Taitaia o Talanoaga a le Vasega
Na faia e Uso Johnson se fesili i le vasega o le Mataupu Faavae o le Talalelei. Na umi lava o saō o lea na pei ai ua le mautonu o ia faatasi ai ma tagata o le vasega. I le avea ai ma peresitene o le Aoga Sa a le siteki na mataituina le vasega, na ou matauina ai e fetaui lava le tau faaali atu o manatu o nisi o le vasega, ae tali loa e Uso Johnson le fesili ma see atu ai i le isi vaega o le lesona.
O lenei mea e mafai ona tupu i vasega o le Ekalesia faapea foi ma aoaoga i totonu o o tatou aiga. Na ou aoaoina, e lua lava mea e manaomia e uunaia ai talanoaga i vasega: (1) fai ni fesili e sili atu ma le tasi se tali ma le (2) ia lava se taimi e tuu atu i le vasega e sailiili ai pe mafaufau ai i se tali.
Fai Ni Fesili e Le Na o le Tasi se Tali
O le tuuina atu o fesili talafeagai e mafai ona taitaiina atu ai i ni talanoaga lelei a le vasega. Ua tumu tusi lesona a le Ekalesia i fesili ua mamanuina ma le faaeteete e uunaia ai tagata o le vasega e saili i aoaoga mo ni tali pe mafaufau loloto foi i ai ma faaaoga ia mea ua latou aoaoina.
E mafai ona e tuuina atu ni fesili o le a manaomia ai ona sue e tamaiti aoga ia tusitusiga paia po o saunoaga a aposetolo ma perofeta o aso e gata ai mo ni faamatalaga. O ni faataitaiga nei se lua o ni fesili suesue e faavae i fautuaga mo le aoao atu o loo i le Aoaoga a Peresitene o le Ekalesia: Iosefa Samita: “Suesue i le vaega e amata atu i le itulau e 55. O le a se mea ua faia e le Faaola ina ia mafai ona avea ai i tatou o ni suli faatasi ma Ia?” ma “Ia iloilo le vaega e amata atu i le itulau 224. O le a se mea na aoao mai e Iosefa Samita e uiga i le taua o le i ai o se tino faaletino?”
O isi fesili, ia fesili atu i tagata o le vasega e mafaufau i le uiga o le mea na latou faitauina po o le faatatau i o latou olaga o mea ua latou aoaoina. O nei fesili e masani lava ona fesiligia pe afai ua uma ona faamasani tagata o le vasega i mea o le lesona. Mo se faataitaiga, a uma ona fai atu fesili suesue o loo i luga, e mafai ona e tuuina atu fesili nei e fesoasoani ai i tagata o le vasega e mafaufau i ai ma faatatau mea ua latou faitauina: “O a ni auala e faaali atu ai i le Alii lo tatou agaga faafetai mo Lana taulaga togiola?” po o le “E mafai faapefea e lo tatou malamalama i le taua o le i ai o se tino faaletino ona aafia ai le tausiga o o tatou tino?”
Faatali mo Tali a Tamaiti Aoga
E tusa lava po o a fesili na e fesiligia, ia lava se taimi e tuu atu i tamaiti o le vasega e saili ai pe mafaufau ai i le tali. O le a iloa e tamaiti aoga ona tali fesili pe afai latou te iloa o le a e le taliina ia fesili mo i latou.
Ina ua mavae lo’u aafiaga i le vasega a Uso Johnson, na tonu loa ia te au o le a ou tulitulimatagauina le umi e faatalitali ai faiaoga mo se tali pe a uma ona latou tuuina atu se fesili. Na ou iloa ai o le toatele lava o faiaoga e na o le lua pe tolu sekone e faatalitali ai, ae ina ua ou fesili atu ia i latou, na latou manatu na umi se taimi na latou faatalitali ai. Ae o tamaiti aoga i le isi itu, na latou fai mai sa latou manaomia se taimi umi atu e mafaufau ai i a latou tali.
I se taumafaiga e fesoasoani atu i faiaoga ina ia faateleina le auai o le vasega i talanoaga o le lesona, na ou uunaia ai i latou e faitau filemu ia oo i le 20 pe a uma ona tuu atu se fesili, e tuu atu ai i le vasega le taimi e mafaufau loloto ai. Na latou aoao e fai atu faamatalaga e pei “O le a ou tuuina atu le taimi tou te mafaufau ai” po o le “E mafai ona outou mafaufau loloto i le fesili lenei, ona ou fesili atu ai lea mo ni tali.” A o amata ona fai e faiaoga o la’u siteki ia lenei auala, na faateleina le auai a vasega i talanoaga ma na lagona e tagata o le vasega le Agaga a o amata ona latou “aoao le tasi i le tasi” (MFF 88:77).
Na ou auai i se vasega na tuuina atu ai e le faiaoga i tagata o le vasega le silia ma le lua minute e mafaufau loloto ai i se fesili e uiga i le faatatauga o se aoaoga faavae o le talalelei. Ia te au, o se taimi lea e manatunatu filemu ai. Na ou lagonaina le Agaga ma mauaina nisi o manatu e uiga i le aoaoga faavae, ia na semanu ou te le iloaina pe ana leai na taimi mo au lava. O lenei lava aafiaga na fesoasoani ou te malamalama ai o le tuuina atu i tagata o le vasega o le taimi e mafaufau loloto ai i se fesili, latou te maua ai se taimi e mafaufau loloto atili ai ma faalogo ai i le Agaga. (Tagai 3 Nifae 17:1–3.)
E mafai ona fiafia lau vasega po o lou aiga i ni aafiaga faaleagaga faapenei i le taimi o se fetufaaiga, pe afai e te faaaogaina fesili e le na o le tasi se tali ona tuu atu lea i tagata uma le taimi e mafaufau loloto ai a o lei tali mai.
Ata na pueina e Welden C. Andersen
Pe a e aoao atu, faataitai motugaafa nei mo le faaleleia atili o le auai o le vasega [i talanoaga].