E Lei Galo Au i le Faaola
A o ou laitiiti, na aoaoina au e lou tina i le auala e tatalo ai, ma ma te o lava i le lotu i Aso Sa uma. O lou uso ma lou tuagane na auai i le aufaipese i le aulotu i le lotoifale i Hertfordshire, Egelani, ma na pei o se mea e masani ai le mulimuli i a laua faataitaiga ma auai ai.
Talu ai sa na o le valu ou tausaga, o lea sa le manaomia ai ona ou auai i sauniga tuufaatasi i vaveao o Aso Sa. Ou te moe umi ai lava ae e iu lava ina ou toe nofo i luga ma vili atu lau uila i le sauniga autu o le taeao.
I le ogatotonu o le taumalulu o le 1952, faatasi ai ma le kiona fou i luga o le eleele, ma le malulu na toa i faamalama o lou potumoe, na ou faapupuu ai i lou moega, na ou le fia alu i le lotu i lena Aso Sa.
Na fafagu au e lou tina ou te nofo i luga, ae na ou faataga moe. Ona ou lagona atu lea ua amata ona laa mai i le faasitepu. Na ou valaau atu i ai, “Ua lelei. O le a ou nofo i luga.”
Ae na ou tautalatala ia te au lava, “O le a le uiga? Ae e leai lava se tagata e igoa ia Iesu Keriso.” Na vave ona oo mai se leo i lou mafaufau ma fai mai ia te au, “E i ai, ma o le a e auauna mai ia te au i se aso.” Na pei lava e moi le leo, na pei na tautala mai sa’u uo ia te au. Ae peitai, na mavae atu tausaga, ma na galo foi ia te au lea aafiaga.
Na ou tuputupu ae, auai i le Royal Navy, ma ina ua mavae le iva tausaga sa amata ona ou faigaluega mo se kamupani e puipuia mu. I se tasi afiafi ina ua ou manava, na ou faalogoina ai se tuitui i le faitotoa. Ina ua ou tatalaina, na faailoa mai e ni tamaitai faifeautalai se toalua i laua. Sa ou lelava, palapala, ma fiaai, o lea na ou fautuaina ai e toe o mai i se taimi mulimuli ane i le afiafi po o se isi taimi.
O le mea na ou tei ai, na toe o mai ina ua mavae se itula. Na ou valaaulia i laua i totonu o le fale. O le taimi lava na amata ai ona la tautatala, na ou iloaina ai na i ai se mea faapitoa e uiga i le la savali. Na ese lava le lagona i lou fale, ma na ou iloaina na sau mai nei faifeautalai e toalua.
Na la tuuina mai lau lesona muamua i lena afiafi ma le lesona lua i le afiafi na sosoo ai. Ona oo mai lea o ni alii faifeautalai se toalua i po uma lava seia oo ina uma au lesona. Na amata ona ou faitauina le Tusi a Mamona ma tatalo. O le alu ifo i ou tulivae e tatalo mo le taimi muamua i le 20 tausaga o le aafiaga aupito sili lea ona faaleagaga na ou maua i lou olaga.
Na ou faia le tautinoga ou te papatiso i le vaiaso e tasi pe a uma au lesona. Ina ua uma lou papatisoga, na faaee mai lima o Elder Ross ma Elder Fullerger i luga o lou ulu ma tuuina mai ia te au le meaalofa o le Agaga Paia. O le taimi lava na papai mai ai o laua lima i lou ulu, na ou toe manatua ai lou aafiaga ma le Agaga i le 20 tausaga ua mavae. O se mea faapelepele na teuina i totonu ia te au—ae na taofia e mea sese uma na ou faia i le olaga—na toe faatasia faaleagaga ma lo’u manatua. Na lofituina au i lou mafaufau e faapea, e ese lou taua i le Faaola ma sa lei galo au ia te Ia.
Ou te faafetai lava i faifeautalai na aoaoina au i le talalelei ma tagata o lau uarota muamua na faafaileleina au. Ae o le mea e sili ona taua, ou te faafetai i lou Faaola, o le na ou masalomia Lona i ai, ae o lenei ua ou auauna atu ia te Ia ma le agaga faafetai.
Na oo mai i lou mafaufau se leo ma fai mai, “E i ai se tagata e suafa ia Iesu Keriso.”