Ua Saunia e le Alii
Ina ua uma ona ou faaipoipo, o se tasi o ou faanaunauga sili lava o le maua lea o se aiga toatele. O se tasi po na ou faia ai se miti ma ou vaaia ai ni teineiti se toafa ma ni tamaiti se toatolu o e o le a avea ma se vaega o lo matou aiga. A o amata ona ou fanauina nei tamaiti, sa fesoasoani mai le Alii ia i maua ma lou toalua i le tausiga o i latou. Soo se taimi lava na i ai se mai po o se faafitauli, na aumaia e faamanuiaga faaleperisitua ma vavega ni iuga fiafia.
Ae na iu ina maliu lou toalua. E ese mai i le taulimaina o le faanoanoa, na ou maitaga ma atuatuvale pe o le a faapefea ona ou tausia lau fanau. Ae na ou iloaina o le a faaauau pea ona fesoasoani mai le Alii ia te au.
O se tasi o auala na Ia fesoasoani mai ai o le faamafanafanaina lea o au. A o ou i ai i le malumalu, na oo ina ou iloa na manuia lava lou toalua, ma na i ai se pogai na tatau ai ona ia tuua le lalolagi, ma o le a ia fesoasoani mai ia i matou mai le isi itu o le veli. Na malosi foi lou lagona e tatau ona ou toe foi vave atu i le malumalu. Sa ou manao lava ia ou toe foi atu i totonu o le tolu masina, ae na ou iloaina o le sailia o le taimi ma le tupe e toe foi atu ai o le a faigata. Ou te alu i le Malumalu o Bern Suitiselani, e matua mamao lava mai lou aiga i Italia.
A o ou savali ese mai ma le falemautotogi e latalata i le malumalu, na taofi au e se tagata o le Ekalesia. Na ia tuuina mai ia te au se teutusi ma fai mai, “O le mea lea mo oe.”
Na ou tatalaina le teutusi ma vaaia ai se tupe i totonu. “E le mafai ona ou aveina lenei mea,” na ou fai atu ai.
“Faamolemole e ave,” na ia fai mai ai. “A o ou i ai i totonu o le malumalu, na ou lagonaina le uunaia o au e le Agaga e tuu atu lenei tupe ia te oe.”
Ina ua ou faitauina le tupe, na ou iloa ai na fetaui tonu lava ma le totogi o le sau mai Italia i le malumalu ma le toe foi atu. O le tolu masina mulimuli ane, na ou toe sau ai i le malumalu.
Na saunia foi e le Alii mea na ou manaomia e ala i le fesoasoani i lou maua o se galuega i le ofisa o se fomai. E lei umi ae ou maua se avanoa e faamaonia ai e faigaluega i le tausiga o gasegase tigaina. Na ou aoga i vasega mo le faamaoniaina, ae na pau tonu lava suega i le lua vaiaso talu ona fanau lau pepe. Na ou suesue ma auai i le vasega i le taimi atoa, ae o na vaiaso e lua ia na sili ona ou manaomia ou te suesue ai, na faapea foi ona ou manaomia e tausi ai lau pepe teine. Na ou lagona le lofituina. O le leai o se taimi e suesue ai, na ou le mautinoa ai pe mafai ona pasi lau suega.
Sa toetoe a ou fati ma lē faia le suega, ae peitai na ou iloaina na faamanuiaina au e le Alii i lenei avanoa. Ina ua ou tatalo, na faamautinoa mai e le Agaga e faapea, na ou faia la’u vaega ma o le a ou maua le fesoasoani a le Alii.
O le faatuatua o le a fesoasoani mai le Alii ia te au, o lea na ou sueina ai le suega. Na ou maua le toomaga i le iloaina na faatatau tonu lava le suega i mea na sili ona ou iloaina. Na ou pasi, ma o avanoa faateleina na tuuina mai e le faamaonia mo le tausiga o gasegase tigaina, o le mea tonu lea na manaomia e lou aiga. Na mafai ona ou faaaluina ni taimi se tele ma lau fanau ma maua ni tupe se tele e tausi ai i latou.
Ou te iloa e faafofoga mai le Tama Faalelagi i au talosaga ma fesoasoani mai ia te au pe a ou usiusitai i le ole atu ma le faatuatua. Ua ou iloa ua Ia fesoasoani mai ia te au i le tausiga o lau fanau ma o le a matou faatasi ma i latou ma lou toalua i le faavavau.
Na tuu mai ia te au e se tagata o le Ekalesia se teutusi ma fai mai, “O le mea lenei mo oe.”