Faia o ni Uo
Fesoasoani i Lona Aiga
E fiafia tamaiti uma o le lalolagi e fesoasoani i o latou aiga—e pei lava o oe! O le masina lenei, sei o tatou feiloai atu ia Cinthia Noemí Jara Humada mai Asunción, Parakuei.
Feiloai Atu ia Cinthia
O tua tonu o le aai o Asunción, Parakuei, e i ai se tamai faleoloa lipea uamea ma fai uamea. E tumu le faleoloa i meafaigaluega uamea ma mea e manaomia ona lipea. O tua ane o le faleoloa e i ai si tama’i fale. O le faatoso pito i tua e tautau ai lavalava faatoa uma ona tata. O le fale lenei o le tamaitai e iva tausaga o Cinthia Noemí Jara Humada ma lona aiga.
Fesoasoani i le Fale
O Cinthia e i ai sona tuagane laitiiti ifo o Gustavo (7), ma sona uso pepe o Tepora. E masani ona ia fesoasoani e vaai ia Gustavo, ae e fiafia foi e fesoasoani i le vaaiga o Tepora. Fai mai lona tina, e fesoasoani tele Cinthia i le tausisia o le mama o lona potu, tapena le fale, ma salu le faapaologa. E i ai se aso na manao ai Cinthia ia avea o ia ma se tina ma maua sana fanau e toaono.
Tu Mausali i le Aoga
O le aoga a Cinthia e eseese taimi e fai ai. O nisi tamaiti aoga e aooga i le taeao, o isi i le aoauli, ae o nisi i le afiafi. E alu Cinthia i le aoga i taeao. O loo i ai o ia i le vasega tolu ma o se tamaitiiti aoga lelei tele. O le mataupu e sili ona fiafia i ai o ia o le suesuega o aga fesootai.
O lana aoga e i ai ni tamaiti aoga e silia i le 1,000, ae na o le 12 e auai i le Ekalesia. E masani ona fesili atu ana uo i le aoga e uiga i lana ekalesia. Na te taliina ia fesili i le mea sili na te mafaia ma fai ma faataitaiga e ala i le ola i le talalelei. ●
Afiafi Faaleaiga
E saunia i taimi uma Cinthia e fesoasoani atu i le afiafi faaleaiga. O nisi taimi pe a pisi lona tama i lona faleoloa uamea, e ofo atu Cinthia e fesoasoani ia te ia i le sauniaina o se lesona o le afiafi faaleaiga. E manao Cinthia ia avea o ia ma se faiaoga pe a matua. E fiafia o ia e aoao atu i isi.
Aoao mai Tusitusiga Paia
E fiafia lava Cinthia e faitau—ae maise lava o tusitusiga paia. O le tala faatusipaia e sili ona fiafia i ai o le tala e uiga ia Amona na talai atu i sa Lamana (tagai Alema 18). E fiafia i le ala o loo faaalia ai e tatau ona tatou faia le galuega faafaifeautalai.
Ata pue na saunia e le aiga o Don L. Searle
O Cinthia ma lona aiga: tama (Miguel), tina (Liz), Cinthia, Gustavo, ma Tepora.
O Gafea o le Lalolagi e i Ai Asunción, Parakuei?
Asunción
Parakuei
Ata tusi o tusi na saunia e Scott Greer; faafanua na saunia e Thomas S. Child