Ataata e Faasoa Atu
“Ina fiafia ai ia, ma aua le fefe, aua o au le Alii o loo faatasi ma outou, ou te tu foi faatasi ma outou” (MFF 68:6).
O le a se mea na e aoaoina i le Peraimeri ananei, Sasa?” Na fesili atu ai Tina a o latou o atu i le fale mai le lotu.
“Na aoao i matou e Uso Tafi e uiga i meaalofa faapitoa e ta’u o taleni,” o le tala lea a Sasa. “Fai mai o ia na tuuina mai e le Tama Faalelagi ia i tatou uma lava ni taleni ina ia mafai ona tatou fesoasoani atu ai i isi. Fai mai o ia, a tatou faasoaina atu a tatou taleni, o le a maua ai e tagata le fiafia.”
“E sao,” o le tala lea a Tina. “Na aoao mai Iesu e tatau ona faaaoga a tatou taleni e auauna atu ai i isi.”
Sa saofai filemu Sasa mo se taimi, ma sioa i fafo o le faamalama. “Ae, Tina, e faapefea ia Loreni?” na ia fesili ai.
“E a [Loreni]?” O le fesili lea a Tina.
“Ia, e le mafai ona tautala o ia, ma e alu i se nofoa faataavalevale. O a ni ana taleni o i ai e mafai ona fesoasoani atu ai i isi?”
O le a le mea muamua lava e te matauina ia Loreni pe a e vaai ia te ia?” O le fesili lea a Tina.
Na mafaufau Sasa mo se minute ona fai mai lea, “O lana ataata. E ataata lava Loreni i taimi uma.”
“E sao,” na fai mai ai Tina. “O le a ma le isi?”
“E ata lava o ia i taimi uma. Ae maise pe a tatou pepese pe faalogo foi i le piano. E fiafia ai lava o ia i taimi uma. Ma e fiafia e feula atu ni kisi i tagata.”
“O a ni ou lagona pe a oulua faatasi ma Loreni?” O le fesili lea a Tina.
“Fiafia. Ou te lagona i taimi uma le fiafia pe a ou i ai faatasi ma Loreni,” o le tala lea a Sasa.
“E faapena foi au,” na fai mai ai Tina. “O se tasi lena o taleni a Loreni. Na te faasoaina atu le alofa ma le fiafia i tagata uma lava e siomia o ia. O se tasi lena o taleni e sili ona faapitoa.” ●
Ata na tusia e Natalie Malan