga faaleagaga i le suafa o Iesu Keriso, le Togiola, e faamanuiaina i tatou i le tele o musumusuga, faaaliga, ma le amiotonu, lea e aumaia le matagofie o le lagi i totonu o o tatou olaga.
Ou te toe manatua ai aso a o avea au ma se pailate ma na taimi pe a foliga mai ua pogisa mea uma ma faamalumalu mai ao mafiafia ma faititili taufaamatau. Po o le a lava le foliga le lelei o mea mai la’u vaaiga i le lalolagi, ae na ou iloaina o luga ae o ao, o loo susulu matagofie ai le la e pei o se maataua feilafi i se vanimonimo lanumoana. Ou te le’i faatuatua e faapea o le tulaga lena na i ai, na—ou iloaina lava. Na ou iloaina aua na ou faia e au lava. E lei manaomia ona ou faalagolago i manatu po o talitonuga o isi tagata. Na ou iloaina.
O le auala lava foi lena e tasi, e mafai ai e le masii i luga i aoaoga i mea tau feoaiga, ona feaveaia i tatou i luga ae o matagi e i fafo mai o le lalolagi, ou te iloa o mataupu faavae o le siitia faaleagaga e mafai ona aveina atu ai i tatou i luga a’e o faigata i totonu o le olaga.
Ma ou te iloa foi se isi mea. E ui ina o se aafiaga e maofa ai le manu a’e i ao ma lele atu i le susulu o le tafailagi lanumoana, ae e leai se mea e faatusalia i ai mea ofoofogia o mea e mafai ona tatou oo i ai a o sii ae o tatou loto i le tatalo faamaualalo ma le faatauanau.
O le tatalo e fesoasoani tatou te manumalo ai i taimi faigata. E aumaia ai ia i tatou se vaaiga o lena vanimonimo lanumoana lea e le mafai ona tatou iloa mai la tatou vaaiga faalelalolagi, ae na te faaali mai ia i tatou se isi vaaiga—o se tafailagi matagofie faaleagaga e tumu i le faamoemoe ma le faamautinoaga o faamanuiaga susulu ua folafola mai e le Alii ia i latou o e alolofa ma mulimuli ia te Ia.
O le tatalo o se meaalofa faaleagaga ua mamanuina e fesoasoani ia i tatou ia maua le siitia faaleagaga. Na te faaleleia ma atiina ae lo tatou sootaga ma le Atua.
Tauagavale: ata pue © Dynamic Graphics, Inc.
Tauagavale: ata na saunia e Craig Dimond, © IRI; taumatau: ata pue © IRI