Nofo i I!
O le faaaluina o le taimi ma lou aiga na avea i taimi uma ma se aafiaga faapelepele ia te au. Ona sa ou faigaluega o se enisinia i auala o nofoaafi, o lea sa le mautu ai lava ou taimi ma aso faigaluega. E i ai taimi e siitia ai au i nofoaga mamao ma ou toesea ai mo se taimi le tumau mai lou toalua ma lau fanau. I nei la taimi, e na o ni nai aso lava o vaiaso taitasi ou te vaai ai ia i latou—ma seiloga e uma sau malaga umi e toe foi atu ai i le fale.
I se tasi taimi, na malaga mai ai lou toalua o Scarlett, ma o ma atalii e asiasi mai ia te au i se tasi o au malologa. Sa fiafia ou atalii e momoe i se potu o le faletalimalo ma aai i faleaiga. O lenei malaga na avea ma se tafaoga mo i latou. Na vave lava ona uma lenei faatasiga manaia, ma e lei umi ae matou feopoai ma faatofa. O lou tepa atu i le faata i totonu o le taavale, na ou vaaia ai le mou atu o le taavale a Scarlett mai lau vaai a o matou oo atu i auala faafeagai agai i le alatanu. Sa ou toe foi atu i le nofoaafi, ae na ave e Scarlett le ma fanau i le fale.
Na ou ataata a o ou mafaufau i lou aiga ma tonu ai e telefoni atu ia Scarlett e toe faafetai i ai mo le o mai e asi au. Na ou aapa ifo mo lau telefoni feaveai sa i totonu o le taga o lou ofutele, ae na leai se mea na i ai iina. Ina ua maea se sailiga e lei faamanuiaina, na ou iloaina atonu na tuu sese le telefoni i totonu o le taavale a Scarlett.
Na ou faaaogaina lau telefoni feaveai ou te fesootai atu ai i lou aiga, ae na manaomia foi mo lau galuega. Ua 10 minute talu ona o eseese a ma taavale ma lou toalua, ae na ou iloaina e tatau ona ou aumaia lau telefoni. Na ou filifili o le a ou faanatinati atu i le alalaupapa o nofoaafi e sosoo ai, ma ou toe foi ma taumafai ai ia maua atu o ia. A o ou sauni ou te toe liliu, na pei ou te faalogoina se leo o fai mai, “Taofi!”
Na amata ona ou alualu lemu, e ui lava o ia taimi taitasi e tea atu na atili ai le faigata ona ou toe maua mai lau telefoni.
Na oo mai se manatu lona lua: “Nofo i i!”
Na oo mai lenei lagona malosi i lou tino atoa. O le luiina o lou mafaufau sao ma mafuaaga, na ou afe ai i tua ma tape loa le taavale. Ou te lei iloaina pe aisea, ae na ou lagonaina e tatau ona ou faatali i lea vaega o le auala. A o ou gauai atu i le mea na ou lagonaina o se uunaiga mai le Agaga Paia, na ou lagonaina le suia o le atuatuvale i le toafilemu. Na ou faia se tatalo faamaualalo, e faafetaia ai le taitaiga ma le taiala a le Tama Faalelagi.
E lei umi lava ae ou vaaia loa le agai mai o le taavale a Scarlett ia te au. Ina ua ia iloa mai au, sa vave ona ia faatuina le taavale ma sau ma uu mai le telefoni.
“Na faapefea ona e iloa e tatau ona e tu ma faatali atu?” na ia fesili ai.
Na maligi o ma loimata i le olioli a o ou faamatala atu i ai lou aafiaga o le mauaina o uunaiga mai le Agaga Paia.
O loo ou manatua pea lena mea na tupu, ma e le mafai ona ou faafitia le fesoasoani faalelagi na ou mauaina i lena aso. E atili faamalosia a tatou molimau i le iloaina o loo silafia e le Tama Faalelagi mea laiti uma o o tatou olaga. Ou te taumafai ia tumau lou agavaa mo lena lava taitaiga na ou mauaina i le tele o tausaga ua mavae.
Ou te lei iloa pe aisea, ae na ou lagonaina e tatau ona ou faatali i lea vaega o le auala.