Savali a Faiaoga Asiasi

Auai i Tatalo Faamaoni

Ia aoao atu ma le agaga tatalo mau ma upusii nei po o, pe afai e manaomia, se isi mataupu faavae o le a faapea ona faamanuiaina ai uso o loo e asia. Ia molimau atu e uiga i le aoaoga faavae. Ia valaaulia i latou o loo e aoaoina e faasoa mai mea ua latou lagonaina ma aoaoina.

E I Ai i le Tatalo Faamaoni le Mana Faamalosi

Julie B. Beck, peresitene aoao o le Aualofa: “Mafaufau i lo tatou malosi tuufaatasi, pe afai e tofu uso uma ma se tatalo faamaoni i taeao ma po taitasi po o le, sili atu foi, e tatalo e le aunoa e pei ona poloaiina ai e le Alii. Afai e faia tatalo faaleaiga a aiga taitasi i aso taitasi … , o le a tatou malolosi atu” (“O Le Mea Sili e Faia e Tamaitai o le Au Paia o Aso e Gata Ai: Tutu Malosi ma le Mausali,” Liahona Nov. 2007, 110).

Elder Bruce R. McConkie (1915–85) o le Korama a Aposetolo e Toasefululua: “O le tatalo e suia ai o tatou olaga. E ala atu i le tatalo tatou te latalata atu ai i le Alii, ma e faaloaloa mai lona tamatamaiaao ma pai mai ia i tatou, o lea tatou te le toe tutusa ai lava.

“O le tatalo o se olo tele o le malosiaga, o se lagolago o le amiotonu e le muta, o se malosi tele e faapea ona aveese ai mauga ma laveai ai agaga” (“Patterns of Prayer,” Liahona, Iulai 1984, 32).

Elder M. Russell Ballard o le Korama a Aposetolo e Toasefululua: “O tatalo faamaoni ma le loto i ai e faaopoopoina ai se isi fasi vaega o le ofutau o le puipuiga. … O se tasi o auala aupito taua e faaofuina ai i tatou lava i le ofutau o le Atua, o le mautinoa lea o tatalo—o tatalo faatauanau, loto faamaoni, ma fai soo—o se vaega o o tatou olaga i aso uma” (“Be Strong in the Lord,” Ensign, Iulai 2004, 10).

MFF 112:10: “Ia e loto maulalo; ona taitaiina ai lea o oe e le Alii lou Atua, ma tali atu i au talosaga.”

O Le Tatalo ma le Loto Faamaoni o le Fesootaiga Paia Lea

Peresitene James E. Faust (1920–2007), Fesoasoani Lua i le Au Peresitene Sili: “Muamua, o le tatalo o se faailoa atu lea ma le lotomaualalo o le Atua o lo tatou Tama, ma o le Alii o Iesu Keriso o lo tatou Faaola ma lo tatou Togiola. Lona lua, o se tautau atu ma le loto faamaoni o agasala ma solitulafono, ma se talosaga mo se faamagaloga. Lona tolu, o le iloaina lea tatou te manaomia se fesoasoani i luga atu o mea tatou te mafaia. Lona fa, o se avanoa e faailoa atu ai le faafetai ma le faamanu i lo tatou Foafoa. E taua lo tatou fai soo atu: ‘Matou te faafetai i Lau Afio … ,’ ‘Matou te iloa o mea uma e mai Lau Afio ia … ,’ ‘Matou te faafetaia Lau Afio …’ Lona lima, o se avanoa paia e talosaga atu ai i le Atua mo faamanuiaga patino.

“… O tatalo faamaoni e mai le loto. E moni, o le faamaoni e manaomia ai lo tatou aumaia o lagona moni o o tatou loto” (“O Le Maea Faaola o Tatalo,” Liahona, Iulai 2002, 62).

Elder David A. Bednar o le Korama a Aposetolo e Toasefululua: “O tatalo anoa e manaomia ai uma le fesootaiga paia ma galuega faapaiaina. O faamanuiaga e manaomia ai ni taumafaiga i la tatou vaega ae tatou te lei mauaina, ma o le tatalo, i le avea ai ‘o se ituaiga o galuega, … o se auala filifilia mo le mauaina o le faamanuiaga silisili i faamanuiaga uma’ (Bible Dictionary, ‘Prayer,’ 753). Tatou te fetuleni atu i luma ma vilitai i le galuega faapaiaina o le tatalo pe a uma ona tatou faapea atu ‘amene,’ e ala lea i le galueaiina o mea na tatou tau atu i le Tama Faalelagi” (“Ole Atu ma le Faatuatua,” Liahona, Me 2008, 95).

Peresitene Thomas S. Monson: “A o tatou tuuina atu i le Alii a tatou tatalo faaleaiga ma a tatou tatalo faaletagata lava ia, ia tatou faia ma le faatuatua ma le faalagolago ia te Ia. Ia tatou manatua le poloaiga a le Aposetolo o Paulo i Eperu: ‘Aua e tatau i le alu atu i le Atua ona talitonu o loo soifua o ia, o ia foi na te tauia mai o e matua saili ia te ia.’ Afai e i ai se tasi o i tatou o loo faatuai ona gauai atu i le fautuaga ina ia tatalo e le aunoa, e leai se isi itula sili ona lelei e amata ai nai lo le taimi nei” (“O Se Perisitua Tau Tupu,” Liahona, Nov. 2007, 61).