E Le Faatagaina Le Palauvale
I le 1962, e 11 i matou ma au uo i le aoga maualuga mai Preston, Idaho, na auai i le Vaega o le Puipuiga a le Malo. O aoaoga amata na pei o se tafaoga ia i matou seia oo ina matou oo atu i Fort Ord, i Kalefonia.
Sa matou manaomia le tasi ma le isi ina ia mafai ona matou ola i o matou siosiomaga fou o le militeli ma osofaiga a isi fitafita fou, o le toatele na faaaogaina ni gagana le lelei ma na foliga mai e le taupulea. Sa ou sailia avanoa uma ina ia matou faatasi ai ma au uo o le Au Paia o Aso e Gata Ai mo se fesoasoani i sauaga a o matou uso a fitafita.
Ina ua uma aoaoga amata, na matou nonofo ai pea ma nisi o au uo e toalua i Fort Ord e faaauau aoaoga faamasani i fesootaiga i le taimi o se taua. E lei umi, ae amata ona tauva ni fitafita aumalolosi ma tino lapopoa se toalua o le matou vasega, e sue po o ai e sili ona mamafa ma lē migao faamatalaga na te faia. O taeao uma lava pe a feala i laua, la te feei atu ai ni upu masoa ina ia lagona ai e tagata uma o le matou atufalega a laua gagana mataga.
I se tasi taeao, na ou tu ai i o laua luma, a o ou talotalo mo se toomaga, ma faatonuina i laua e taofi. I le maasiasi, na liliu mai ai o laua uiga tufanua ia te au, ma valaau mai ni tala ia te au. Ona la lapataia lea o au ia aua nei o la mauaina toatasi au i se mea.
O se taimi mulimuli ane i lena taeao, a o ou taalaoina le otaota, na ou iloa ai lou i ai toatasi i le va o atufalega. Na faafuasei ona ou iloa atu se tagata o agai mai i le itu na ou i ai. O se tasi lea o fitafita na faamatauina au.
Sa ou saunia mo se mea sili ona leaga a o latalata mai o ia ia te au. Peitai, na amata ona ia tau mai lona faaaloalo ia te au ma na moomoo maumau pe ana ia maua le lototele e ola ai e pei o au. Na ia tautino mai o le a matua le fiafia ona matua pe a laua iloaina le ituaiga olaga na ola ai o ia. Na fai mai o ia, na te le toe faaaogaina lava ni gagana masoa pe a ou i ai. Ona liliu loa lea o ia ma alu.
A o ou ui atu i isi atufalega na sosoo ai, na ou vaaia le alii lona lua o agai mai ia te au. Na oo mai ma faatoese mai ona o lana mea sa fai. Na ia tau mai foi lona faaaloalo ia te au, ma fai mai, e faamoemoe e i ai se aso e mafai ai ona ola e pei ona sa aoao ai o ia.
I le faaiuga o se tasi vaiaso ina ua o au uo o le Au Paia o Aso e Gata Ai e malolo, na valaaulia au e nei alii talavou e toalua matou te o i se tifaga ma le latou vaega. A o matou savavali faatasi, na palauvale se tasi o i latou. Na tau atu e nei fitafita tino lapopoa e toalua i le latou vaega, e aua nei toe palalauvale pe a ou faatasi ai ma i latou.
Ina ua uma le tifaga, ma tonu ai i le vaega e o i se fale kalapu e inu ai, na fai i ai au uo la te le o, ona o le a matou o e mafuta i lena afiafi. Ina ua tuua na o i matou, na la fesili mai e uiga i lou aiga ma le ituaiga ekalesia na ou auai lea e fesoasoani i alii talavou e atiina ae tulaga faatonuina lea na ola ai la matou vaega o le Au Paia o Aso e Gata Ai. Na ou taliina a laua fesili ma faamatala atu i ai e uiga i le Ekalesia.
Na ou aoaoina e fesoasoani mai le lagi i le lototele ma faamanuia mai i latou e tutu atu mo le mea moni.
Na faafuasei ona ou iloa atu se tagata o agai mai i le itu na ou i ai. O se tasi o fitafita na faamatauina au.