Manatu mo Afiafi Faaleaiga

O nei fautuaga faaleaoaoga e mafai ona faaaoga i potuaoga faapea foi i le aiga. E mafai ona e fetuunaia nei manatu i lou aiga po o le vasega.

“Ua Uma Ona E Iloa,” i. 6: Faamatala atu le tala e uiga ia Eddy Huanca. Ia valaaulia tagata o le aiga e faitau le Moronae 10:3–5. Ia talanoa i le folafolaga ua tuuina mai e Moronae. Tuu atu i tagata o le aiga e tusi a latou molimau e uiga i le Tusi a Mamona ma Iosefa Samita (e mafai ona tusi e tamaiti e laiti ifo le ata o le Tusi a Mamona ma le Perofeta).

“O Le Mea e Mafai ona Fai e se Tagata se Toatasi,” i. 16: Amata le gaoioiga i le usuina o le pese “Lototele o Nifae” (Tusipese a Tamaiti, 64–65). Faamatala atu le tala ia Yves Verwey, ma otooto auala na ia sailia ai ni avanoa e fai ai mea lelei, e pei lava o Nifae. Fai atu i tagata o le aiga e faasoa mai ni aafiaga lelei i se taimi na latou auauna atu ai i isi. Ia faia faaleaiga, mafaufau ma le agaga tatalo i se auala e auauna atu ai i isi (pe filifilia se manatu mai le tusiga) i le aluga o le vaiaso. Faaiu i le faitauina ma talanoaina le 1 Nifae 3:7.

“O Le 20-Tala Pepa,” i. 20: A o lei amataina le lesona, ia afifi ni aitema laiti e faaaoga i le fale. Faamatala atu le tala i le 20-tala pepa. Faaali atu aitema na e afifiina, ma fai atu i tagata o le aiga e mate mai po o a ia aitema a o lei talaiina. Ia faamatala atu ua e iloaina ia aitema ona o oe na afifiina. Ia faatusatusa lenei mea i le malamalama o lo tatou Tama Faalelagi i o tatou olaga ma le pogai e tatau ona tatou liliu atu ai ia te Ia mo le taitaiga. Faitau parakalafa mulimuli e fa o le tusiga, ma ia talanoa po o a mea e tatau ona tatou faia ina ia agavaa ai e maua le taitaiga a le Alii.

“O Lo Tatou Apitaga Faalelagi ua Faaatoatoaina,” i. 26: Faitau parakalafa muamua e lua o le tusiga; ona tofi lea o tagata o le aiga e tuuina mai ni manatu mai vaega taitasi e fa: gagana; tusitusiga; musika; ma faatufugaga, foliga vaaia, ma uiga faaalia. Ia talanoa pe faapefea ona e faia ia avea lou aiga ia sili atu ona faalelagi i ia vaega taitasi. Ia faia o se aiga, se sini e aveese ia soo se faasalalauga mai lou fale e ono taofia ai le avea o lou fale ma se “apitaga faalelagi.” Ia mafaufau foi e faatu se sini e aumai ia tusi, faatufugaga, ma musika lelei i totonu o lou aiga. I se afiafi faaleaiga i le lumanai, ia talanoa i le eseesega e faia e nei gaoioiga i le agaga i totonu o lou aiga.

“Taufetuli a e Le Vaivai,” i. 32: Faitau nisi o molimau mai lenei tusiga. Mafaufau e tuu atu i tagata o le aiga e tusi a latou molimau e uiga i faamanuiaga o le ola i le Upu o le Poto. E mafai ona tusi e tamaiti e laiti ifo ia ata o ni meaai o loo lisiina i le Mataupu Faavae ma Feagaiga 89:10–17. Fai atu i tagata o le aiga ia taumafai e le aunoa e ola i le Upu o le Poto. E mafai ona outou mulimuli i lenei lesona ma aai fiafia i nai meaai maloloina faavai’aiga.

“Malosi e Mulimuli ai i le Alii,” i. U4: Tuu atu i tagata o le aiga e faasoa mai se aafiaga na latou faataatiaese ai se mea ina ia mulimuli atu i le Faaola. Ia fesili atu pe o le a le mea na faigata ai, ma o le a foi le mea na faigofie ai. Faamatala atu le tala ia Elder Claudio D. Zivic lea na tuua le tamoe i le Aso Sa, ma talanoaina faigata ma faamanuiaga na ia mauaina ona o lana filifiliga. Ia faaiu i le faitauina o le parakalafa mulimuli o le tusiga.