Uo i le Uo

Malosi e Mulimuli ai i le Alii

Mai i se faatalatalanoaga ma Elder Claudio D. Zivic o le au Fitugafulu, o loo auauna atu nei i le Au Peresitene o le Eria a Saute Amerika i Saute; na saunia e Sarah Cutler

“O Au, le Alii, … [e] fiafia e faamamalu i e auauna mai ia te au i le amiotonu ma le upu moni” (MFF 76:5).

O le tamoe o se tasi lea o gaoioiga e sili ona ou fiafia i ai a o ou talavou. Sa ou lavea i le au mo taaloga tamoe ma taaloga i luga o le malae, ma sa ou faapitoa lava i le 800-mita taufetuli. O lona uiga ou te tamoe i ni taamilosaga se lua i le malae.

O lau miti na i ai ia ou auai i le Olimipeka. O lou faiaoga sa avea o se tagata taalo i le Olimipeka. Na manatu o ia na lava lou talenia ou te alu ai i le Olimipeka pe a ou koleni malosi.

Sa ou koleni soo ma tamoe i le tele o tuuga. Ina ua 15 ou tausaga, na avea au ma siamupini tulaga-lua mo lau vaega i le atunuu atoa o Atenitina. Sa ou faamoemoe afai e faaauau pea ona ou galue, atonu o le a mafai ona ou alu i le Olimipeka.

Ae sa i ai se faafitauli. Sa masani ona fai a matou tuuga i Aso Sa. E lei umi ae ou iloaina e le mafai ona faaauau ona ou tauva. O lea na ou filifili ai ou te le toe tamoe.

Sa faigata le filifiliga. Na tatau ona ou lafoaia lau miti o le i ai i le Olimipeka. Na le malamalama lou faiaoga pe aisea na ou nofo ai. Ae na ou iloaina na ou faia se filifiliga lelei. E ui lava o taaloga o se mea lelei, ae o le filifili e mulimuli i le Alii ma Lana Ekalesia e sili atu lea.

Mulimuli ane, a o ou tautua ai i le militeli, na auina atu au i se vaega (o se iunite o le militeli) e latalata i Atumauga o Andes. Ina ua maua lou tofiga, na ou lagonaina na i ai i le Alii se mea faapitoa mo au e fai iina. Na ou tatalo soo, ma fesili ai, “O le a le pogai o lou i ai iinei?”

Ina ua mavae le tolu masina o ou iina, na fai mai lo matou taitai, “Ou te manao e faatulaga se kalapu mo fitafita.” Na ia manaomia se nofoaga matou te faitau ai, faalogologo ai i musika, taaalo i taaloga, tusi ai tusi, ma malolo ai. Na fesoasoani mai le Agaga Paia ia ou iloa, o le mea lenei na finagalo le Alii ou te faia. Na talosagaina au e avea ma peresitene o le kalapu. O le tapenaina o le kalapu sa avea o se galuega tele. Sa matou valiina ma faameafale le fale matou te faatasitasi ai.

I le sauniga e tatalaina ai le kalapu, na talosagaina ai au ou te tautala i luma o ni taitai ma fitafita. Na ou maua le avanoa e faasoa atu ai lau molimau e uiga i le talalelei ma ou lagona e uiga i le Ekalesia i le toatele o fitafita sa lei ola i tulaga faatonuina o le talalelei. Na latou iloaina uma lava o au o le “tama Mamona” o le na ola i ou tulaga faatonuina. Ou te lei faia mea na latou faia, ae na latou faaaloalo ia te au. Na faaaloalo foi taitai ia te au. Na fai mai se tasi o i latou ia te au, “Ou te faamemelo ia te oe ona o ou tulaga faatonuina.”

Ia aua nei e fefe e tau atu i tagata le mea e te talitonu i ai ma ou tulaga faatonuina. E le manaomia lou nanaina pe o ai oe. Ou te iloa o le a faamanuia oe e le Alii pe a lava lou lototele e mulimuli ia te Ia. ●

Luga i le tauagavale: ata pue na saunia e Craig Dimond; o isi ata pue mai le faaaloaloga a Elder Zivic

I le 9 o ona tausaga.

Taumatau: Elder Zivic ma lona aiga i le 2007.

Lalo: I le 15 o ona tausaga, laasia o le tini i se tuuga o le 800-mita i Buenos Aires, Atenitina.